Hôsea 9
9
Mofom-pisaonana
1Ry Israely ô! Aoka izay
ny fetim-pifaliana mihoa-pampana
toy ny fanaon’ireo firenen-kafa.
Fa efa nanalavitra an’Andriamanitrao ianao
tamin’ny fivarotan-tena nataonao
sy tamin’ny fitiavan-karama maloto
teny am-pivelezam-bary rehetra teny#9.1 Eto ny mpaminany dia milaza ny fahavokaram-bary ho toy ny karama izay aloan’ny andriamanitra Bahala ho valin’izany fivarotan-tena izany..
2Tsy hahafa-po anao anefa
na ny vary eo am-pamoloana
na ny menaka eo am-pamiazana;
ary ny divay vaovao andrasanao
dia handiso fanantenana anao.
3I Efraîma dia tsy hahazo monina intsony
eo amin’ny tanin’ny TOMPO;
fa tsy maintsy hiverina any Ejipta izy
na hankany Asiria hihinan-java-pady.
4Tsy ho afa-mandraraka divay intsony izy
mba ho fanatitra ho an’ny TOMPO;
tsy hahafaly Azy ny sorona ateriny;
ho toy ny mofom-pisaonana
amin’izy ireo izany,
ka ho voaloto avokoa
izay mihinana azy.
Hahavoky azy ihany ny mofony
fa tsy ho tafiditra ao an-tranon’ny TOMPO.
5Inona kosa no hataonareo
amin’ny androm-pankalazana manetriketrika,
dia amin’ny andro fetin’ny TOMPO#9.5 Mety ho ny fetin’ny tranotomboka; jereo ny FTS amin’ny voambolana hoe FANISANANDRO.?
6Rehefa tonga ny fandringanana
ka mihahaka ny vahoaka,
dia hanangona anareo i Ejipta;
saingy Memfisa no ho fasanareo.
Ho lovan-tsongosongo
ny fana-bolafotsinareo sarobidy
ary ho tongan’ny tsilo ny fonenanareo.
7Tonga ny andro famaizana.
Tonga ny andro famaliana#9.7 Jereo Lk 21.22..
Ho fantatr’i Israely anie izany!
Hoy ianareo hoe: «Adala ny mpaminany;
ary mirediredy ny tsindriam-panahy.»
Vokatry ny hamaroan’ny helokao
sy ny fanohera-mafy nataonao izany.
8Miaraka amin’Andriamanitro
ny mpitily ho an’i Efraîma,
dia ilay mpaminany.
Amelaram-pandrika izy
amin’izay alehany rehetra;
ary fanoherana no afitsoka azy
hatrany an-tranon’Andriamanitra.
9Nihoa-pampana ny faharatsianareo
toy ny fahiny tany Gibehà#9.9 Jereo Mpits 19–21..
Nefa hotsaroan’ny Tompo ny helokareo,
ary hoteteziny tsirairay ny fahotanareo.
Diso fanantenana ny Tompo
10«Tahaka ny voaloboka any an-taniefitra
no nahitako an’i Israely,
tahaka ny aviavimbazaha
masaka aloha indrindra
no nahitako ny razanareo.
Saingy rehefa mby tao Bahala-Pehôra#9.10 Bahala-Pehôra: na Bety Pehôra: jereo Nom 25. izy,
dia nanokan-tena ho amin’ny henatra
ka tonga maharikoriko
toy ilay Bahala notiaviny ihany.
11Ankehitriny ny voninahitr’i Efraîma
dia hiserana toy ny fiseram-boromanidina;
ka tsy hisy zaza teraka intsony,
na zaza entina am-bohoka
na zaza torontoronina akory aza.
12Na dia misy mitaiza zanaka aza izy,
dia hoesoriko aminy ireny,
ka tsy hisy miangana.
Eny, hahita loza koa izy
amin’ny handaozako azy.
13I Efraîma, araka ny hitako,
dia manao ny zanany ho toy ny fihaza
ka mamela azy hisehatra
ny mpamono azy ho faty.»
14TOMPO ô, inona no sazy
mba homenao azy?
Ataovy momba sy tsy afa-mampinono
ireo vehivavy ao aminy!
15«Tao Gilgala#9.15 Tao Gilgala: jereo manokana 1 Sam 11.15; 15.12,21; jereo koa Hôs 4.15; Ham 4.4; 5.5 sy nta., hoy ihany ny Tompo,
no niseho ny haratsiany isan-karazany.
Tao no nanombohako nankahala azy.
Horoahiko izy hiala amin’ny toeram-ponenako
noho ny ratsy izay nataony.
Tsy hanam-pitiavana azy intsony Aho;
mpikomy avokoa ny filohany rehetra.
16Voavely i Efraîma:
maina ny fàkany
ka tsy hamoa intsony izy.
Na dia miteraka aza
ny vehivavy ao aminy,
dia hataoko maty ihany
ny malala naloaky ny kibony.»
17Harian’ilay Andriamanitro izy
satria tsy nihaino Azy,
ka dia ho tonga mpirenireny
any amin’ny hafa firenena any.
Currently Selected:
Hôsea 9: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
