John 17

Jesu aa ujiphantey tang ma romtam aa

1Jesu aa iri raaq tang thun bat jio, umiik tha mungtan konáng tun siin eq batta, “Iwa, rangham tha uthok sey ang pha; ba sa Miqwasa ma phun amun u, irimal ang ajo ba sa Miqwasa tho nang ma phun amun phanu. 2Chammatakoi nang aa piq ma thaji atharang phan sho authority shing ma kotu, req nang aa Miqwasa ma ko tu eshitang thima piq aa pattuk rollung ko aa. 3Ashey dang asing Shkewa nang raa nia nang aa takat tu Jesu Khristo usam sha hun pattuk rollung. 4Nang aa ngama jaksom kota phu, eshi jaksom tha tahom eq mingkang ro ba phun amun sha takhi táng. 5Iwa, mingkang phanghun jakho bari phun amun raa nga ba jamna shing táng, thanga ba jakho na eshi phun amun shey nga ma tashey phu.”

6 “Nang aa mingkang wang kota phu miqtang shima nga ba miing takhi táng. Ning ba rang angta etho nang aa ning tha ngama kota phu, etho ning aa ba raaq utat eq ta. 7Chamtan nang aa ngama kota phu thaji sha ba ching kowang ta, ning aa thanga sam sey aa. 8Chamtan likwit tang nang aa ngama kota phu tha nga ning ma ko táng, ning aa ukap sey ta, etho nga baching kowang ta asing usam sey ta etho nang aa nga takat taphu ta han sey ta.”

9 “Nga ning rangma romtam chu ang, mingkang rangma romtam chu mong, etharin nang aa ngama kota phu, ning rangma chen romtam chu ang, chammatakoi ning raa ba rang. 10Chamtan i rang thaji sha ba rang etho bara ba rang sha i rang etho eshi tungkang o i phun amun takhi ta. 11Nga mingkang ro thang wang tong mong sey, etharin iri miqtang raa mingkang ro utong angna, etho nga ba relnáng wang phang. Asang Iwa, ba miing tarong wang ning ri thalun shing u, bari miing raa bara nang aa nga ma kota phu, irimal ang ajo ning hiqtang mal ashey ang aa. 12Baluk náng thula nga ning jamna ang táng tho nga ba miing wang bara nang aa nga ma kota phu, ning tha hom táng, etho nga ning tha thalun shing táng etho ning wang utang tho mamoq angta, ashey dang hun tashit chak ta, bara ushit hun ang ching angta. Irimal ang eq Asang likwit na chamta batta tha tahom ang na. 13Thanga nga ba relnáng wang phang; etharin mingkang na tong tok wang hun iri raaq raa bat ang, irimal ang eq i sungrang raa ning tinmong na shey na. 14Nga ba raaq ning ma bat táng, etho mingkang eq ning sha miiksuk ta, chammatakoi nga mingkang ràng ang mong, ethimal hun ning tho mingkang ràng ang moq. 15Nang aa ning sha mingkang wang tunsol u ta nga romtam chu phamong, etharin Thangwa wang ning sha thalun ma chu phang. 16Nga mingkang ràng ang mong, ethimal hun ning tho mingkang ràng ang moq. 17Asing wang ning shi tasang u; ba raaq raa asing. 18Chamal nang aa nga mingkang náng takat taphu, ethimal nga tho ning mingkang náng takat táng. 19Ning rangma nga ni nga raa tasang táng, irimal ang eq ning tho asing wang cham sang aa.”

20 “Nga ning rangma chen romtam chu pha mong, etharin ning raaq tungkang o ngama hantey tang rangma tho romtam chu ang. 21Irimal ang eq ning ashey cham ang aa. Iwa, chammal nang i jamna etho nga ba jamna, ethimal ning tho hiqtang jamna cham ang aa. Irimal ang eq nang aa hun nga takat ta phu ta mingkang eq cham han aa. 22Nang aa nga ma phun amun kota phu, eshi phun amun sha nga ning ma kotáng, irimal ang eq hiqni ashey eshimal hun ning tho ashey cham ang aa. 23Nga ning jamna etho nang ijamna, req ning khakla eq ashey ma cham ang aa, nang aa nga takat ta phu etho nang chamal ngama tinma taphu, ethimal ning ma tinma u ta mingkang eq cham sam aa.”

24 “Iwa, nang aa ning sha nga ma kota phu, nga barina tong ang ning tho ijamna tong ma nuk ang, irimal ang eq nang aa nga ma kot taphu phun amun sha ning aa khi na, chammatakoi mingkang hùn wey mu jakho nang ngama tinma taphu. 25Asing Iwa, mingkang miq eq nang sam pha mu, etharin nga nang sam eq phang, nang aa nga takat taphu ta ijiphantey tang aa usam eq aa. 26Nga ba miing ning ma tasam táng etho eshimal hun som náng, irimal ang eq bari tinmat wang nang aa nga ma tinmat taphu eshi tinmat shi ning otho atha ang na, etho nga ning o tong náng.”

Currently Selected:

John 17: Mmmm

Highlight

Copy