Asomafoɔ 7

Bɛde Stefano kogyinaa badwa he anim

1Na sɔfo panyini he bisaa sɛ, “Nsɛm yi te saa anaa?” 2#Gye 11:31; 15:7 Na Stefano buaa sɛ:

“Anuanom ne agyanom, hontie me. Animuonyam Nyankopɔn he yii ne ho adi kyerɛɛ yɛ nana Abraham, berɛ a na ɔya Mesopotamia ansa na ɔɔkɔtena Haran he, 3#Gye 12:1 na ɔka kyerɛɛ no sɛ, ‘Firi w’asaase so ne w’abusua mu na kɔ asaase a mɛkyerɛ wo he so.’ 4#Gye 11:32; 12:5 Nti firi Kaldeafoɔ asaase so kɔtena Haran. Afei berɛ a ne papa wuiɛ akyi he, Nyankopɔn ma otu bɛtenaa asaase a hote so seesei he so. 5#Gye 13:15 Nso wamma no bi sɛ n’agyapadeɛ, wannya anammɔno baako mpo, na mmom Nyankopɔn hyɛɛ bɔ sɛ ɔde bɛma no sɛ agyapadeɛ, na ne wuo akyi he ɔde bɛma n’asefoɔ, nso saa berɛ he na onni ba. 6#Gye 15:13-14; Eks 12:40 Na Nyankopɔn kaa yei ho asɛm sɛ, n’asefoɔ bɛyɛ ahohoɔ binom mane mu, na nkurofoɔ he de bɛ ayɛ nkoa, ateetee bɛ mfie ahannan. 7Nyankopɔn kaa sɛ, ‘Mebu mane a bɛde bɛ bɛyɛ nkoa he atɛne, na yeinom akyi he, bebefiri hɔ na bɛabɛsom me ha.’ 8#Gye 17:10 Ɔmaa no twetiatwa apam nso; nti ɔwoo Isak, na da ɔtɔ so nwɔtwe he otwaa no twetia, na Isak woo Yakob, na Yakob woo mmusua dummienu he agyanom.

9 # Gye 37:28; 39:1-2; 39:21 “Na saa agyanom he aniberee Yosef, na bɛtɔnoo no kɔɔ Misraim. Nso na Nyankopɔn ka ne ho, 10#Gye 41:38-45 na ɔgyee no firii n’ahohiahia nyinaa mu maa no adom ne nyansa wɔ Misraim hene Farao anim. Na ɔpaa no sɛ ɔnhwɛ Misraim ne ne fie nyinaa so. 11Na afei ɔbaa sɛ kɔm bi baa Misraim ne Kaana asaase nyinaa so, na yei de amaneɛ kɛseɛ baeɛ a na yɛ nananom nya aduane nni. 12#Gye 42:1 Na Yakob tee sɛ aduane ya Misraim he, ɔsomaa yɛ nananom berɛ a odi kane. 13#Gye 45:3; 45:16 Na ne mprenu so he, Yosef yii ne ho adi kyerɛɛ ne nuanom, na Farao huu Yosef abusua. 14#Gye 45:9-10, 17-18; 46:27 Nti Yosef soma ma bɛkɔfaa ne papa Yakob ne n’abusua nyinaa firii hɔ baeɛ, nnipa a na bɛ dodoɔ yɛ aduɔson num. 15#Gye 46:1; 49:33 Yakob kɔɔ Misraim. Na ɔno ankasa wuiɛ, na yɛ agyanom nso wuwuu saa 16#Gye 23:16-17; 50:13; Yos 24:32 na bɛde bɛ kɔɔ Sekem kosiee bɛ adamena a Abraham de sika dwetɛ tɔ firii Hamor mma nkyɛne ya Sekem he mu.

17 # Eks 1:7 “Na berɛ ɔɔyɛ aso ama bɔhyɛ a Nyankopɔn de maa Abraham he aba mu he, yɛ nkurofoɔ he dɔre yɛɛ bebree ya Misraim 18kosii sɛ hene foforɔ bedii adeɛ Misraim a na onnim Yosef. 19#Eks 1:22 Ɔno ne de anifire dii yɛ abusua na ɔhyɛɛ yɛ nananom sɛ bɛnto bɛ mmɔfra ngu ma benwuwu. 20#Gye 2:2; Heb 11:23 Saa berɛ heaa ne bɛwoo Mose, na ne ho ɔfɛ paa. Na bɛtetee no bosome mmeɛnsa ne papa fie 21#Eks 2:10 na begyae no hɔ he, Farao babaa faa no tetee no sɛ n’ankasa ba. 22Na bɛkyerɛɛ Mose Misraim nyansa nyinaa. Na ɔwɔ tumi ne kasa ne nnwuma mu.

23 # Eks 2:11 “Na odii mfie aduannan he, ɔyɔɔ n’adwene sɛ ɔbɛkɔ akɔhwehwɛ ne nuanom, Israelfoɔ he. 24Na ohuu sɛ Misraimni bi ɔɔyɔ Israelni bi bɔne he, ɔgyee Israelni he ti, na okuu Misraimni he de yɛɛ aweretɔ maa Israelni a na ɔɔyɔ no bɔne he. 25Osusuu sɛ ne nuanom behu sɛ Nyankopɔn nam ne so ɔɔgye bɛ, nso bɛanhu no saa. 26Na adeɛ kyeeɛ he ɔkɔtoo Israelfoɔ binom sɛ bɛɛko, na ɔbɔɔ mmɔdene sɛ ɔbɛka bɛ abom bio ama asomdwie aba bɛ ntam, na ɔkaa sɛ, “Mmeema, ho yɛ anuanom. Mmɛ nti ne hoyɔ ho ho bɔne yi?” 27Na nea ɔɔyɔ ne yɔnko bɔne he summ no kaa sɛ, “Hwane ne yii wo sɛ yɛ sodifoɔ ne temufoɔ?” 28Wopɛ sɛ woku me sɛ wokuu Misraimni he nnora he anaa? 29#Eks 2:15; 18:3-4 Na Mose tee yei he, odwane kɔeɛ na ɔkɔyɛɛ hɔhoɔ Midian asaase so, na hɔ ne ɔwoo mma mmeema mmienu.

30 # Eks 3:2; Deut 33:16 “Na mfie aduannan akyi he, bɔfoɔ bi yii ne ho kyerɛɛ no Sinai Bepɔ serɛ he so, nwura bi a ɔɔdɛre mu. 31Mose huiɛ he, ɔyɛɛ no nwanwa. Na ɔtwe pinii ho sɛ ɔɔkɔhwɛ he, Awurade kasaa sɛ: 32#Eks 3:6 “Me ne wo agyanom Nyankopɔn, Abraham Nyankopɔn, Isak Nyankopɔn, ne Yakob Nyankopɔn.” Mose ho hyɛɛ aseɛ sɛ ɔɔpopo nti wannya akokoɔduro sɛ ɔɔkɔ so ahwɛ adekorɔ he bio. 33Na Awurade ka kyerɛɛ no sɛ, “Worɔ wo mpaboa, na baabi a wogyina he yɛ kronkron. 34Nɔkwasɛm ne sɛ, maahu amaneɛ a me nkurofoɔ a bɛya Misraim he oohu; na maate bɛ apinisie, na maaba sɛ meebɛgye bɛ. Afei bra, na mensoma wo nkɔ Misraim.”

35 # Eks 2:14 “Ɔyɛ saa Mose yi ne bɛpoo no berɛ a bɛkaa sɛ, Hwane ne yii wo sɛ yɛ sodifoɔ ne temufoɔ?” Ɔno ne afei deɛ Nyankopɔn nam bɔfoɔ a oyii ne ho adi kyerɛɛ no nwuram hɔ he so ɔɔsoma no sɛ sodifoɔ ne gyefoɔ he. 36#Eks 7:10; 14:21 Oyii bɛ, na ɔyɔɔ anwanwadeɛ ne nsɛnkyerɛnne pii Misriam, Mmɛwa Po he mu ne serɛ he so mfie aduannan. 37#Deut 18:15 Saa Mose yi ne ka kyerɛɛ Israelfoɔ sɛ, ‘Nyankopɔn beyi diyifoɔ bi a ɔte sɛ me afiri ho nuanom mu ama ho.’ 38#Eks 19:3 Mose yiaa ne na ɔka bɔfoɔ a ɔkasa kyerɛɛ no Bepɔ Sinai so he ho a ɔbaa asafo he mu ne yɛ nananom nkyɛne serɛ so he, na onyaa nkwa nsɛm kronkron a ɔde bɛma ho. 39Yɛ nananom anyɛ setie ama no, na mmom bɛpoo no, na bebenya a na nka bɛ ya Misraim, 40#Eks 32:1 na bɛka kyerɛɛ Aaron sɛ, “Yɛ abosom ma yɛ ma benni yɛ anim. Na Mose yi a odii yɛ anim firi Misraim asaase so he, yennim nea ato no.” 41Nti ɔyɔɔ nantwie ba honyini bi, na bɛbɔɔ afɔdeɛ maa no. Na bɛgyee bɛ ani bɛ nsa ano nnwuma ho. 42#Amos 5:25-27 Na Nyankopɔn yii n’ani firii bɛ so, na ogyae bɛ ma bɛsom soro asafo, sɛnea bɛatwerɛ adiyifoɔ he nwoma mu he sɛ:

‘O Israel fie, ɔyɛ me ne hode afɔrebɔdeɛ ne ayɛyɛdeɛ braa me serɛ so

mfie adaduannan he?

43Daabi, mmom hofaa Molok ntomadane

ne ho bosom Refan nsoromma,

ahonyini a hoyɔeɛ sɛ hobɛsom bɛ;

nti meyi ho akɔ Babel akyi nohoa.’

44 # Eks 25:40 “Yɛ nananom nyaa adanseɛ ntomadane he serɛ he so, sɛnea ɔhyɛɛ Mose berɛ a ɔɔkasa akyerɛ no sɛ ɔnyɔ no sɛ nhwɛsodeɛ a ohuiɛ he. 45#Yos 3:14; 18:1 Na yɛ nananom nsa kaa saa ntomadane yi he, bɛne Yosua de baa amanamane a Nyankopɔn pamoo bɛ firii yɛ nananom anim he asaase so. Na bɛkora noaa de besii Dawid a, 46#2 Sa 7:2; Dwom 132:5 onyaa Nyankopɔn anim adom na obisaa akwannya a ɔde besi tenabea ama Israel Nyankopɔn, he berɛ so. 47#1 Ah 6:1 Nso ɔyɛ Salomo ne sii fie maa no. 48#Yes 66:1-2 Na asɛm he ne sɛ, Sorosoroni he nte fie a bɛde nnipa nsa ayɔ mu, sɛnea diyifoɔ he kaa sɛ,

49‘Soro yɛ m’ahennwa,

na asaase yɛ me nane ntiasoɔ.

Mmɛ fie ne hobesi ama me, Awurade ne aka,

anaa he ne me homebea?’

50Ɔnyɛ me nsa ne yɔɔ nnoɔma yi nyinaa anaa?

51 # Eks 32:10; Lew 26:41 “Nnipa a hoasene ho kɔno, ho a bentwaa ho akoma ne ho aso twetia, hoko tia Honhom Kronkron daa te sɛ ho agyanom yɔeɛ he. 52#2 Be 36:16; Mat 23:31 Adiyifoɔ he mu hwane ne ho agyanom antaa no? Bekuu bɛ a bɛhyɛɛ nkɔm faa Kronkronni he mmaeɛ ho, na afei hoayi no ama bɛaku no. 53#Eks 20; Gal 3:19; Heb 2:2 Hone honyaa mmara he sɛnea abɔfoɔ de maeɛ he, nso hoanni so.

54 # Aso 5:33 Bɛtee yeinom he ɔwowɔɔ bɛ akoma mu na bɛ ani beree paa tia Stefano. 55Nso esiane sɛ Honhom Kronkron ahyɛ ne ma nti, ɔhwɛɛ soro gyee huu Nyankopɔn animuonyam ne Yesu sɛ ogyina Nyankopɔn nsa nifa, 56#Luk 22:69 na ɔkaa sɛ, “Hwɛ! Mehu sɛ soro abie a Nipa Ba he gyina Nyankopɔn nsa nifa.” 57Na bɛteateam dendene, de bɛ nsa sisii bɛ aso, na bɛ nyinaa gyee twi kɔɔ no so. 58#Aso 22:20 Na bɛde no firii kuro he mu he, befirii aseɛ sii no aboɔ. Na adansefoɔ he de bɛ ntaadeɛ ngugusoɔ guu abranteɛ bi a bɛfrɛ no Saulo nane ase. 59#Dwom 31:5; Luk 23:46 Na begu so oosi no aboɔ he ɔsrɛɛ sɛ, “Awurade Yesu, gye me honhom.” 60#Luk 23:34 Afei, obuu nkotodwe de nne kɛseɛ teaam sɛ, “Awurade, mmu bɔne yi ntia bɛ.” Na ɔkaa saa he ogyaam.

Currently Selected:

Asomafoɔ 7: BBTP

Highlight

Copy