Génesis 26
26
Isaac Guerar bai adu kadi
1Abraham iyuadu na idi keskai Canaán bai aduax yurawu wudidiwu. Naskake Isaac Guerar adu kadi. Filisteowawe atũ diaiwu Abimélec idi.
2Guerar aduax Epa Dios aki dukuta Isaac yuidi: “Egipto adu kayabawe. Na ẽ bia yuiyai adu netewe. 3Ẽ bia awara shara inanupukui. Da bai ẽ bia inata mewẽ kaiwuu uduax ichapanawã kaĩpakedakawuri. Na mewẽ epa Abraham ẽ axudi keskawaaxiwi. 4Mewẽ kaiwuu uduax ichapanawã kaĩpakedakawu tsuã tanawatiruba na exteweruwutii inu. Da bai ẽ batu inaxiwi. Naskatari na baitiixu ikawu mewẽ kaiwuunuax ichapanawã kaĩpakedakawu awara shara ẽ atu inanupukui. 5Na ẽ Abraham yuiyai keskakuipaudi ewẽ tsai bitsisipa ikũira wapaudi”, Epa Diospa wadi. 6Naskake Isaac Guerar adu netedi.
7Guerar adu ikawawe Isaac ñukadiwu: “Rebeca mewẽ awame”, waiwawe. Isaacpa besekĩ atu yuidiba: “Ewẽ pui”, atu wadi. “Rebecauxũ ea retetiruwu”, ixu Isaacpa shinadi Rebeca awĩwu sharakui idi.
8Guerar adu wari ichapa iyupaudiwu. Isaac awẽ awĩ Rebeca pishkuxu iba ibawaitu diaiwu Abimélecpa filisteowawe atũ diaiwawe pexe xui aduxu uĩdi. 9Abimélecpa Isaac kedabaxu yuidi: “Ikũ Rebeca mewẽ awĩ. Aweskai ‘Ewẽ pui’, mi ikitame”, waitu Isaacpa kebadi.
“Ipaixuba Rebecauxũ ea retetiruwu raixu ẽ shinaita”, Isaacpa Abimélec wadi.
10Abimélecpa yuidi: “Aweskakĩ mia duku iskawaitame. Dudua yura wetsa mewẽ awĩwe ike mia duku chakawakerada”, wadi. 11“Tsuãra da dukuwede wekaxtiwata awĩ wekaxtiwake ẽ atu retebawaidaka”, Abimélecpa awẽ yurawu atu wadi.
12Naa warĩ Diospa Isaac awara sharawu awiana inadu awẽ wadawu ichapaya wuaixudi. 13Naskax Isaac awarawu ichapaya idi. Ana awane yupadiba. 14Awẽ ovejawu ichapaya idi. Awẽ vacawu ichapaya idi. Naskatari awẽ yudubiswu ichapa idi. Naskaitu filisteowawe awarawu ichapayake wiãpaipaudiwu. 15Apa Abraham iyuadu na awẽ yuduxubiswawe bai pewekaxu pozo wadiwu filisteowawe wepukata mai wuspiwadiwu.
16Naskata Abimélecpa Isaac yuidi: “Nu awayaba. Mi awane yupaiba. Duduax katawe”, wadi.
17Naskawaitu dikai Isaac Guerar adu kata bachi raweta xatsukame nadu yuina wichi tapasta nadu idi. 18Abraham iyuxu atu pozo wabadi. Ma daitadu filisteowawe mai wuspiwakata wepudiwu. Na Isaacpa awẽ yudubiswawe apediwu pozo. Na apã adedi naduri Isaacpa adedi.
19Peda wetsa Isaacpa awẽ yudubiswawe pozo wapaikakĩ ede shara wichidiwu. 20Guerar ikawuwe Isaacwe yudubiswawe atuwe setenadiwu: “Da ede nukuna”, idiwu. Naskake Isaacpa ede adekĩ Setenawu, wadi. 21Naskata pozo awiana apeawudu naa uduax awiana setenadiwu. Naskaxu Isaacpa pozo adekĩ Duikaspanadiwu, wadi.
22Isaac naduax chaikui kadi naduxu pozo wadi. Ana setenayabaiwawe uĩkĩ pozo adekĩ Ana tsuã duku wekaxtiwaiba, wadi. “Diaiwu Diospa duku sharawaa. Naskake ana nu chakaiba”, Isaac idi.
23Naduax Isaac Beerseba adu kadi. 24Isaacki Epa Dios naa yabeta aki dukuta yuidi:
“Mewẽ epa Abrahampa ẽ awẽ Dios.
Beseyabawe. Ẽ bewe ika.
Abrahamuxũ ẽ bia awara shara inaxiwi.
Naskatari mewẽ kaiwuu uduax ichapanawã kaĩpakedakawu ichapa idakawu”, Diospa wadi.
25Naskata Isaacpa awẽ yuina wichi tapasdi ruwe petsaidadi naduxu Dios idimaxuxikĩ. Naskatari awẽ yudubiswawe bai pukikaxu pozo wadiwu.
Isaacweta Abimélecpa shinadiwu
26Peda wetsa Guerar aduax Abimélec udi Isaacwe tsaiki ui. Soldadowawe atũ diaiwu Ficol Abimélecwe udi. Naskata Ahuzat Abimélec tsai shinababisri udi. 27Naskake Isaacpa ñukadi: “Aweskai ma ewe tsaikiyuame. Matu bai aduxu ea ma duikaspata ea ma putadi”, Isaacpa Abimélec wadi.
28Nawuwawe kebadiwu: “Mi Epa Dioswe ika. Na shina iskara nu beweta shinapai duku chakawayabawe. 29Nu bia wekaxtiwaba. Askataba nu bia sharawabis. Naskake nu bia yui Epa Dios bia awa shara inawuikai”, Abimélecpa Isaac wadi.
30Naskata Isaacpa atu fiesta waxudi: Nawawe pikata ayadiwu. 31Peda wetsa ma widiniwuwakata tsai shinadiwu. Naskata Isaacpa atu yuidi: “Ma atuwe rawetiru piixikĩ wukawe”, atu wadi.
32Isaacwe yudubiswawe naa pedata yui wekadi wediwu pukikakĩ ede wichidiwu. 33Isaacpa adekĩ Sebá,#26.33 Sebá wakakĩ Yuikui, wapaudiwu. wadi. Naskake datiã pexe ichapa awẽ ade Beerseba, wadiwu.
34Ma Esaú cuarenta wari ika idi Juditwe wianadiwu. Hitita adu ika Beerí awẽ wake idi. Naskatari awĩwu wetsawe wianadi awẽ ade Basemat. Hitita adu ika Elónpa wake idi. 35Naa awĩwu raweta Isaacya Rebeca atu wekaxtiwadiwu.
Currently Selected:
Génesis 26: mtsB
Highlight
Share
Copy
Want to have your highlights saved across all your devices? Sign up or sign in
