Mark 10
10
Jesu aa wapak kho tung araaq tatal aa
(Matthew 19:1–12; Luke 16:18)
1Etho Jesu aa ethi haq tha shingchak eq, Jordan jungku tha jan eq Judea mung náng thuta. Ethina daqhan miqtang piq jamoq tachong ma thuta, etho thaji haq na ang aa thimal hun, piq aa ning ma tatalta.
2Chamtey tey Phorisi tang eq piq sha tari rangma piq jamnáng thuta etho ning aa pitta, “Hiqtang thong na miqwa miqnu wapak jin kho eq na tia jin kho moq angna?”
3Jesu aa pitta, “Moses aa nim ma chamlang raaqkhat kota phin?”
4Ning aa thawel batta, “Moses aa batta, ashey miqwa eq lik ali jin kaa jio piq himteynu sha jin shingchak eq aa.”
5Jesu aa ning thima batta, “Moses aa nim ma irimal thong kota phin chammatakoi nim tin sha rapney tsey ta. 6Etharin Asang likwit na taka thimal, phang tho ‘Shkewa miqwa nia miqnu hunta’. 7Etho ethi rangma ‘Ashey miqwa eq unu nia uwa sha shing chak eq uhimteynu jamoq kara tong na, 8etho ning ni ashey sey angna. Ethi rangma ning ni sha ani ang moq, ning ni ashey sey angna’. 9Ethi rangma bara Shkewa tachap ta, miq eq esha adak adak phal chak ching ang moq.”
10Ning ethiwang thalat eq himnáng ka atho, ujiphantey tang eq Jesu ma ethi tung aa raaq tha pitta. 11Piq aa ning thima batta, “Ashey miqwa eq piq himteynu sha shingchak eq adak miqnu wey kap ajo piq aa himteynu rangma sathuk jaksom lot som aa; 12Ethimal hun, ashey miqnu eq uhimteywa sha shingchak eq adak miqwa jamoq wey tharikta ta ang ajo piq aa tho sathuk jaksom som aa.”
Jesu aa nijang sa tang sunmaan aa
(Matthew 19:13–15; Luke 18:15–17)
13Chamtey tey miqtang eq ning sa tang tha Jesu jak nijang sa tang kho o lot rangma piq relnáng thoksolta, etharin ujiphantey tang ethi miqtang thima khata. 14Etho Jesu aa esha khi eq, piq tinkha eq ujiphantey tang thima batta, “Nijangsa tang ri irelnáng katma ko inn, etho ning ri nak táng inn, chammatakoi Shkewa mungtan sha ning mal miqtang ma hun angna. 15Nga nim ma asing eq bat kot taphang, utang eq Shkewa mungtan sha nijang sa mal tunsol min ang inn jo, piq baluk o tho eshináng nop moq angna.” 16Etho piq aa nijang tang tha tun solta, ning kho thina jakshing eq ning thima sunmaan kota.
Tanglom miqwa
(Matthew 19:16–30; Luke 18:18–30)
17Jesu tunshat eq ukat angma ang atho, ashey miq jol eq piq jakho na langku o tong eq piq ma pitta, “Aqhal tatalteywa, pattuk rollung kap rangma nga chamlang som ching aa?”
18Jesu aa piq ma pitta, “Nang nga ma cham ma aqhal ta raaq phu? Shkewa sha dak chak eq utang tho qhal moq. 19Nang aa raaqkhat usam eq u i miq nak tatik u; sathuk jaksom nak som u; hut nak hut u; jashit tinthin hol eq miq ma nak siin u; nak kaling ka u; ba nu ni wa ma rangka u.”
20Iri miq rey batta, “Tatalteywa, nijang tok wang duk hun nga iri thaji raaqkhat raa tat eq qhangchey phang.”
21Jesu tinmat wang eq piq chingko náng siin eq batta, “Nang aa ashey dang hun jaksom somlo ching. Ka eq ba lik angin tang shi sangchak eq tangshit miqtang ma kochak u, etho mungtan na nang aa lik angin kap nu; ethi jio nang iji o kaphu.” 22Etharin ira tat eq ethi miqwa tha shuru tik angta, etho piq rapney tinjung eq ethiwang qhing chuwang ta chammatakoi piq rapney tanglom miq angta.
23Jesu ngik lang eq ujiphantey tang ching konáng siin eq batta, “Tanglom miqtang sha Shkewa mungtan náng nop ma rapney hal aa!”
24Etharin tat eq ujiphantey tang rapney patja ta, etharin Jesu aa batta, “I sa tang, Shkewa mungtan náng nop ma rapney hal aa! 25Ashey tanglom sha Shkewa Mungtan náng nop náng eq, ashey utt sha mitkat po na thalin sha achol angna.”
26Etharin tat eq ujiphantey tang rapney patja ti eq, ning ni ning jaktung o tapit pita, “Irimal ang ajo, utang jin lunna?”
27Jesu aa ning chingko náng siin eq batta, “Ira miqtang ma jin ang moq etharin Shkewa ujin eq aa; Shkewa thaji jin som eq aa.”
28Etho Peter aa batta, “Siin u, í aa thaji shingchak eq ba jio kataphi.”
29Jesu aa ning ma batta, “Nga nim ma asing eq bat phang, utang eq i rangma nia tungtang qhal rangma uhim sha tia uno tang nia una tang sha tia nu nia wa sha tia usa tang sha pik nia haq tang sha shingchak ajo, 30piq aa juk shashey him, uno tang nia una tang, nu nia wa, usa tang, pik nia haq tang iri thaji sha tahikham jamoq iri mungna kap na etho pattuk rollung tho ukap eq na. 31Etharin thanga jakho na angtey miqtang wang chamtey tey sha jina angna etho thanga jina angtey tang wang chamtey tey tang sha jakho na angna.”
Jesu aa utik tung aa raaq bat aa
(Matthew 20:17–19; Luke 18:31–34)
32Jesu etho ujiphantey tang Jerusalem konáng kata. Jesu jakho kho kata etho ujiphantey tang patja angta etho piq jina kattey miqtang thaji tin chota. Jukshey Jesu aa wa asi wani ujiphantey tang ning chen chen hal eq piq rangma chamlang angma ta tha batta. 33Piq aa ning ma batta, “Hiqtang Jerusalem náng kat jio, ajong tingwa tang etho thong tataltey tang thaji kara eq Miqna Sa sha lo na. Ning aa piq sha tatik ma shingna etho Gentile tang jaknáng kochak na. 34Ning aa piq sha tikngit kungna, tikthuk na, uwat eq na etho tatik eq chakna; etharin saal tom jio piq wey jey angna.”
James ni John raaq bat
(Matthew 20:20–28)
35Etho Zebedee sa ani miqwa James nia John sha Jesu relnáng thuta etho ning aa batta, “Tatalteywa, ini nong phu.”
36Jesu aa ning ma pitta, “Chamlang aa?”
37Ning aa wey batta, “Nang baluk o lungwang ang eq tong ujo, ini ri ba jamoq tatong ma kophu, ashey ri bajakqha ko o etho ashey ri bajakqhit ko o.”
38Jesu aa ning ma batta, “Nim aa chamlang chu phin tha sam min. I tsamnang kok wang nim aa jin ling eq nin i? Etho nga junglam tang thimal nim aa jin lam eq nin i?”
39Ning aa batta, “Í aa jin lam eq ni.”
Jesu aa ning ma batta, “I tsamnang kok wang nim aa jin ling eq nin etho nga junglam tang thimal nim aa jin lam eq nin. 40Etharin ijakqha ko o utang tong na etho ijakqhit ko o utang tong na sha nga jin bat phamong. Shkewa utang ma kacha shing ta eshi miq shey hun eshi katáng sha kapna.”
41Adak asi ujiphantey tang eq James ni John raaq tha tat eq ukhat angta. 42Ethi rangma Jesu aa thaji ujiphantey tang arum aa hal eq batta, “Nim aa usam eq inn, Gentile tang lungwang tang aa tarong jamoq som aa, etho ning solwa tang aa ning sha damnak aa. 43Etharin nim jaktung irimal ang moq. Nim jaktung wang chamtey tey thaji wang ajong angma nuk ajo, piq sanga ma ang ching. 44Etho chamtey tey jakho o tong ma nuk ajo piq sha thaji ma qha ang ching. 45Chammatakoi, Miqna Sa adak miq wang nong kap ma kapha moq angta, etharin piq aa unong eq ma katapha, etho daqhan miqtang sha thalun rangma, urollung sha kot ma katapha.”
Jesu aa miikduk Bartimaeus tha taqhal aa
(Matthew 20:29–34; Luke 18:35–43)
46Etho ning Jericho náng thuta, etho Jesu nia ujiphantey tang etho daqhan miqtang eshi samhaq tha shingchak eq ka chey atho, Timaeus miqwasa Bartimaeus ta miing aa ashey miikduk dantuntey lam kang na dan chu chey ta. 47Piq aa Nazareth wang Jesu ethi wang kata ta sam eq, jajong aa ring eq batta, “Jesu! David Miqwasa! Nga ma tinshit phu!”
48Daqhan miqtang piq ma nak ring u ta khak ta, etha otho piq ethi náng eq tho jujong jong wang uring angta, “David Miqwasa! Nga ma tinshit phu!”
49Jesu tanglang eq batta, “Piq shi hal inn!”
Ning aa piq tha halta etho batta, “Nak cho u! Tunshat u, piq aa nang hal aa!”
50Piq aa khatnup tha bikchak eq, jol eq Jesu relnáng kata.
51Jesu aa piq ma pitta, “Nang ma iching wang chamlang ràa aa?”
Ethi miq they batta, “Tatalteywa, nga wey khi eq ma nuk ang.”
52Jesu aa piq ma batta, “Ka u, ba kam wang nang qhal tu!”
Jaktha piq aa ukhi sey ta, etho piq aa Jesu jiji phan ta.
Currently Selected:
Mark 10: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
