Mark 15

Jesu Pilate jakhona

(Matthew 27:1,2,11–14; Luke 23:1–5; John 18:28–38)

1Rangnap kha o ajong tingwa tang, miqlang tang, thong tataltey tang etho thaji rong miqtang kashey lam o raaq kara eq, Jesu tha janru eq qhak eq Pilate relnáng solkat ta. 2Pilate aa piq ma pitta, “Nang Jehudi tang lungwang i?”

Jesu aa raaq thawel batta, “Nang aa hun bat u.”

3Ajong tingwa tang aa Jesu raaq daqhan aja raaq batta. 4Ethi rangma Pilate aa piq ma wey batta, “Nang aa raaq thawel bat mu i? Tat u, ning aa nangma chamlang ta bat aa!”

5Etharin Jesu shushu tong ta, esha siin eq Pilate rapney patja ta.

Jesu tha utik ma shing aa

(Matthew 27:15–26; Luke 23:13–25; John 18:39—19:16)

6Pangwet Ulit kut aa kan o miqtang ma pit eq Pilate aa ashey miq tha tolchak eq chuk wang qhap chey roq eq ta. 7Ethi pang tho, chukna Barabbas ta miing aa ashey miq angta, bara thamol eq miq tatik chakta. 8Etho miq waan thajoq atho, Pilate aa qhap chak aa thimal miq ashey qhap chak ma chuta. 9Pilate aa ning ma pitta, “Nim aa Jehudi lungwang qhap ma tathin inn i” 10Piq aa usam eq ta, ajong tingwa tang aa Jesu ma ngel eq piq jaknáng kochak ta.

11Etharin, ajong tingwa tang aa miqtang thima Barabbas tha qhap rangma chu ma batta. 12Pilate miqtang ma wey pitta, “Etha ang ajo, nim aa Jehudi lungwang ta hal inn iri miq ri nga chamal eq ching ta bat phin?”

13Ning thaji rapney jajong wang ring eq batta, “Bólq na botchak u!”

14Pilate aa pitta, “Etharin piq aa chamlang thaja ta?”

Ning ethiwang eq tho jajong wang ring eq batta, “Bólq o botchak u!”

15Pilate aa miqtang tha tasungrang rangma tathinta, ethi rangma Barabbas tha qhap chakta. Piq aa Jesu tha rikang wang thawat jio bólq o bot chakma kochak ta.

Ralkoltey tang aa Jesu junnam aa

(Matthew 27:27–31; John 19:2,3)

16Chamteytey ralkoltey tang aa Jesu tha Governor himthal náng solkat eq adak ralkoltey tang tha tho halta. 17Ning aa Jesu ma ashey asim khat tasam ta, etho piq kho o sut khopok tapok ta. 18Etho piq jakho náng ka eq junnam eq batta, “Jehudi lungwang, alo tong u!” 19Etho iri jio, ashey ajan langphung kantha som eq ukho o wat ta, piq tha thukta, etho ning ni ning langku o tong eq piq jakho o haq náng bonta. 20Ning thana eq ujung sey ang atho, ning aa Jesu hanphung wang asim samkhong tha chokchak ta etho piq samkhong tha hun piq ma tasam kota. Ethi jio ning aa piq tha bólq náng bot chakma solkat ta.

Jesu tha botchak aa

(Matthew 27:32–44; Luke 23:26–43; John 19:17–27)

21Lam na, ning aa Simon ta miing aa ashey miq tha chongta, bara qhimwang kachey tapha, etho ralkoltey tang aa lo eq piq ma Jesu bólq tha ta som ta. Simon tha Cyrene miq angta, etho Alexander etho Rufus wa angta. 22Ning aa Jesu tha Golgotha ta miing aa ashey haq náng solkat ta, Golgotha ta “Miq kho ràng haq.” 23Ning aa ethina Jesu ma sutichi jamoq myrrh ta miing aa ashey shom thaling ma tathin ta, etharin Jesu aa ling moq angta. 24Ethi jio ning aa Jesu tha bólq na botchak ta, etho piq samkhong tha ning jaktung o phal ma ton ta. 25Etho ning aa Jesu tha bot chakma tun atho ethi rangham tho rangnap nari akhu rangham angta. 26Piq bólq rangkho tho piq jashit jaksom lot tang batta tha taka angta, “Jehudi Lungwang” 27Jesu jamoq jashit somtey wa ni bólq o botchak eq tun ta, ashey tha piq jakqha kona etho ashey tha piq jakqhit kona. 28Asang likwit na bat aa, “Piq sha tho miq duktey jamna wet ta” etho iri tung araaq raa asing ang ching, chammatakoi itung araaq taka aa sha asing thu phana.#15:28 Chamtey Greek likdap tang na verse 28 ahung.

29Ethiwang lingqhing tey miqtang aa Jesu tha siin eq kho tha thamot eq junnam eq batta: “Nang aa rangnuk him raa thakchak eq saltom mong o wey hun ko phanáng ta battu! 30Thanga bólq wang thalat eq ka eq náng ni náng lun u!”

31Ethimal hun, ajong tingwa tang etho thong tataltey tang aa tho piq tha ngit eq ashey eq ashey ma batta, “Piq aa adak miqtang thalun ta, etharin nang ni nang rangma jin thalun mu! 32Usiin eq ni, Israel lungwang Messiah thanga bólq wang haq náng jinkat ang phana tia jin ka phamoq angna; jinkat angta pha ta ang ajo hiqtang aa piq raa uhan eq ni!”

Irimal wang hun ethi ani miq tha tho, bara Jesu jamna bólq na angta, ning ni atho piq ma tikngit eq ta.

Jesu ti aa

(Matthew 27:45–56; Luke 23:44–49; John 19:28–30)

33Rangney wang tha rangja tángko náng thula eshi mung shina ráng tha nakta. 34Rangja rangham atom angta tho, Jesu jajong aa ring eq batta, “Eloi, Eloi, lema sabachthani?” Ta, “I Shkewa, I Shkewa, nang aa chamma nga ri shingchak phu?”

35Ethina tongtey miqtang wang chamteytey miqtang eq esha tat eq batta, “Tat inn, piq aa Elijah tha hal aa!” 36Ashey miq jol eq khat tom tha thangkum sutichi o tacham eq kantha tho qhak ta etho Jesu nungrel thináng tatko eq etho batta, “Lang u! Tatsiin i, Elijah thu eq piq ri bólq wang takat eq na tia takat moq angna!”

37Jesu rapney jajong wang ring eq tita.

38Etho, rangnuk him mong wang khatlo tapak chey aa tha aluk wang anim náng taching eq ani ma angta. 39Bólq relna bangchey tey ralkoltey tang solwa eq Jesu chamal eq ring eq tita tha khita. Piq aa batta, “Asing wang hun iri miq raa Shkewa Miqwasa angta!”

40Chamteytey miqnu tang atho alo wang lang eq siinta. Ning jaktung na Mary Magdalene, James nia Joseph nu Mary etho Salome angta. 41Jesu Galilee na ang tok wang hun ning piq jiji na angta etho piq tha nong ta. Piq jamoq Jerusalem náng thuta adak daqhan miqnu tang tho ethina angta.

Jesu tha bung aa

(Matthew 27:57–61; Luke 23:50–56; John 19:38–42)

42Etho ethi saal tha nángtong saal rangma taqhal may shing ching saal angta. Rangja sey ang atho, 43Arimathea wang Joseph eshináng thuta. Piq rong ajong tang wang ashey miq angta etho piq aa Shkewa mungtan rangma banta. Piq cho hunga Pilate relnáng thuta etho Jesu màng tha chuta. 44Jesu tita ta tat eq Pilate patja angta etho ralkoltey tang solwa tha hal eq Jesu tita thi alo ti arel sey ta pitta. 45Ralkoltey tang solwa raaq tat jio, Pilate aa Joseph ma Jesu màng tha kochak ta. 46Etho Joseph anal khat ri eq thok somta etho Jesu màng tha bólq wang anim náng somta etho anal khat wang thup eq, long tha tapo eq umàng tha ubungmong na shingta. Etho longbing kalung tho ajong ashey long tachik shingta. 47Alo wang Mary Magdalene etho Joseph nu Mary, Jesu màng thi bari na shingta ta siinta.

Currently Selected:

Mark 15: Mmmm

Highlight

Copy