John 7
7
Jesu nia uno tang
1Iri raaq tang jio Jesu Galilee na lingqhing ta; chammatakoi Jehudi tang aa Jesu tha tikwat ma tathin chey ta. Ethirangma piq Judea haqna lingqhing ma nuk moq angta. 2Etharin Jehudi tang Bulang taap kut aa kan arelna angta. 3Ethirangma uno tang aa piq ma batta, “Iri wang Judea haq náng ka u, etho bari jaksom raa nang aa somlo u, eshitang shi ba jiphantey tang aa eshina cham khi aa. 4Utang tho asam atol qhong ma nuk ajo tapu eq somlo moq. Nang aa iri tang jaksom raa som chey ujo nang ni nang raa mingkang ro takhi nu.” 5Chammatakoi uno tang atho Jesu ma han moq angta.
6Jesu aa ning ma batta, “Nga ma thanga tho khakla rangham tha thuwey pha moq, etharin nim ma salwet thaji rangham raa khakla. 7Mingkang miqtang eq nim raa jin miiksuk pha min, etharin ning aa nga miiksuk phang chammatakoi ning jaksom aja ta nga miikkhi kot ang. 8Nim kut aa kan náng ka inn; nga thanga iri kut aa kan náng kapha mong, chammatakoi thanga náng thula nga ma rangham thu wey pha moq.” 9Jesu aa ning ma iri raaq tang raa bat jio Galilee na hun tong ta.
Jesu Bulang taap kut aa kan na
10Etharin uno tang kut aa kan náng kat jio, Jesu tho takhi hunga tapu eq kata. 11Jehudi tang aa kut aa kan na ira bat eq bita, “Jesu thi barina?”
12Miq wan eq piq tung aa raaq tapu eq daqhan raaq wan tit chey ta; chamtey tey eq batta, “Piq miq qhal” Etho chamtey tey eq batta, “Ang moq, piq aa miqtang aja lam náng sol aa.” 13Etharin Jehudi solwa tang ma cho wang utang eq tho piq tung aa raaq lan bat kot moq angta.
14Kut aa kan tangko sey ang atho, Jesu rangnuk himthal náng ka eq phang tatal kot chey ta. 15Jehudi tang aa patja eq batta, “Tatal hunga piq aa thung atal ri chammal eq sam aa?”
16Jesu aa ning ma thawel batta, “Nga tatal ang raa iraaq ang moq, etharin nga takatteywa raaq. 17Utang miq eq Shkewa tinuk wang kat ma ta ajo piq aa nga Shkewa ching wang tatal bat ang tia iching ko wang tatal bat ang sha ning aa usam eq na. 18Utang eq piq ching kowang bat aa, piq aa piq ni piq sha thajong ma tathin aa; etharin utang piq takatteywa thajong ma tathin aa, piq sha asing, etho piq shima jashit ahung. 19Moses aa nim ma thong kot moq ang ta i? Etharin nim wang utang tho thong na qhing min. Nim aa nga tikwat ma cham ma tathin inn?”
20Miqtang they thawel batta, “Ba jamna thangwa! Utang eq nang tikwat ma tathin aa?”
21Jesu aa thawel batta, “Nga ashey patja jaksom somlo táng, etho nim thaji patti tin. 22Moses aa nim rangma hankhup qhan ma raaqkhak kota, nim aa Sabbath saal o hankhup qhan inn. Esha Moses ching kowang ang moq angta, etharin nim tey aa wa tang aa phang somlo ta. 23Nim aa nijang miqwasa Sabbath saal o hankhup qhan inn jo nim tinthin o Moses thong raa tachon moq ang ajo, nga Sabbath saal o miqwa ashey taqhal táng thima nim nga ma cham ma kha phin? 24Miq siin eq khaphung nak phung inn, etharin asing wang khaphung inn.”
Piq raa hun Khristo i?
25Jerusalem wang miqtang they batta, “Jehudi tang aa tikwat ma tathin chey ta wa thi ira i? 26Siin inn! Piq aa miq wan tang thim o bat aa etho ning piq ma chamtho raaq moq. Phokho walang tang aa piq raa hun Khristo ta asing sam sey ta i? 27Piq bari wang aa ta íaa usam eq i; etharin Khristo sey kapha jo piq bari wang katapha ta utang eq tho sam moq angna.”
28Jesu aa thanga tho rangnuk himthal na tatal chey ta tho ring eq batta, “Nim aa nga usam eq phin, etho nga bari wang aa ta nim aa sam eq inn. Etharin nga i tinuk o kapha mong ang taphang. Itakatteywa asing, nim aa piq sam min. 29Nga piq usam eq ang chammatakoi nga uching kowang kataphang etho piq aa hun nga takat taphang.”
30Etho ning aa piq thalot ma tathinta, etharin utang eq tho jak eq lo moq angta chammatakoi piq rangham thuwey pha moq angta. 31Etha otho daqhan miqtang piq tha han eq batta, “Khristo sey kapha jo iri wa phey náng eq tho ahan patja jaksom takhi na i?”
Jesu thalot ma ubantey tang takat aa
32Phorisi tang aa miqtang ma piq tung aa raaq wan aa tha kap tatta; req ajong tingwa tang etho Phorisi tang aa Jesu tha thalot ma ubantey tang tha takat ta.
33Jesu aa batta, “Nga chomwey rangma hun nim jamna, etho nga takatteywa jamnáng wang náng. 34Nim aa nga bi phanin, etharin khipha min ang pha inn. Bari náng nga ka ang eshináng nim jin kapha min.”
35Jehudi tang jaktung na raaq ta, “Hiqtang aa khimi angma piq bari náng ka na? Piq Greek tang samhaq náng ka eq ning ma tho tatal kot eq na i? Eshina hiqtang miqtang tho utong ang aa. 36Piq aa batta raaq ri chamlang raaq aa, ‘Nim aa nga ubi eq pha nin, etharin khipha min ang nin; etho bari na nga ka ang, eshináng nim jin ka pha min ang inn?’”
Rollung kottey jung
37Eshi kut aa kan uthom etho akhek saal tho Jesu ulang ang eq etho ring eq batta, “Utang jung lal ti ajo irelnáng ka eq ling ka phin. 38Chamal Asang likwit na bat aa, utang eq nga ma kam aa, ‘Piq tinmong wang rollung jungku tang tha thalat na.’”
39Piq aa iri Tsija tung aa raaq batta. Utang eq piq o kam aa tang shey Tsija kapna. Tsija thanga náng thula kawey pha moq angta chammatakoi Jesu thanga náng thula piq phun amun angwey moq angta.
Miqtang jaktung na taphal
40Miq wan thina chamtey they iri raaq tang raa tat eq batta, “Asing asing iri wa raa Rangsamal.”
41Miqwa adak tang they batta, “Ira Khristo.” Etharin chamtey tang they batta, “Chamma? Khristo Galilee wang thupha na i? 42Asang likwit na batta, ‘Khristo sha David phe alí etho David tong ta Bethlehem qhim thiwang thu phana.’”
43Req Jesu rangma miqtang jaktung thina taphal angta.
44Chamtey ethiwang piq tha thalot ma tathin ta, etharin utang eq tho jak thalo moq angta.
Jehudi tang aa han moq
45Ubantey tang sha ajong tingwa tang nia Phorisi tang relnáng wey wel ta. Ning they ubantey tang thima pitta, “Nim aa piq chamlang ma sol min ang tin?”
46Ubantey tang they thawel batta, “Iri miqwa rey bat aa thimal utang eq tho baluk otho bat wey moq.”
47Phorisi tang aa ning ma batta, “Nim raa tho aja ma shing ta phin i? 48Phokho walang tang tia Phorisi tang wang ashey eq tho piq ma han eq ta i? 49Iri miq wan rey thong sam moq, req ning tha Shkewa manthun mong na.”
50Phorisi tang wang Nicodemus ta ashey angta, bara Jesu jamnáng ka eq rangpal o tapu eq tachong ta. Piq aa pitta, 51“Hiqtang thong eq miq ma, jakho piq raaq tat eq sam moq nángduk, aja ta raaq moq.”
52Ning aa thawel batta, “Nang tho Galilee wang i? Bi eq siin u, ashey Rangsamal tho Galilee náng thuwey moq.”
53Etho ning thaji him náng chuwangta.#7:53 Chamtey Greek likdap tang na verse 53 ahung.
Currently Selected:
John 7: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
