Mark 14

Jesu tha thaman ma tathin aa

(Matthew 26:1–5; Luke 22:1,2; John 11:45–53)

1Ulit kut aa kan etho wung moq phan kut aa kan angma saalni sey tong ta. Ajong tingwa tang etho thong tataltey wa tang eq Jesu tha shushu eq lo eq tatik ma lam bita. 2Ning aa batta, “Hiqtang aa kut aa kan tok o imal som ching ang moq. Irimal ang ajo thaji miqtang aa jashit kap na.”

Jesu Bethany na jik aa

(Matthew 26:6–13; John 12:1–8)

3Jesu tha Bethany na Simon him na angta, piq jakho haankhup tak angta. Jesu phaksat phaksa atho ashey miqnu eq, tung o nolhung atim angam chi thok som ta. Piq aa ethi atim angam tung tha tapan chak eq thaji atim angam chi tha Jesu kho tho jik kota. 4Ethina tong aa adak miqtang esha siin eq rapney kha eq batta, “Iri atim angam ri chamma imal taphak wang aa. 5Iri atim angam raa akum sey akum shatom hun acha nginti sang eq tangshit miq tangma jin nong eq wang ta!” Etho piq ma rapney khatta.

6Etharin Jesu aa batta, “Piq ma chamtho nak bat u! Chamma piq ma kha u? Piq aa i rangma rapney jaqhal jaksomlot somlo aa. 7Nim jamna salwet tangshit miqtang angna etho nim aa baluk o tho ning sha unong eq nin. Etharin nga nim jamoq salwet tong mong ang náng. 8Piq aa chamlang jin somlo aa tha hun somlo ta; nga utik tok o bung rangma piq aa jakho ngama atim angam jit kota phang. 9Nga nim ma asing batphang, iri mingkang ro barina tungtang qhal raaq sha bat ko ajo, piq aa som ta raaq sha tasik eq na.”

Judas aa Jesu thalot ma raaq aa

(Matthew 26:14–16; Luke 22:3–6)

10Ethi jio Judas Iscariot, bara wasi wani jiphantey tang jaktung wang ashey angta, piq aa ajong tingwa tang jamnáng ka eq Jesu thalot ma nim ma kot phanáng ta raaq ta. 11Esha tat eq ning sungrang angta etho piq ma ngin kot ma batta. Ethiji wang, Judas aa Jesu thalot rangma lam bita.

Ujiphantey tang jamoq uthun Ulit phaksat

(Matthew 26:17–25; Luke 22:7–14,21–23; John 13:21–30)

12Wung moq phan kut aa kan saal kho tho, ethi saal tho Ulit kut aa kan rangma kelwut sa duk aa, Jesu ujiphantey tang aa piq ma pitta, “Nang aa ima barina ulit kut aa kan taku kan pha nu?”

13Etho Jesu aa ujiphantey wa ni ma ira bat eq takat ta. “Samhaq náng ka inn jo nim aa ashey miq jung hol eq ka atha khi nin. Piq jiji o ka inn, 14etho piq bari himnáng wang aa nim tho ethi himnáng wang eq ethi him tangteywa ma bat inn, ‘Tatalteywa batta, winwa himmong o nga etho i ujiphantey Ulit kut aa kan kut kan ni i?’ 15Etho iri miq re nim ma aluk ashey himmong takhi pha nin, bari katáng ro thaji jaqhal ang atha khi nin.”

16Ethi ani ujiphantey samhaq náng ka eq, Jesu aa chamal batta thimal hun thaji ang atha khita, etho ning aa ethina Ulit kut aa kan phaksat limta.

17Etho rangja angta, etho Jesu ujiphantey wasi wani tha sol eq ethi náng thuta. 18Ning phaksat eq ma tong atho Jesu aa batta, “Nga bat phang, nim jaktung wang ashey nga raa thalot phanáng.”

19Ethi raaq tha tat eq thaji ujiphantey rapney tin tashit ta etho ashey jio ashey Jesu ma pitta, “Eshi nga i?”

20Jesu aa batta, “Nim wasi wani jaktung wang ashey eq nga raa thalot phanáng; piq aa i jamoq phaksat rum phaksat aa. 21Asang likwit na chamal bat aa, Miqna Sa irimal wang tina; etharin bari miq eq Miqna Sa thalot na, piq rangma chamtan tsamnang angna! Piq chang moq angta jo aqhal ang wang ta!”

Teyhungwa Phaksat

(Matthew 26:26–30; Luke 22:14–20; 1 Corinthians 11:23–25)

22Ning phaksat phaksat atho Jesu aa ashey banlo tha somta, Shkewa ma kechu ajong kota, esha pin eq ujiphantey tang ma ko eq piq aa batta, “Iri som inn; ira ihanngam.”

23Ethi jio piq aa ashey kok somta, Shkewa ma kechu ajong kota, etho ning ma kota; etho ning thaji aa ethiwang ling ta. 24Jesu aa ning ma batta, “I raa i tahi, bara daqhan miqtang rangma tasal aa, itahi wang Shkewa nia miqtang jaktung o raaqkhak raa tharong aa. 25Nga nim ma asing batphang, nga Shkewa mungtan náng wang eq anal sutichi ling moq nángduk, nga baluk otho sutichi raa ling mong ang náng.”

26Ning Shkewa tasapsey sungsey ta etho Mount Olive kan náng kata.

Jesu aa Peter ma tóng aa

(Matthew 26:31–35; Luke 22:31–34; John 13:36–38)

27Jesu aa ning ma batta, “Nim thaji nga raa shingchak eq jolchu wang nin chammatakoi Asang likwit na bat aa, ‘Shkewa kelwut rimtey miq sha tatik chakna etho kelwut tang thaji adak adak haq náng jolchu wang na.’ 28Etharin nga wey jey jio, nim jakho o Galilee náng kanáng.”

29Etho Peter aa batta, “Thaji miqtang aa nang raa shingchak eq jolchu wang ajo tho nga nang raa baluk otho shingchak pha moq ang pha náng!”

30Jesu aa Peter ma batta, “Nga asing bat phang, thaney rangpal o hun, wo takni wal wey moq jakho, nga piq raa sam mong ta náng aa taktom batnu.”

31Peter aa raaq tharong eq batta, “Nga utik angma ang ajo tho, baluk o tho irimal bat mong ang náng.”

Adak jiphantey tang aa tho irimal batta.

Jesu Gethsemane na romtam chu aa

(Matthew 26:36–46; Luke 22:39–46)

32Ning Gethsemane ta miing aa ashey haq náng thok jio, Jesu aa ujiphantey tangma batta, “Nga romtam chu eq thu wey phamong nángduk iro tong inn.” 33Piq aa ujamoq Peter, James etho John tha solta. Piq tinmong na rapney tsamnang eq utin rapney shit ta. 34Etho piq aa ning thima batta, “Utik mal i tin rapney shit aa. Nim iro hun tong inn etho i jamoq rok thing phin.”

35Piq chomrey ka eq, haqna tong eq romtam chu eq batta, “Ujin eq ujo ngama iri tsamnang tang ri nak kot phu.” 36Piq aa romtam chu aa, “Iwa, nang aa thaji jin som eq u. Iri tsamnang kok ri nga wang tahang chak u. Etharin, nga chamal tathin ang shimal ang moq, nang aa chamal tathin u shimal hun som u.”

37Etho piq wey wel atho atom jiphantey ujib ang atha khita. Piq aa Peter ma batta, “Simon nang ujib ang u i? Nim tom aa chomwey sa tho jinban min i? 38Tari o qhat moq angma ban eq romtam chu inn. Nim tsija kacha ang aa etharin hanngam wang jin ang moq.”

39Piq wey ka eq ethi raaq tha hun romtam wey chuta. 40Takshey wey wel atho piq aa ning ujib ang atha khita chammatakoi ning miik tha mey takal moq angta. Etho piq ma chamlang ta bat ching tha, ning aa sam moq angta.

41Piq taktom wey wel eq thuta, etho piq aa ning thima batta, “Nim jib ro sey ang inn i etho nángtong ang inn i? Lali sey! Rangham thupha! Siin inn, Miqna Sa tha ngarey miqtang jaknáng kochak na. 42Shat inn! Hiqtang ka i. Siin inn, nga thalottey wa tha i relnáng sey ka pha.”

Jesu thalot

(Matthew 26:47–56; Luke 22:47–53; John 18:3–12)

43Jesu aa raaq batchey atho, Judas, bara wasi wani mong wang ashey angta, ethináng thuta. Ajong tingwa tang, thong tataltey tang etho miqlang tang aa takatta miqtang, ning jamna jantong etho kantha som eq thuta. 44Sangchak tey miq eq ethi miqtang thima bat shing ta, “Bari sham ro nga tsip ang, nim aa piq sha hun lo eq sol chuwan inn.”

45Kalo hun Judas ethináng Jesu relnáng thu eq batta, “Tataltey wa!” Etho piq tha tsip ta. 46Etho ethiwang tongtey miqtang aa Jesu tha lo eq qhakta. 47Etharin ethina tongtey ashey miq jantong lat eq, ajong tingwa tang qhawa na tha qhanchakta. 48Etho Jesu aa ning thima batta, “Nim aa nga ri ashey rapney ajong ahut lottey mal jantong nia kantha som eq chamma lot ma thu phin? 49Saalwet Rangnuk him na nga nim jakho o lang eq raaq bat taphang, etharin nim aa utang atho nga lopha min ang taphin. Etharin, Asang likwit na chamlang taka aa ira asing hun ang ching.”

50Ethi jio, thaji jiphantey tang aa piq tha shingchak eq jol chuwang ta.

51Ashey jaro miqwa khatnup chen chen sam eq Jesu ji phanta. Ralkoltey tang aa piq tha tho lo aa tho, 52piq khatnup tha ethina shingchak eq haansang ang eq jolchu wangta.

Jesu sha Jehudi rong jakho na

(Matthew 26:57–68; Luke 22:54,55,63–71; John 18:13,14,19–24)

53Ethi jio Jesu tha ajong tingwa tang solwa himnáng solkat ta, bari haq sho thaji ajong tingwa tang, miqlang tang etho thong tataltey tang thajoq ta. 54Alo wang, Peter ji jio thu eq ajong tingwa tang solwa himthal o langta. Ethina piq ralkoltey tang jamoq wal relnáng thalom ma tong kata. 55Himmong tho, ajong tingwa tang etho Jehudi rong miqtang Jesu tha tatik rangma chamli chamlang tashit eq ma bita, etharin ning aa chamtho tashit atha kap moq angta. 56Daqhan miqtang Jesu rangma alik akuk raaq batta, etharin ning raaq tha kara moq angta.

57Etho chamtey tey miqtang aa tunshat eq Jesu rangma ira alik raaq batta: 58“Piq aa batta tha í aa utat eq ti, ‘Miqtang aa hunta iri rangnuk him raa nga uthak eq chak náng, etho saltom o nga iri rangnuk him raa wey hun kot náng, bara miq wang hun aa sha ang moq angna.’” 59Etharin, imal ang ajo tho ning raaq tha kara moq angta.

60Etho ajong tingwa tang solwa aa thaji miqtang jakho o lang eq Jesu ma pitta, “Ning aa ba rangma chamlang ta bat aa, nang aa iritang raaq thawel bat mu i?”

61Etharin Jesu raaq ashey tho raaq hunga shushu eq langta. Etho ajong tingwa tang solwa aa wey pitta, “Nang Shkewa Miqwasa Khristo i?”

62Jesu aa batta, “Nga ang ang, etho Miqna Sa Shkewa jakqha kona tong eq etho Mungtan wang phun jamoq ka eq nim aa khinin!”

63Etho ajong tingwa tang solwa aa piq samkhong tha ching chak eq batta, “Hiqtang ma miqdak miq miikkhi tey ràa mo sey! 64Piq aa Shkewa miiksuk eq chamlang ta batta tha nim thaji aa tat eq tin! Thanga nim aa chamlang eq ma nuk inn?”

Ning thaji aa Jesu raa tatik hun eq ching ta batta.

65Ethina tong aa chamteytey miqtang aa piq tha phang thuk ta, etho chamtey tey miqtang aa piq miik o qhak eq usham o bangwat eq batta, “Raaqtong u, utang eq nang wat taphu?” Ethi jio bantey tang aa piq tha solkat eq watta.

Peter aa Jesu raa sam mong ta lik aa

(Matthew 26:69–75; Luke 22:56–62; John 18:15–18,25–27)

66Peter himthal na tong chey atho ajong tingwa tang solwa ashey qhanu ethináng thuta. 67Piq aa Peter tha walrel na thalom eq tong aa tha khi eq batta, “Nang tho Nazareth Jesu jamna angtu.”

68Etharin piq aa ang mong ta batta, “Nga sam mong; nang aa chamlang ta bat u nga jin sam mong.” Piq esha bat eq ethiwang tunshat eq jakho náng kata. Etha tho ashey wo walta.

69Ethi qhanu they piq tha khi eq ethiwang tongtey adak miqtang thima batta, “Iri miq raa piq miq angta!” 70Etharin Peter aa ning thima piq raa sam mong ta wey batta.

Anitom jio ethina tongtey miqtang aa piq ma batta, “Nang tho Galilee mung wang, ethi rangma nga piq raa sam mong ta nak bat u!”

71Etho Peter aa batta, “Nga rangtum eq batphang, nga asing batphang, nga hutdip eq taphang ta ang ajo Shkewa nga cham tatsam phang! Nim aa utang miq raaq bat inn, nga piq raa sam mong!”

72Khakla ashey wo jukni sey wey walta, etho Peter aa Jesu raaq tasik ta, “Wo takni wal jakho nang aa nga raa sam pha mong ta taktom bat nu.” Etho piq tin tha tashit eq rapney qhapta.

Currently Selected:

Mark 14: Mmmm

Highlight

Copy