Génesis 25

Abraham dake baiwadiwu

1Naskadu Abraham awĩ wetsa widi. Awẽ ade Queturá. 2Naweta seis wake adi. Nawawe atũ adewu Zimrán Jocsán Medán Madián Isbac Súah nawu idiwu. 3Sebáweta Dedán atũ apa Jocsán idi. Dedánpa awẽ xukuwu tres idi. Xuku wetsa asureowu xuku wetsari letuseowu xuku wetsari leumeowu idi. 4Madián awẽ wakewu Efá Éfer Hanoc Abidá Eldaá. Nawu Abraham awẽ awĩ wetsa Queturáweta adi. 5Apa Abraham awẽ awarawu awẽ wake Isaacpa widi. 6Abraham dayuxuba awĩ wetsaweta wake aka atu awara wetsa atu inadi. Naskata na wari ubis ari atu nichidi Isaacwe iyabanuwu.

7Abraham ciento setenta y cinco wari akax dadi. 8Wari ichapa Abraham iyubixaki adiwuax isinitaba dadi. Dai mera ikawu adu kadi. 9Ma daadu Isaacweta Ismaelpa baiwadiwu bawa kidi awẽ ade Macpelá. Nadu chaibashta bai wetsã awẽ ade Mamré wari uwaikiri idi. Naa bai Efrónna idi. Efrón Sóharpa awẽ wake. Sóhar hitita idi. 10Naa bai Abraham peiuxũ widi hititawuna. Nadu awĩ Sara baiyadu awĩwe pataxabedi. 11Abraham ma daitadu Epa Diospa Isaac sharawadi. Naskata pozo awẽ ade Na Epa Dios Ipadakatu Naatiiwi Uĩ nadu Isaac idi.

Ismaelpa awẽ rewuduwu

12Ismaelpa awẽ apa Abraham awẽ awa Agar. Naa Agar egipciowawe awĩwu xawu idi. Sarapa awẽ uibati. 13Ismaelpa awẽ wakewu atũ adewu. Iyua awẽ ade Nebaiot chipuke awẽ ade Quedarnu Adbeelnu Mibsánu 14Mismánu Dumánu Masánu 15Hadarnu Temánu Jeturnu Nafísnu Quedmánu nawu idiwu. 16Ismaelpa awẽ wakewu doce idiwu. Atũ adewuuxũ atũ bai tapidiwu. Nawu atũ diaiwu idiwu.

17Ismael ciento treinta y siete wariya akax dadi. Awẽ xidi ikawu ari kadi. 18Awẽ rewuduwu Havilá bai yawi Sur bai nexpakaya nadu ipaudiwu. Nadu chaibashta Egipto bai. Naduri Ismaelpa rewuduwu ikadu wai Asiriaki dukua idi.

Jacobwe Esaú kaĩdiwu

19Jacobwe Esaú kaĩdiwu. Abrahamwe awẽ wake Isaac udua nu dikanu. 20Isaac cuarenta wari ma aki ikadu Rebecawe wianadi. Betuelpa awẽ wake Rebeca Labánpa chiku idi. Nawu Arameowu Padán-aram bai adu ipaudiwu. 21Rebecapa wake atiruba idi. Naskake Isaacpa Epa Dios kiwĩdi wake apaikĩ. Kiwĩyaitu dikaxu Isaac Diospa axudi. Rebecapa wake dadedi. 22Awã xakĩ meraduax na dadea rawe beenaiwudu: “Aweskai iskakadime”, idi. Rebecapa shinadi. Naskaxu Epa Dios ñukadi. 23Naskaiwawe Diospa awa kebadi:

“Mewẽ xakĩ meraduax bai xuku rawe

aduax yurawu beenakadi

kaĩyukadaxba.

Wetsa bitsisipakui iixiwi. Wetsa bitsisipawiax askara iixiwiba.

Chipuketu na iyua uibati keskara waaxiwi. Naa rawe chipu paxkanaxikadi”, wadi.

24Ma aki uxe ikadu Rebeca wake rawe kaĩdi. 25Na kaĩ taea awẽ radi chaxta idi. Awẽ yuratiixu radiya. Naskake awẽ ade Esaú wadiwu. “Esaú”, wakakĩ Radi ichapaya. 26Naskata udiwetsa kaĩdi. Meke wistichi Esaú awẽ tae chichuku ñatax tsekedi. Naskake awẽ ade Jacob wadiwu. Jacob wakakĩ Tae chichuku ñatax tsekea wapaudiwu. Isaac sesenta wari ma aki ikadu Rebeca wake rawe kaĩdi.

Esaúpa iyuatu witiru bidibetsadi

27Wake rawe yusidiwu. Esaú yuina retebiskui ipaudi. Udiwetsa Jacob dii mera diibisba. Tapas mera wisti ipaudi. 28Naskaitu awẽ apa Isaacpa Esaú duikuipaudi yuina reteaitu uĩkĩ. Rebecapa iyua duiwikĩ askakai wapaudiba. Chipuke Jacob duikuipaudi.

29Peda wetsa Jacobpa pichayaidu Esaú dii mera katadi. Xukenai dukudi. 30Dukuta Esaúpa Jacob piti ñukadi: “Kushi piti wete ushi ea inawe. Ma ẽ wudikui”, wadi. Naskake Esaú awẽ ade wetsa Edom wapaudiwu. Edom wakakĩ Ushi wapaudiwu.

31Naskake Jacobpa kebadi: “Ea inakĩ taewawe na apã iyua inakĩ taewatiru keskawakĩ poroto ushi wete ẽ bia inanu”, Jacobpa wadi. 32“Ea piti inawe. Ewẽ epã ea inapaiyai awabaki”, Esaúpa Jacob wadi. 33Naskaweke: “Ea yuikuiwe iskaratiã mia inaimaiki iyua inatiru keskawakĩ ea inakĩ taewawe”, Jacobpa wadi. Esaúpa kebadi: “Ikũ ẽ bia inai”, wadi.

34Jacobpa Esaú pan inata poroto ushi wete inadi. Ma pita ayata Esaú widinakawata kai iskakaĩdi. Esaú awi duikaspanadi na kaĩdiadu.

Currently Selected:

Génesis 25: mtsB

Highlight

Copy