Hôsea 4

Ny fitsaran’Andriamanitra ny vahoakany

1Manana ady amin’ny mponin’ity tany ity ny TOMPO, ry Israelita; ka henoy izao teniny izao:

«Tsy misy toetra mahatoky

eto amin’ity tany ity,

tsy misy fitiava-namana,

na fahalalàna an’Andriamanitra.

2Fa mitombo ny fanozonana olona

sy ny famitahana azy ary ny famonoana azy ho faty,

mbamin’ny halatra sy ny fanitsakitsaham-bady;

mifandimby ny ra latsaka.

3Noho izany, fadiranovana ny tany;

reraka ny mponina rehetra ao

mbamin’ny biby eny an-tsaha

sy ny voromanidina;

ary na ny trondron-dranomasina aza

dia ringana koa.»

Fivadihan’ireo mpisorona

4Tsy iza no ampangaina sy kianina,

fa ny tenanao mpisorombe

no ifandaharako, hoy ny Tompo.

5Ho tafintohina antoandro ianao;

ny mpaminany koa amin’ny alina

dia hiara-tafintohina aminao;

hataoko ringana i Israely reninao.

6Ho ringana ny vahoakako

noho ny tsifisian’ny fahalalana Ahy.

Satria efa nandà ny fahalalana Ahy ianao,

ka dia mba holaviko tsy ho mpisorona intsony.

Nanadino ny lalànan’Andriamanitrao#4.6 Ny mpisorona koa dia nanana anjara asa fitahirizana sy fampitana ny fampianarana (na ny lalànan’Andriamanitra) (jereo Deot 33.10). ianao,

ka dia mba hohadinoiko koa ny zanakao.

7Arakaraka ny nahabetsaka ny mpisorona

no vao mainka nanotany tamiko;

ka dia hampodiko ho henatra ny voninahiny.

8Ny sorona ataon’ny vahoakako

ho fanalana ny fahotana

no hanina ivelomany;

ka satriny ihany ho diso ireny#4.8 Jereo Lev 6.19-22..

9Kanefa hitovy ny hanjo

ny mpisorona sy ny laîka;

hofaiziko noho ny fitondrantenany izy,

ary hatsingeriko aminy ny ratsy nataony.

10Hihinana ihany izy fa tsy ho voky,

hivaro-tena#4.10. Jereo 1.2 sy nta. ihany izy fa tsy hanan-janaka,

satria Izaho TOMPO efa tsy nahoany intsony.

11Ny fijangajangana sy ny fahamamoana

no mahavery hevitra azy.

12Mila saina amin’ny tapa-kazony ny oloko;

ary ny tehiny#4.12 ny tehiny: ny mpaminany dia manao fanesoana mampahatsiaro tsato-kazon-tsampy (Jereo Mpits 6.25 sy nta) na hazo kely fampiasa haminavinana ny hoavy. no manoro hevitra azy.

Fa rivotry ny fivarotan-tena

no mitsoka eo aminy ka mampania azy.

Koa dia lasa nivaro-tena

niala tamin’Andriamaniny izy.

13Mihinana ny sorona aterina amin-tsampy

eny an-tampon-tendrombohitra izy,

ary mandoro ditin-kazo manitra

eny amin’ny havoana,

dia eny ambanin’ny hazo ôaka,

sy ny hazo be ravina ary ny terebinta

satria tsara alokaloka ireny

Koa izany no mahatonga

ny zanakavavinareo hivaro-tena

sy ny vinantovavinareo hanitsakitsa-bady.

14Tsy hofaiziko ny zanakavavinareo

raha mivaro-tena izy,

na ny vinantovavinareo,

raha manitsakitsa-bady izy.

Satria ireny mpisorona ireny aza

no mitondra mpivarotena any amin’ny takona,

ka mihinana ny sorona aterina amin-tsampy

miaraka amin’ireny vehivavy ireny.

Fa hoy ny ohabolana hoe:

«Izay vahoaka tsy misy fahaiza-manavaka

dia vahoaka mamery ny tenany.

15Na dia mivaro-tena aza ianao, ry Israely,

dia aoka tsy hanota toy izany koa i Joda.

Aza mankany Gilgala

na miakatra any Bety-Avena ianao;

ary aza mianiana hoe:

«Velona ny TOMPO...#4.15 Gilgala, Bety-Avena: jereo Ham 5.5 sy nta amin’ny Ham 3.14 sy 4.4. –Momba ny faran’ny and. dia jereo Ham 8.14.!»

16Fa mafy hatoka toy ny ombivavy tsy mety ziogaina i Israely. Koa nahoana ny TOMPO no hitondra azy toy ny zanak’ondry andrasana eny an-kijana? 17Tafaray amin’ny sampy i Efraîma, ka avelao izy 18hanapitra ny fibobohany hampahery mijangajanga azy; fa tia fahafaham-baràka ireo filohany. 19Faohin’ny tadio mitambolimbolina izy ka ho menatra noho ireo sorona nataony.

Currently Selected:

Hôsea 4: DIEM

Highlight

Copy