Mark 3

Jakmàng washey

(Matthew 12:9–14; Luke 6:6–11)

1Jesu Synagogue náng wey ka atho ethina washey jakmàng angta. 2Jesu aa jashit jaksom somlo aa ta phung ma, ban siintey miqtang daqhan eshina angta; req ning they Jesu aa jakmàng wa ri Sabbath saal o taqhal na bo ta ban siinta. 3Jesu aa ethi wa thima batta, “Jakho konáng kaphu.” 4Etho Jesu aa miqtang thima pitta, “Hiqtang thong eq Sabbath saal o chamlang jaksom jin tasomlo phi ni? Aqhal som ching tia tashit eq ching aa? Miq rollung shi thalun eq ching tia tathom eq ching aa?”

Etharin utang tho raaq shey tho raaq moq angta. 5Jesu aa miqtang tha siin eq ukhat angta etho ning tha siin eq tin tho ushit angta, chammatakoi ning sha rapney aja nia tinchey angta. Ethi jio Jesu aa ethi miq thima batta, “Bajak ni tatchal u.” Ethi miq they ujak tha tatchal atho ujak tha qhalta. 6Ethi jio Phorisi tang eq synagogue wang thalat eq Herod miqtang jamoq tachong eq Jesu tha tatik ma raaq phung ta.

Shitim kang na miq waan

7Jesu nia ujiphantey tang Galilee shitim konáng kata, etho ning ji tha daqhan miqtang eq phanta. Galilee wang, Judea wang, 8Jerusalem wang, Idumea wang, Jordan jungku saalnop kowang, Tyre nia Sidon ajong samhaq kingkang wang ning thuta. Jesu aa chamlang somlo ta ethi tang tha tat eq ning thaji thuta. 9Miqtang daqhan thajoq tungkang o, Jesu aa miq waan tachip nak aa ta ujiphantey tang ma ashey waqwan kacha shing ma batta. 10Piq aa daqhan miqtang takasa taqhal kota, req thaji atak miqtang they Jesu hanphung o tatit ma tathum jangta. 11Etho ning khom na anaan tsija tang they Jesu tha khi atho, piq jakho o wol eq jajong aa ring ta, “Nang raa Shkewa Miqwasa!”

12Jesu aa anaan tsija tang ma raaqkhat batta, “Nga utang aa ta utang ma tho nak bat u.”

Jesu aa wasi wani apostle tang tal aa

(Matthew 10:1–4; Luke 6:12–16)

13Ethi jio, Jesu haqkan náng wang eq piq ma utang aa ethi miqtang tha halta. Ning piq jamnáng wangta, 14etho piq aa asi ani miqtang tha talta etho ning tha Apostle ta shing ta. Piq aa ning ma batta. “Nga nim raa ijamoq rum ma etho phanchan kot kat ma talta phang, 15etho thangwa tang phan ma nim ma authority atha angna.”

16Ethi asi ani apostle miqtang tha ira: Simon (Jesu aa umiing tha Peter ta shingta) 17Zebedee sa wani James nia uno John (Jesu aa ningni miing tha Boanerges ta shingta, ta “Rangmok miq”) 18Andrew, Philip, Bartholomew, Matthew, Thomas, Alphaeus sa James, Thaddaeus, patriot Simon, 19Etho Jesu thalottey tha Judas Iscariot.

Jesu nia Beelzebul

(Matthew 12:22–32; Luke 11:14–23; 12:10)

20Ethi jio Jesu himnáng thuta. Etho daqhan miqtang tha thajoq thu atho Jesu nia ujiphantey tang they til phaksat ma tho rangham kap moq angta. 21Baluk o uhimtey tang eq Jesu himnáng thuta ta tat atho, ning aa piq tha sol ma thuta chammatakoi miq wanta, “Piq uro ang aa!”

22Etho thong tataltey tang Jerusalem wang thu eq batta, “Piq khom ro Beelzebul, bara thangwa tang thaji phey náng eq ajong! Etho piq aa hun Jesu ma thangwa tang phan ma tarong ko aa.”

23Jesu aa ning tha urel náng hal eq raaqshiton bat kota: “Thangwa eq chamal eq thangwa sha jin phan eq na i? 24Bari mung na ning ni ning taphal eq thamol hit aa, eshi mung sha dipmat angna. 25Etho himshey tey sha ning ni ning taphal eq thamol hit ajo eshi him sha dipmat angna. 26Ethi rangma Thangwa sha taphal eq thamol hit ajo alo tongmoq angna, esha dipmat hun angna.”

27 “Tarong miqhim sho utang atho hut jin hutmoq angna. Jakho iri miq raa rang khak eq na ethi jio hun uhim wang hut jin hut eq na. 28Nga nim ma asing batphang, miq eq chamtan ngarey jaksom lot somlo ajo tho etho chamtan jashit raaq ajo tho, ning sha jin tolchak eq na. 29Etharin bari miq eq Asang Tsija sha dan eq jashit raaq ajo piq sha baluk otho tolchak moq angna chammatakoi piq aa pattuk ngarey somlo ta.” 30Jesu aa ira batta chammatakoi aral eq bat chey ta, “Piq khom na anaan tsija atha.”

Jesu nu nia notang

(Matthew 12:46–50; Luke 8:19–21)

31Ethi jio Jesu nu nia no tang thuta. Ning aa himthal na ban eq Jesu tha tahal wang ta. 32Jesu relna daqhan miqtang tong ta, etho ning aa piq ma batta, “Siin u, ba nu nia no tang ba jamoq tachong ma himthal na ban aa.”

33Jesu aa thawel batta, “Utang inu aa? Utang ino nia pho tang aa?” 34Etho piq jamna tongtey tang ching konáng siin eq batta, “Siin inn! Inu, ino nia pho tang iri tang raa! 35Utang eq Shkewa tinuk mal somlo aa, ning raa inu, etho ino nia pho tang.”

Currently Selected:

Mark 3: Mmmm

Highlight

Copy