John 8
8
Sathuk miqnu ma tolchak
1Jesu Olive kannáng qhangta. 2Rangnap tho piq rangnuk him náng wey thuta; miq thaji tha urel náng thuta etho piq tong eq ning ma tatal chey ta. 3Eshina sathuk jaksom wang miqnu ashey kap lota, thong tataltey tang etho Phorisi tang aa miqnu tha jaktung o thalang eq Jesu ma batta, 4“Tataltey wa, iri miqnu raa sathuk jaksom kam wang kap lota. 5Moses thong na í ma raaqhat kot taphi, eshimal miqnu tang sha long ti eq patching. Nang aa iri miqnu rima chamta bat u?” 6Piq ma ajat raaq kap ma ning aa piq tha thak tal ma iri raaq raa batta, etharin Jesu haq náng bon eq ujaksi they haq tha thòng witta. 7Ning aa piq ma pit chey roq atho, piq tachal lang eq ning ma batta, “Nim wang utang ngarey ahung, piq shey long eq jakho cham pat aa.” 8Iri jio piq haq thináng wey bon eq jaksi they witta. 9Etharin ning aa raaq tha tat eq nijang wang miqlang náng thula, ashey shey rong thalat qhing chuwang ta, etho Jesu piq chen chen sey angta etho jaktung thina miqnu tha lang chey ta. 10Jesu tachal lang eq piq ma batta, “Miqnu, ning thi bari náng ang aa? Utang eq tho nang ma ngarey som tu ta jinwat pha mu angta phu i?”
11Piq aa batta, “Tatalteywa, utang tho ahung.”
Etho Jesu aa batta, “Nga tho nang ma ngarey ta shing phamong. Ka u, thang wang ngarey nak wey som u.”
Jesu raa mingkang wallit
12 Jesu aa ning ma wey batta, “Nga raa mingkang wallit; utang eq iji phan na piq rangnak na qhing moq, etharin piq aa rollung wallit kapna.”
13Phorisi tang aa piq ma batta, “Nang aa nang ni nang ma miikkhi kot u i, ba miikkhi sha khakla ang moq.”
14Jesu aa ning ma thawel batta, “Imikkhi nga bat ang jo tho, i miikkhi raa khakla, chammatakoi nga sam eq ang nga, bari wang kataphang etho bari náng ka ang. Nang aa sammu, nga bari wang ka taphang tia bari konáng kachey ang. 15Nang aa hanngam o khaphung u, nga utang tho khaphung mong. 16Etharin nga khaphung ko ang jo tho, i khaphung sha asing; chammatakoi nga chen chen ang mong, Iwa barey nga takat taphang ijamna atha. 17Miq ani miikkhi sha aqhal ta nim thong na tho thawit ang aa. 18I rangma miikkhi nga kot ang, etho Iwa tho barey nga takat taphang, i rangma miikkhi kot aa.”
19Ning aa piq ma pitta, “Ba wa bari na?”
Jesu aa thawel batta, “Nim aa nga raa tho sampha min, iwa tho sam min, nga sam ta phin jo Iwa tho usam eq wang tin.”
20Iri raaq tang raa piq aa rangnuk himthal ngin shingching himkhok mong thina tatal chey eq batta, utang eq tho piq tha lo moq angta chammatakoi piq ma rangham thuwey pha moq angta.
Nga banáng kanáng eshináng nim jin ka min
21Jesu aa ning ma wey batta, “Nga ukat sey ang chey ang, nim aa nga bi phanin etho nim ni nim ngarey o ti nin. Nga bari náng ka ang eshináng nim jin kapha min.”
22Jehudi tang aa batta, “Piq aa bat aa, ‘Nga bari náng ka ang eshináng nim jin kapha min?’ Piq aa piq ni piq sha tatik chak na i?”
23Jesu aa thawel batta, “Nim anim wang, nga raa aluk wang; nim raa iri mingkang wang, nga raa iri mingkang riwang ang mong. 24Ethirangma nga nim ma batphang, nim ngarey o ti nin, chammatakoi esha nga raa hun ta nim aa han min ang inn jo nim ngarey o nim hun ti nin.”
25Ning aa piq ma pitta, “Nang utang aa?”
Jesu aa thawel batta, “Phang wang hun nga chamta batta phang. 26Nga nim tung aa raaq nim ma bat kotching daqhan ang aa etho khaphung ma daqhan ang aa. Nga takatteywa asing, etho nga piq ching wang tat táng esha hun mingkang miqtang ma bat kot ang.”
27Jesu aa ning ma Uwa tung aa raaq bat chey ta ta ning aa sam moq angta. 28Jesu aa batta, “Nim aa Miqna Sa aluk náng sey taqhung inn jo nim aa sam nin, nga raa piq tha hun; i tarong wang chamtho somlo mong etharin chammal Iwa aa nga ma tatal phang ethimal hun nga raaq ang. 29Nga takatteywa salwet ijamna, piq aa nga chen chen shingchak phamong angta, chammatakoi piq aa chammal tinmat aa ethimal hun nga somlo ang.”
30Miq daqhan eq Jesu aa iri raaq tang raa tat eq piq ma kam ta.
Asing eq nim raa qhap phin
31Jesu aa piq ma kamtey Jehudi tang ma batta, “Nim aa iraaq tat inn jo nim raa asing hun ijiphantey. 32Etho nim aa asing raaq sam inn etho asing eq nim qhap pha nin.”
33Ning aa thawel batta, “Í Abraham phi aa lí, í baluk o tho miq qha ang wey mi angti. Nim uqhap eq chak phanin ta nang aa chamal bat u?”
34Jesu aa ning ma thawel batta, “Nga nim ma asing sing batphang, utang eq ngarey somlo aa, piq ngarey qha. 35Qha sha him na salwet tong moq, etharin miqwasa sha salwet him na tong aa. 36Ethirangma Miqwasa nim qhap phin jo nim sha asing hun qhap chol sey ang nin. 37Nga usam eq ang, nim Abraham phi aa lí; etharin iraaq nim tinmong na ahung, ethirangma nim aa nga tikwat ma tathin inn. 38Bara Iwa relna khi táng, esha nga bat ang, nim aa nim wa wang tat inn, esha hun nim aa somlo inn.”
39Ning aa thawel batta, “Íwa Abraham.”
Jesu aa ning ma batta, “Nim Abraham sa ang tin jo Abraham aa somta thimal somlo wang tin. 40Etharin nga Shkewa ching wang tat eq nim ma asing batta phang, etharin nim aa thanga nga tikwat ma tathin chey inn, ethimal Abraham aa somlo moq angta. 41Nim aa nim wa somlo aa thimal somlo inn.”
Ning aa piq ma batta, “Í raa sathuk jaksom wang chang mi ang ti, í raa ashey dang Shkewa susa tang.”
42Jesu aa ning ma batta, “Shkewa nim wa ang ta jo, nim nga ma tinmat ang wang taphin; chammatakoi nga Shkewa kowang kata phang etho thanga nga irina. Nga i thunglam o kapha mong angta phang, etharin piq aa nga takat taphang. 43Nim aa iraaq chamlang ma sam min? Chammatakoi nim aa iraaq jin tat min. 44Nim raa nim wa thangwa sa tang etho nim aa nim wa tinuk phan ma nim nuk inn. Piq phang wang hun miq tatiktey, etho asing rangma jin tong moq, chammatakoi piq jamna asing ahung. Piq aa ahut alik bat ajo piq dangjang o hun somlo aa chammatakoi piq ahut alik etho ahut alik wa. 45Etharin nga asing raaq ang, ethirangma nim aa nga kam phamin. 46Nim wang utang eq nga raa ngarey ta shing na? Nga nim ma asing batphang jo nim aa nga chamlang ma kam phamin? 47Utang Shkewa kowang thupha, piq aa Shkewa raaq tang tat aa, nim Shkewa wang ang min, ethirangma nim aa piq raaq tat min.”
Jesu nia Abraham
48Jehudi tang aa Jesu ma thawel batta, “Nang Samaria miq etho ba hanmong na thangwa eq rum phu ta íaa khakla batphi.”
49Jesu aa thawel batta, “Ijamna thangwa ahung, nga Iwa rangka ang, etharin nim aa nga rangka phamin. 50Nga raa tasapsey ma batpha mong, etharin esha bitey ashey atha, etho piq aa khaphung aa. 51Nga nim ma asing sing batphang, utang iraaq o qhing ajo, piq baluk otho tik moq angna.”
52Jehudi tang aa piq ma batta, “Íaa thanga sam sey i, ba jamro thangwa atha. Abraham etho rangsamal tang utik sey angta; nang aa bat u, utang eq ba raaq tat ajo piq baluk otho tik moq angna. 53Íwa Abraham utik sey angta, nang piq wang ajong i? Etho rangsamal tang utik sey angta. Nang aa nang ni nang ma chamta tathin u?”
54Jesu aa thawel batta, “Nga ni nga raa nga tasapsey ang jo chamtho ahung; etharin itasapsey tey Iwa atha, nim aa piq tung aa raaq ba tin, ‘Piq í Shkewa.’ 55Nim aa piq sam min, etharin nga piq usam eq ang. Nga piq sam mong ta bat ang jo nim mal alik nga raa ang náng. Etharin nga piq usam ang, etho piq raaq tat ang. 56Nim wa Abraham sha nga kat saal rangham sha khi ma rapney sungrang ta, piq khi eq sungrang angta.”
57Jehudi tang aa Jesu ma batta, “Nang thanga pang rokbanga pang tho angwey mu, etharin nang aa Abraham tha ukhi eq tu i?”
58Jesu aa ning ma batta, “Nga nim ma asing sing batphang, Abraham chang wey moq jakho, nga atha ang táng.”
59Ning aa piq tha patma long tha tun ta. Etharin Jesu tapu eq rangnuk him wang thalat qhing chuwang ta.
Currently Selected:
John 8: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
