Génesis 27

Apa Jacobpa tsai shara inadi

1Isaac adiwushta wexu ana uĩtiruba idi. Naskake peda wetsa Isaacpa awẽ wake iyua Esaú yuidi: “Ewẽ wakẽ ẽ bia yuinu”, Isaacpa wadi. “Epã ea yuiwe”, wadi. 2Apã yuidi: “Ma ẽ adiwukuiya. Awetiãra ẽ dai. 3Mewẽ piakati mewẽ pia wuta yuina wetsa retexiwe ẽ pinu. 4Na dabi ẽ pipaitiru keskara ea axuwe ẽ naxuba ẽ piyunu. Ea pichaxuwe dabi shara ẽ pipaibis keskara ewẽ awara sharawu ẽ bia inaxinu”, Isaacpa wadi.

5Apa Isaacpa Esaú yuiyaitu Rebecapa dikadi. Ma Esaú dii mera kaadu 6Rebecapa awẽ wake chipuke Jacob yuidi: “Mewẽ epa mewẽ uchi yuiyaitu ẽ dika. Duduri Esaú yuiya: 7‘Na ẽ dabi pipaitiru ea axuwe. Naskatari ẽ piyunu ẽ bia awara sharawu inaxinu Diaiwu Diospa uĩyaidu’, waitu ẽ dika”, Rebecapa Jacob wadi. 8“Ewẽ wakẽ ea dikakuiwe ẽ bia yuiyaitu. 9Yuinawu kede mera ikawu adua oveja keskara raweta atũ wake sharakui ea wixutawe mewẽ epa pipaitiru keskara ẽ pichaxunu. 10Dabi shara ma ẽ pichaxuadu mewẽ epã pinu wuxutaxikĩ dayuxuba na ikibiswu sharawu bia inaxinu”, Rebecapa awẽ wake Jacob wadi.

11Jacobpa awa yuidi: “Ewẽ uchi awẽ yuratiixu radiya. Ẽ radiuba. 12Ea ramakĩ tapitiru ẽ aki kaxepaiyai keskara itiru. Naskatari ea na ikibiswu sharawu ea inataba ea chakawatiru”, wadi.

13Awã kebadi: “Ewẽ wake, da ẽ bia yuiyai awe. Ea cabrito wixutawe. Shinachakayabawe. Bia chakawaibaki ea akiki”, awã Jacob wadi.

14Naskata Jacobpa cabrito keskara rawe wii kai kadi. Ma weadu awa Rebecapa pichaxudi na pipaitiru keskara Isaacpa pinu. 15Rebecapa Esaú awẽ saweti sharakui awẽ pexe meradua wita Jacob sawebadi. 16Naskata oveja keskara raweta atũ wichi wita awẽ puña rawe adu wadi awẽ texu adu radiya yabake. 17Ma piti ikadu Jacobpa apa wete inata pan inadi pinu.

18Naskata Jacob ikikaĩkĩ apa kedadi: “Epã”, apa wadi. Isaacpa kebadi: “Watu mi ewẽ wakeme”, wadi.

19Jacobpa apa yuidi: “Ẽ mewẽ wake iyua. Esaú. Naa mia ea yuiya ma ẽ bia axua. Widinakawata ẽ bia wexua piwe. Naskaxu mewẽ awara sharawu ea inawe”, Jacobpa Isaac wadi.

20Naskata Isaacpa ñukadi: “Aweskawaxu kushikui mi yuina wichiame”, wadi. Jacobpa kebadi: “Mewẽ Diospa ea ina”, apa wadi.

21Isaacpa yuidi: “Uwe ẽ bia beenu mi Esaúmaiki”, wadi. 22Naskawaitu Jacob apaki kadi apã ramanu: “Mi Jacobpa awẽ tsai mi naskawiax Esaúpa awẽ puña rawe keskara radiwuya mi”, apã wadi.

23Isaacpa unadiba puña rawemai radiyake naa Esaú keskaramaiki. Awẽ tsai sharawu inataba tapikuipaidi. 24Awiana ñukadi: “Mi ewẽ wakekui Esaúme”, Isaacpa wadi. Jacobpa apa kebadi: “Ẽ Esaú”, wadi.

25Naskata apã yuidi: “Na mi retea pichaxu ea inayuwe ẽ pinu. Ewẽ awara sharawu ẽ bia inanu”, apã wadi. Jacobpa apa piti inadi pinu naskatari vino wexudi, Isaacpa pita ayanu. 26Naskata apa yuidi: “Tabuki ea tsuawe”, apã wadi.

27Jacob apaki uxũ tabuki tsu adi. Isaacpa awẽ saweti xetedi. Tsai sharapa yuidi:

“Dii itsa keskara ẽ bia xetei. Dios bia sharawada.

28Dai arixu bia ui ibaxuxiwi.

Na mi wadawu wuaikĩ sharanuwu.

Arroz keskara wuaita wibi awẽ ade uva

nari wuainu.

29Yura ichapawu mi atũ diaiwu inu.

Bai wetsaduawu yura ichapawawe

mewẽ tsai bia dikapakexanuwu.

Mewẽ kaiwuu mi atũ diaiwu ipadaka.

Na bia chakawaiwu Diospa atu chakawapadaka.

Na bia sharawaiwu Diospa atu sharawapadaka”, wadi.

30Ma Isaacpa tsai shara yuikĩ adaitiadu Jacob tsekekaĩdaidu Esaú dii meraduax dasudi. 31Naskata pichaxudi piti shara Esaúpa. Dukuta: “Epã widinakawata piwe mewẽ wakẽ yuina retea mewẽ tsai shara ea inaxikĩ”, Esaúpa apa wadi. 32Isaacpa yukadi: “Mi tsuame”, wadi. Esaúpa kebadi: “Ẽ Esaú mewẽ wake iyua”, wadi. 33Isaac peesitaba rateyana yuidi: “Tsuã yuina retetadame. Mi uabadu ma ẽ pia. Ẽ ma tsai shara ina datiã naa tsai sharaya”, wadi. 34Esaúpa naa tsai dikai apã yuiyaitu sidakuiyana yuidi: “Eari tsai shara inawe epã”, wadi. 35Isaacpa kebadi: “Mewẽ udiwetsa uta ea para. Naatu tsai shara wua na mewena ikerada”, wadi. 36Esaúpa yuidi: “Naskake Jacob#27.36 Awẽ ade wakakĩ parabis. rawadiwu. Ma ea parakĩ rawewaĩ. Ea wiãkĩ taewadi awara shara ẽ wipaiyai wake iyuatu. Wetsa ea mi yuisharapaiyai ea wiã. Mi tsai shara wetsa mia waxuabame”, Esaú idi. 37Isaacpa kebadi: “Ma ẽ Jacob mewẽ diaiwuwaa mewẽ kaiwuu awẽ uibati inu. Ẽ yuiya trigo ichapaya ita vino ichapaya inu. Iskaratiã ẽ aweskatirume biki”, Isaacpa wadi. 38Esaúpa wekaxtiwadi: “Eari tsai shara wetsa mi inatirubame”, apa Isaac wadi. Naskax Esaú siaidi. 39Naskata apã Esaú yuidi:

“Mi bai shara adu ipadakaba ui itirubadu.

40Mewẽ kedu ewapatu bia duikaspabiswuwe mi retenapakedaka.

Mewẽ extũ bia ana uibati keskara wanupukuiba”, Isaacpa wadi.

Jacob awẽ uchiki besekaĩdi kadi

41Esaúpa Jacob duikaspakĩ taewadi shina sharawu apa inapaiyai wiãitake. Naskake: “Ma ewẽ epa daadu Jacob ẽ retexiwi”, Esaú idi.

42Retexikĩ shinayaitu dikaxu Rebecapa awẽ wake Jacob kedabadi: “Ewẽ wakẽ mewẽ uchĩ shina shara mi wiãitake bia retepai. 43Naskake itipiniwe. Ewẽ uchi Labán ikadu Harán adu katawe. 44Nariax mi weda uyuki awi raeyunu. 45Ma shinabakiadu ẽ bia kedabaxiwi ana mi dudu unu. Na peda wistichi ma dake ẽ batu uĩpaiba”, Rebeca idi.

46Naskata Rebecapa Isaac yuidi: “Na awĩwu hitita Canaán bai adu ikawu Esaú wianake atu uĩ wekax wichia. Jacobpa dudua Canaán awĩwu atu wike ẽ datiru”, Rebeca idi.

Currently Selected:

Génesis 27: mtsB

Highlight

Copy