Mark 9

1Etho Jesu aa ning ma batta, “Nga nim ma asing batphang, Shkewa mungtan tarong wang kat ukhi náng duk irina langtey tang wang chamtey miqtang ti moq angna.”

Jesu hanphung kaley

(Matthew 17:1–13; Luke 9:28–36)

2Saal tharok jio, Jesu aa Peter, James etho John tha sol eq ashey aluk haqkang kho thináng kata; eshina ning chen angta. Ning relna Jesu hanphung tha kaley ta, 3etho usamkhong tha rapney pung ta; iri mingkang ro likmun ti eq tho itan jin tapung qhot moq. 4Ethi jio Elijah nia Moses eshina thu eq Jesu jamoq raaq wan ta tha ning tom aa khita. 5Peter aa Jesu ma batta, “Tataltey wa, í iri na tong iri aqhal i! Í aa irina atom bulang taap hun kophi, ashey ba rangma, ashey Moses rangma etho ashey Elijah rangma.” 6Atom ujiphantey tang ucho angta, ethi rangma Peter aa chamta batta tha sam moq angta.

7Etho phun ka eq ning tha tathuk chakta etho phun wang ashey raaq kap tatta, “Ira i Miqwasa, barima nga tinmat ang; piq raaq shi tat inn!” 8Kalo hun ning aa ngik lang eq siin atho ethina Jesu chen etho adak utang tho ahung angta.

9Ning haqkaan wang anim náng juchey ta rangham tho, Jesu aa ning thima batta, “Miqna Sa ti eq tunshat wey moq ling, nim aa chamlang khi tin shi utang ma tho nakbat inn.”

10Ning aa uraaq tha utat eq ta, etharin ning tom jaktung na tapit pita, “Ti eq wey tunshat wey moq nángduk, ethi raaq shi chamlang aa?” 11Etho ning aa Jesu ma pitta, “Elijah sha jakho thuk ching angna ta thong tataltey tang eq chamma bat chey aa?”

12Piq aa ning thima batta, “Ira asing, thaji wey karok raa rangma Elijah jakho thupha na. Etharin Asang likwit na chamma irimal bat aa, ‘Miqna Sa rapney tsamnang kapna etho thaji eq piq sha shingchak na?’ 13Etharin nga nim ma bat phang, Elijah thuta pha, etho Asang likwit na piq rangma wit aa thimal miqtang chamal nuk ta shimal hun ning aa somlo ta.”

Jaro sa hanphung wang anaan tsija tha taqhal aa

(Matthew 17:14–21; Luke 9:37–43a)

14Ning adak ujiphantey tang jamnáng thuta tho, ning tha tim eq daqhan miqtang waan tha khita etho chamtey tey thong tataltey tang ning jamoq thadan ta. 15Etho miqtang aa Jesu tha khi eq, ning rapney patja ta etho jol eq piq tha jak eq nukta. 16Etho Jesu aa ning ma pitta, “Nim ning jamoq chamlang ma thadan tin?”

17Ethina thajoq tey miqtang jaktung wang ashey miq thu eq batta, “Tatalteywa, isa miqwasa bajam náng thok sol taphang, chammatakoi piq haanmong na anaan tsija etho piq angong. 18Baluk o iri tsija rey piq raa lo ajo, piq haq náng ngak wang aa etho unung wang thukchibol thalat aa, paa sha tachik kak aa etho piq rapney thalat ti aa. Nga ba jiphantey tang ma iri tsija raa lat rangma bat táng etharin ning aa jin latmoq angta.”

19Jesu aa ning thima batta, “Nim kam ahung miqtang! Nga nim jamoq chamtan náng tongching angna? Nga chamtan nim jamoq kara náng? Eshi miqwasa shi irelnáng sol kat phin!” 20Etho ning aa piq tha Jesu relnáng solkat ta. Ethi tsija they Jesu tha khi atho kalo hun piq tha rapney thamot ta, ethi rangma piq rapney juchan wang ngak eq chik ta etho unung wang daqhan thuk thalat ta.

21Jesu aa piq wa thima pitta, “Piq baluk wang sey irimal ang aa?”

Piq aa thawel batta, “Piq nijang tok wang hun. 22Tak daqhan sey iri anaan tsija rey piq raa wal nia jung náng bichak eq piq raa tatik ma tathin aa. Ujin eq ujo, í ma tinshit phu etho nong phu!”

23Jesu aa batta “Ujin eq ujo ta chamma bat u? Miq ashey ma ukam atha ang ajo thaji sha ujin eq aa.”

24Ethiwa they ring eq batta, “Nga ukam eq ang! Etharin ukam eq ma lam takhi phu!”

25Jesu aa miqtang tahum jang atha khita, ethi rangma piq aa ethi anaan tsija thima qhat eq batta, “Angong nia naqbang anaan tsija, nga batphang, iri miqwasa ri shingchak eq jol chuwang u etho baluk otho piq hanmong náng nak wey thu u!”

26Ethi tsija tha rapney jujong hal aa ringta etho rapney jujong wang ethi miqwasa tha thamot chak eq jol chuwang ta. Ethi miqwasa tha usiin eq ma amáng mal angta etho thaji miqtang eq batta, “Piq utik sey angta!” 27Etharin Jesu aa jak eq lo eq tun tashat ta etho piq tha thalang ma kota.

28Jesu him náng wang eq piq chen chen tong atho, ujiphantey tang aa piq ma shu shu eq pitta, “Í aa cham ma eshi anaan tsija shi jin phan mi ang ti?”

29Jesu aa thawel batta, “Romtam chuk wang hun irimal tsija sha jin phan na.”

Jesu aa utik raaq tha wey bat aa

(Matthew 17:22,23; Luke 9:43b–45)

30Jesu etho ujiphantey tang ethi haq tha shingchak eq Galilee wang ang eq kata. Jesu bana ang atha umiq tang ma tasam ma nukmoq angta, 31chammatakoi piq aa ujiphantey tang ma tatal eq chey ta. Piq aa ning ma bat kota, “Miqna sa sha dipkup eq miqtang jaknáng kochakna etho ning aa piq sha tatik eq chakna. Etho piq saal tom jio wey jey angna.”

32Etharin piq aa chamta batta tha ning aa jin sam moq angta etho ning ethi raaq tha wey pit ma ucho angta.

Utang thaji phey wang eq ajong aa

(Matthew 18:1–5; Luke 9:46–48)

33Ning Capernaum náng thok jio, ashey himmong o tong chey atho, Jesu aa ujiphantey tang thima batta, “Nim lam na chamlang raaq wan eq thadan tin?”

34Etharin utang eq atho thawel bat moq angta, chammatakoi lam na ning jaktung o utang thaji phey wang ajong ethi raaq tha wan eq thadan ta. 35Jesu tong eq wasi wani ujiphantey tang tha hal eq batta, “Utang jakho angma nuk aa, piq thaji pheywang jina ang eq thaji sanga ang ching.” 36Etho Jesu aa ashey nijang sa ning jakho o thalang ta. Etho piq aa nijang sa tha khilo eq ning thaji ma batta, 37“Utang eq i miing o irimal ashey nijang sa sha tunsol ajo, piq aa nga tunsol aa; utang eq nga tunsol aa, piq shey nga ma chen ang moq, etharin itakattey tha tunsol aa.”

Utang eq nga ma miiksuk phamong sha nga tun aa

(Luke 9:49,50)

38John aa piq ma batta, “Tataltey wa, í aa miq ashey kap khiti, barey ba miing tha sey eq thangwa tang tha phanta, etho í aa irimal nak som u ta bat ti chammatakoi piq í jamna tongtey miq ang moq.”

39Jesu aa ning thima batta, “Piq shima nak táng inn, chammatakoi utang eq tho i miing sha sey eq patja jaksom lot jin somlo ajo i miing sha jin tashit moq angna. 40Chammatakoi utang eq ning ma miiksuk moq ning sha ijamna. 41Nga nim ma asing batphang, utang eq tho nim sha Khristo miq ta ang tungkang o, nim ma kok shey jung thaling phin jo piq aa jaksom thang kapna.”

Ngarey somlot ma tari

(Matthew 18:6–9; Luke 17:1,2)

42 Chamtey tey miq eq ngama kamtey nijang sa ashey sha ngarey náng taqhat ajo, eshi miq boq sho thom sha bon eq jungshi náng bichak sha eshi miq shima aqhal. 43Ethi rangma, bajak ko shey nang ma ngarey jaksom lot tasom lo phu jo, thaduk chak eq bakchak u! Jak ashey ahung tong eq pattup rollung náng wang etho, jak ani sha hol eq walmungtan náng wang ajo ba rangma aqhal. Esho wal sha baluk otho thun moq angna. Ethina ukak phanli jongbal baluk otho ti moq angna, etho ujung ang aa wal sha baluk o tho mit moq angna. 44Eshina ukak phanli jongbal baluk otho thun moq angna, etho wal jung sha baluk otho mit moq angna. #9:44 Chamtey Greek likdap tang na verse 44 ahung. 45Etho ba jaa ashey eq nang ma ngarey jaksom lot tasom lo phu ta ang ajo, eshi jaa shi thaduk eq bakchak u! Jaa ashey ahung ang eq pattup rollung náng wang sha, jaa ani sha hol eq walmungtan náng wang ajo ba rangma aqhal. Eshina miq phakchak phanli jongbal baluk otho thun moq angna etho ethiwang wal sha baluk otho thun moq angna. 46Eshina ukak phanli jongbal baluk otho thun moq angna, etho wal jung sha baluk otho mit moq angna. #9:46 Chamtey Greek likdap tang na verse 46 ahung. 47Etho bamiik ashey eq nang ma ngarey jaksom lot tasom lo phu ta ang ajo, eshi miik shi lat eq baychak u! Miik ashey ahung ang eq Shkewa Mungtan náng wang sha, miik ani hol eq walmungtan náng wang ajo ba rangma aqhal. 48Eshina ukak phanli jongbal baluk otho thun moq angna, etho wal jung sha baluk otho mit moq angna.

49 Thaji miqtang sha wal wang tasimm na.

50 Simm sha aqhal, etharin simm siim sha shiti ajo, chamal eq wey jin tasimm na? Nim ni nim jaktung o simm mal siim inn etho ashey eq ashey jamoq nungmay wang tong inn!

Currently Selected:

Mark 9: Mmmm

Highlight

Copy