Mark 16

Jesu wey jey

(Matthew 28:1–8; Luke 24:1–12; John 20:1–10)

1Sabbath saal thun jio, Mary Magdalene etho James nu Mary etho Salome aa atim angam ri eq màng o jik rangma kata. 2Saal shey rangnap kha o rangsal qhit atho ning haqbung mong náng wangta, 3Lam o ning aa batta, “Hiqtang ma haqbung wang long kalung shi utang eq thum ko phani?” 4Etharin ning ethináng thu atho long tha jakho wang hun lakchol khita, eshi long sha ajong angta. 5Ning haqbung mong náng nop atho ashey jaro miq rapney apung samkhong sam eq aqha kona tong atha khita; esha siin eq ning rapney chota.

6Ethi miq they batta, “Nak cho inn. Nga usam eq phang, nim aa bólq na tita Nazareth Jesu tha bi inn i. Piq irina ahung; piq wey jey angta. Siin inn, ning aa piq tha irina shingta. 7Thanga Peter etho adak ujiphantey tang ma ka eq bat inn, piq aa batta thimal hun nim jakho piq Galilee náng kana; etho ning aa piq tha eshina hun chong na.”

8Ning cho nia patja eq haqbung wang jol eq thalat chuwang ta. Ning ucho ang eq utang ma tho chamtho bat moq angta.

Chamtey tey tungtang na rimal taka aa tha atha

Jesu Mary Magdalene jamoq tachong aa

(Matthew 28:9,10; John 20:11–18)

9Jesu ti eq wey jey jio, saal shey rangnap kha o, Mary Magdalene jamoq tachong ta; piq hanphung wang Jesu aa sanath thangwa tang eq rum atha jakho tok tho phan kota. 10Piq ka eq unokwa tang ma, bari tang tintashit eq qhapta, ning ma thaji raaq batta; 11Jesu wey jey angta etho piq aa Jesu tha khita ta tat atho ning aa hanmoq angta.

Jesu wani ujiphantey jamoq tachong aa

(Luke 24:13–35)

12Ethi jio, Jesu wani ujiphantey adak adak ma eq qhim náng wang ching lam na tachong ta. 13Ning thu eq ethi raaq tha adak jiphantey tang ma batta, etharin ning aa hanmoq angta.

Jesu wasi washey jamoq tachong aa

(Matthew 28:16–20; Luke 24:36–49; John 20:19–23; Acts 1:6–8)

14Ethi jio, wasi washey ujiphantey phaksat phaksa atho Jesu thuta. Ning aa han moq ta Jesu ning ma khata chammatakoi piq wey jey khita ta miq dak tang aa bat atho ning aa hanmoq angta. 15Piq aa ning ma batta, “Thaji mingkang náng ka inn etho thaji miqtang ma tungtang aqhal phanchan inn. 16Bari miqtang aa han eq junglam ajo ulun angna, etharin baritang aa hanmoq ang aa ning aa tsamnang kap na. 17Etho uhan miqtang aa patja jaksom somlo eq takhima tarong kap na; imiing o ning aa thangwa eq rum aa sha jin phan eq na; etho anal raaq raaq na; 18Ning aa pu sha tunsom ajo tho etho shomling ajo tho chamtho ang moq angna; ning aa atakasa miq kho o jak shing ajo tak sha uqhal angna.”

Jesu mungtan náng tunsol aa

(Luke 24:50–53; Acts 1:9–11)

19Teyhungwa Jesu ethi raaq tang bat kot jio, piq tha mungtan náng tun solta etho Shkewa jakqha kona tong ta. 20Ujiphantey tang ka eq ethi thaji raaq tang tha thaji haqna phanchan kota, etho Teyhungwa ning jamoq jaksom lot somlo ta etho ning phanchan sha asing ta patja jaksom tungkang o takhita.

Currently Selected:

Mark 16: Mmmm

Highlight

Copy