Mark 4
4
Uli wontey raaqshiton
(Matthew 13:1–9; Luke 8:4–8)
1Etho Jesu aa Galilee shitim kang na wey phang tatalta. Miqtang daqhan thajoq eq piq tha tim atho piq waqwan o qhun eq tong kata. Waqwan tha jung na angta etho miqtang thaji tha shitim kang na angta. 2Piq aa miqtang thima raaqshiton bat eq uphan raaq tatal kota.
3 “Tat inn! Takshey ashey miq ang aa tha pik náng uli tang won thima kata. 4Piq aa pikna uli tang tha won chey atho, chamtey tey uli tang tha lamna qhat ta etho wo tang thu eq tun tu chakta. 5Chamtey tey uli tha longkit na qhat ta, eshina buk aney angta. Uli tang tha kalo hapta, chammatakoi buk amaan sa angta. 6Etho rangsal tha thalat atho uli hapta tang tha qhuk tita chammatakoi uchíng sha awung náng wang moq angta. 7Chamtey tey uli tha su thamna qhatta, etho eshi tang tha tat phuk eq chaa atho sutham they qhipchak eq ti ta etho pol abang tha tingo moq angta. 8Etharin chamtey tey uli tang tha haq qhal haq na qhatta, etho hap eq cha eq tingo ta: chamtey tey bang na roktom, chamtey tey bang na roktharok etho chamtey tey bang na shashey tingo ta.”
9Etho Jesu aa raaqshiton tha sey thun batta, “Utang ma naq atha, tat inn!”
Raaqshiton eq chamma bat u
(Matthew 13:10–17; Luke 8:9,10)
10Jesu chen ang atho, uraaqshiton tat tey chamtey tey miqtang eq, ujiphantey asi ani jamoq thu eq raaqshiton lak eq bat ma batta. 11Jesu aa ning thima batta, “Shkewa mungtan hutshu raaq chamal aa ta nim ma usam eq ma kot aa. Etharin phetey miqtang shima raaqshiton mal hun ang aa tha bat kotching, 12irimal ang ajo,
‘Ning aa usiin eq chey na,
etharin baluk otho khi moq angna;
Ning aa utat eq chey na,
etharin chamtho sam moq angna.
Irimal ang moq ang ajo ning sha iching konáng ngik wangta,
etho ning aa tolchak kap wangta.’”
Uli wontey raaqshiton tha Jesu aa lak eq bat kot aa
(Matthew 13:18–23; Luke 8:11–15)
13Etho Jesu aa ning ma batta, “Nim aa iri raaqshiton ri jin sam min i? Eshimal ang ajo nim aa adak raaqshiton tang shi chamal eq jin sam nin? 14Uli wontey miq shey eq Shkewa raaq sha won aa. 15Chamtey tey miqtang tha lam na qhakta uli tang tha mal; ning aa Shkewa tung aa raaq tha tat eq kalo hun Thangwa thu eq eshi raaq tang sha som chuwan aa. 16Chamtey tey miqtang sha long na qhatta uli tang tha mal. Ning aa Shkewa tung aa raaq sha tat eq rapney sungrang aa. 17Etharin, Shkewa raaq ning tinmong náng wang moq tungkang o, ning tinmong na alo jin shing moq. Baluk otho Shkewa tung aa raaq tungkang o ning aa tsamnang etho tahikham rangham sey thu ajo, ning aa Shkewa sha kalo hun lakchak aa. 18Etho chamtey tey miqtang sha su tham konáng qhatta uli tang tha mal. Ning aa Shkewa raaq tat aa, 19etharin rollung tinthin etho lik aa ngin ma ramtey etho adak tangwang tathin tak eq iritang thaji raa Shkewa raaq khipchak aa etho ning chamtho tingo moq. 20Etharin chamtey tey miqtang raa pik qhalna qhatta iri uli tha mal. Ning aa Shkewa tung aa raaq tat eq, kam aa etho tingo ang aa; chamtey tey roktom, chamtey tey roktharok etho chamtey tey shashey tingo aa.”
Nalpang raaqshiton
(Luke 8:16–18)
21Etho Jesu aa batta, “Utang eq tho nalpang jung aa sha khowan eq hop shing moq, etho jibching khung na tho shing moq, esha taap na shing aa. 22Chamlang tapu shing aa, esha takhi angna etho chamlang hop shing aa, esha thalak angna. 23Utang ma naq atha, tat inn!”
24Piq aa ning ma iri mal tho ubat eq ta, “Chamlang tat inn iri tang ri jaqhal eq sam inn! Nim aa chamal eq miq ma khaphung kot nin, Shkewa tho nim ma irimal hun khaphung kot phanin, irináng eq tho ahan ang aa. 25Bari jakna atha aa ethi tey thima adak tho wey rap kot eq na, etho bari jakna ahung aa ethi tey jak thiwang bara anitom atha esha tho usom eq chuwan na.”
Uli chaat raaqshiton
26Jesu aa wey batta, “Shkewa mungtan raa irimal: miq ashey eq pikna uli tha won shing aa. 27Piq tha rangpal o ujib ang aa, etho rangney o adak dak jaksom somlo aa, etho ethi rangham tho ethi uli thiwang namthing thalat aa etho ethi namthing tha ajong sey ang chey aa. Etharin ethi uli wontey miq eq chamal ang aa tha sam moq. 28Haq eq hun uphuk sha thajong ma kot aa etho tingo angma kot aa. Etho upung jio anay nay uti ang aa etho uti tha minn eq chamti ma kalikta. 29Etho chamti tha sey min jio ethi miq sha ka eq chamkhan ching janqhi shey chambang sha khan aa chammatakoi cham tha ukhan tok sey angta!”
Jungqhang li raaqshiton
(Matthew 13:31–32,34; Luke 13:18,19)
30Jesu aa wey batta, “Shkewa mungtan chamal aa ta jin bat eq inn i? Chamal raaqshiton raaq eq eshi tung aa raaq bat inn? 31Ira jungqhang li chamal ang aa, eshimal hun. Jungqhang li raa iri mingkang thaji wang aming li; ashey miq shey jungqhang li som eq upik o won aa. 32Etho ethi uli tha ujong ang ajo, chambang wang eq tho ajong ang aa etho uking ujong ang aa etho eshi bang khung sho wo thu eq wotip jin hun eq aa.”
33Jesu aa miqtang thima irimal adak adak raaqshiton wang Shkewa raaq bat tan kota; ning aa chamtan jin sam aa ethi tan piq aa batta. 34Piq aa ning ma raaqshiton wang ang moq ang eq chamtho bat moq angta; etharin piq nia ujiphantey tang adak na ang tok o piq aa ning ma raaqshiton sha usam eq ma raaq eq battan kot aa.
Jesu aa rangpong thamang aa
(Matthew 8:23–27; Luke 8:22–25)
35Ethi rangja tho, Jesu aa ujiphantey tang thima batta, “Hiqtang shitim adak kang konáng ka i.” 36Etho ning ethina thajoq aa miqtang tha shingchak eq, Jesu bari waqwan o tong ta ethi waqwan wang tunshat eq shitim adak ko thináng kata. 37Sam moq pol o, rapney achan rangpong thuta etho jungkok jung tha waqwan mong thináng phang wang chey ta etho waqwan thina jung tha ushey sey angta. 38Etho Jesu tha waqwan jiko thina ang eq tokdang tha dang eq jib chey ta. Ujiphantey tang tha ka eq piq tha tathing eq batta, “Tatalteywa, hiqtang ngaptik angma ta i, nang aa amaan tho tathin mu i?”
39Jesu tunshat eq rangpong thima raaqkhat kota, “Umang sey ang u!” Etho piq aa jungkok thima batta, “Nak sey mo u!” Rangpong tha uthum sey angta etho chirin rin sey angta. 40Etho Jesu aa ujiphantey tang thima batta, “Nim chama itan cho inn? Nim ma thanga tho kam ahung i?”
41Etharin ujiphantey tang tha rapney chota etho ashey eq ashey ma batta, “Iri miq ri utang aa? Rangpong nia jungkok eq tho uraaq utat eq aa!”
Currently Selected:
Mark 4: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
