1 Tantara 11
11
Voahosotra ho mpanjakan’i Israely i Davida
(Jereo 2 Sam 5.1-3)
1Dia nivory teo amin’i Davida tao Hebrôna#11.1 Hebrôna: jereo 2 Sam 2.1-4. i Israely manontolo ka nanao hoe:
–Indreto izahay havanao sy tapakao. 2Fahiny, fony mbola nanjaka aza i Saoly, dia ianao ihany no mpitarika ny miaramilan’i Israely tamin’ny ady. Ary ny TOMPO Andriamanitrao efa nilaza taminao hoe: «Ianao no hitondra ilay Israely vahoakako, ary ianao no ho mpanapaka azy.»
3Tonga tao amin’ny mpanjaka tao Hebrôna avokoa ny loholon’i Israely. Ary tao Hebrôna dia nanaovan’i Davida fanekempihavanana teo anatrehan’ny TOMPO ry zareo, ka nanosotra azy ho mpanjakan’i Israely araka ny tenin’ny TOMPO nampilazainy an’i Samoela.
Naka ny tanànan’i Jerosalema i Davida
(Jereo 2 Sam 5.6-10)
4Ary nandeha i Davida sy ny Israelita rehetra hanao fahirano an’i Jerosalema, izay natao hoe Jebosa satria ny Jebosita#11.4 Jebosita: jereo ny FTS amin’ny voambolana hoe AMÔRITA; jereo koa Jos 15.63; Mpits 1.21., mponina tao amin’io faritany io, no nitoetra tao. 5Dia hoy ireo mponina tao Jebosa tamin’i Davida:
–Tsy ho tafiditra ato an-tanànanay ianao!
Kanjo azon’i Davida ihany ny tanànamimanda, dia i Tsiôna izay hatao hoe «Tanànan’i Davida». 6Dia hoy i Davida: «Izay hamely voalohany ny Jebosita dia hatao filohan’ny tafika». Ary i Jôaba, zanakalahin’i Tseroià, no nanafika voalohany; koa izy no nanjary filohan’ny tafika.
7Ary nipetraka tao amin’ilay tanànamimanda i Davida, koa izany no niantsoana azy hoe «Tanànan’i Davida». 8Dia narafitr’i Davida ny tanàna manodidina, manomboka hatreo Milao#11.8 Dia nanorina... sisa tamin’ny tanàna: tsy mazava ny RM eto, ka ampit 2 Sam 5.9 –Ny momba an’i Milao kosa dia jereo 1 Mp 9.15 sy nta. ka miafara amin’ny trano fonenany; fa i Jôaba kosa no nanamboatra ny sisa tamin’ny tanàna.
9Dia nihanatanjaka hatrany i Davida, satria ny TOMPOn’izao rehetra izao no niaraka taminy.
Ireo kalazan’i Davida
(Jereo 2 Sam 23.8-39)
10Ireto no filohan’ireo kalazan’i Davida, dia ireo kalaza nifikitra taminy nandritra ny nanjakany, ka efa niaraka tamin’i Israely lafy valo mba hampanjaka azy teo amin’i Israely araka ny tenin’ny TOMPO. 11Izao no lisitr’ireo kalazan’i Davida#11.11 kalazan’i Davida: jereo 2 Sam 23.8 sy nta.:
I Isbahala, zanakalahin’i Hakmônỳ sady filohan’ny «Tariky ny telo lahy». Izy no ilay nampandihy lefona hamelezana fahavalo telonjato lahy ka nahafaty azy tamin’ny ady indray mandeha monja.
12Manaraka azy dia i Elehazara, zanakalahin’i Dôday avy any Ahôa sady anisan’ny «Tariky ny telo lahy» kalaza. 13Niaraka tamin’i Davida izy tao Efesa-Damîna raha tafangona hiady tao ny Filistinina, ka vaky nandositra ny tafik’i Israely. Ary nisy tanimbary feno vary ôrza tao an-tsaha; 14koa nanotrika tao afovoan’ny tanimbary i Elehazara sy ny olony, ka sady nanavotra ny tanimbary no namely ny Filistinina. Dia nomen’ny TOMPO fandresena miezinezina i Israely#11.14 I Samà no fahatelo (jereo 2 Sam 23.11-12) saingy toa voadingana eto..
15Indray andro, dia nisy telo lahy anisan’ny «andian’ny telopolo lahy» nidina ho eny amin’i Davida teo amin’ny harambato akaikin’ny zohin’i Hadolama, fa nisy tafiky ny Filistinina nitoby tao an-dohasahan’ny Refaîta#11.15 Hadolama: jereo 1 Sam 22.1 sy nta. –ny lohasahan’ny Refaîta: jereo 2 Sam 5.18 sy nta.. 16Ary i Davida efa tao amin’ny fiereny raha mby tao Betlehema ny andia-miaramilan’ny Filistinina. 17Tamin’izay, dia velom-paniriana tampoka i Davida ka nanao hoe:
–Iza no hitondra rano hosotroiko avy amin’ilay fantsakana eo akaikin’ny vavahadin’i Betlehema?
18Dia namakivaky ny tobin’ny Filistinina izy telo lahy ireto ka nanovo rano tamin’ilay fantsakana teo akaikin’ny vavahadin’i Betlehema, ary nitondra izany ho any amin’i Davida; kanjo tsy nety nisotro i Davida fa nanolotra izany ho an’ny TOMPO kosa ho fanatitra araraka, 19sady hoy izy hoe:
–Fady ahy eo anatrehan’Andriamanitra ny hisotro izany, fa midika ho misotro ny ran’ireo lehilahy nandeha nanao vy very ny ainy naka azy!
Koa tsy nety nisotro i Davida.
Izany no zava-bitan’ireo telo lahy maherifo ireo.
20I Abisay, rahalahin’i Jôaba, no filohan’ny «andian’ny telopolo lahy». Izy no ilay nampandihy lefona hamelezana fahavalo telonjato lahy ka nahafaty azy, kanefa tsy tafiditra anarana tao anatin’ny «Tariky ny telo lahy». 21Nomen-kaja avo roa heny kosa i Abisay teo amin’ny «andian’ny telopolo lahy» ka lasa lehibeny; saingy tsy afaka nifaninana tamin’ny «Tariky ny telo lahy» izy.
22I Benaià, avy any Kabitseela, dia zanakalahin’i Jôiadà sady zafikelin’ny miaramila anankiray maherifo. Nahavita asa goavana maro i Benaià: izy no nahafaty ireo Ariela roa lahy avy any Môaba; izy koa ilay nidina tanaty lavaka iray ka nahafaty liona tao tamin’ny indray andro nisy oram-panala. 23Mbola izy koa no nahafaty ilay Ejiptianina izay roa metatra sy sasany ny halàvany sady nirongo lefona lehibe toy ny voditenon’ny mpanenona. Tehina no namelezany azy, dia nosarihany teny an-tanan’ilay Ejiptianina ny lefony ka iny ihany no namonoany azy ho faty. 24Ireo no zava-bitan’i Benaià, zanakalahin’i Jôiadà; kanefa tsy tafiditra anarana tao anatin’ny «Tariky ny telo lahy» kalaza izy. 25Nomen-kaja i Benaià tao amin’ny «andian’ny telopolo lahy», kanefa tsy afaka nifaninana tamin’ny «Tariky ny telo lahy». Izy no voatendrin’i Davida hifehy ny mpiambina azy.
26Ireto kosa ny kalaza maherifo hafa: i Hasahela, rahalahin’i Jôaba; i Elehanàna, zanakalahin’i Dôday, avy any Betlehema; 27i Samôta#11.27 Samôta: antsoina koa hoe Samà ao amin’ny 2 Sam 23.25., avy any Harôra; i Heletsa, avy any Palôna; 28i Hirà, zanakalahin’i Hikesy, avy any Tekôa; i Abihezera, avy any Hanatôta; 29i Sibekay, avy any Hosà; i Hilay, avy any Ahôa; 30i Maheray, avy ao Netôfà; i Heleda, zanakalahin’i Bahanà, avy any Netôfà; 31i Itahy, zanakalahin’i Ribay, avy any Gibehà-n’ireo taranak’i Benjamîna; i Benaià, avy any Pirehatôna; 32i Horay, avy any amin’ny lohasahan-driakan’i Gahasa; i Abiela#11.32 Abiela: tokony hoe Abibahala; ampit 2 Sam 23.31., avy any Harabà; 33i Hazmavety, avy any Bahorîma; i Eliahabà, avy any Sahalbôna; 34i Hasema, avy any Gizôna; i Jônatàna, zanakalahin’i Sagè, avy any Harara; 35i Ahiama, zanakalahin’i Sakara, avy any Harara; i Elifala, zanakalahin’i Ora; 36i Hefera, avy any Mekerà; i Ahià, avy any Palôna; 37i Hetsirao, avy any Karmela; i Naharay, zanakalahin’i Ezbay; 38i Jôela, rahalahin’i Natàna; i Mibihara, zanakalahin’i Hagrỳ#11.38 i Jôela... Hagrỳ: ampit 2 Sam 23.36 izay manao hoe i Jigala zanakalahin’i Natàna, avy any Tsôbà; i Banỳ avy amin’ny foko Gada. ; 39i Tselèka, ilay Hamônita; i Naharay, avy any Beerôta, mpitondra ny fiadian’i Jôaba zanakalahin’i Tseroià; 40i Hirà sy i Gareba, samy taranak’i Jetera; 41i Orià, ilay Hetita; i Zabada, zanakalahin’i Ahelay; 42i Hadinà, zanakalahin’i Sizà, anankiray amin’ireo lohandohan’ny foko robenita, sady ombàn’ny namany 30 lahy koa; 43i Hanàna, zanakalahin’i Mahekà; i Jôsafata, avy any Metèna; 44i Hozià, avy any Hastarôta; i Samà sy i Jehoela, samy zanakalahin’i Hôtama, avy any Harôhera; 45i Jedihaela, zanakalahin’i Simrỳ, sy i Jôhà rahalahiny, avy any Titsa; 46i Eliela, avy any Mahavà; i Jerihay sy i Jôsavià, zanakalahin’i Elnahama; i Jitmà, avy any Môaba; 47i Eliela sy Hôbeda ary i Jahasiela, avy any Tsôbà.
Currently Selected:
1 Tantara 11: DIEM
Highlight
Share
Copy
Want to have your highlights saved across all your devices? Sign up or sign in
Dikanteny Iombonana Eto Madagasikara © Malagasy Bible Society, 2004.
