John 18
18
Jesu tha thalo aa
(Matthew 26:47–56; Mark 14:43–50; Luke 22:47–53)
1Jesu romtam chuk jio ujiphantey tang jamoq Kidron kanqhùng na jungtol adak konáng kata. Eshi haq sho pal ashey angta etho piq nia ujiphantey tang eshináng kata. 2Piq thalotteywa Judas atho Kidron pal tha usam eq ta, chammatakoi Jesu ujiphantey tang jamoq eshináng jin kat cheyta. 3Judas aa Rome ralkoltey tang etho ajong tingwa tang nia Phorisi tang ching kowang rangnuk him bantey tang tha sol eq eshináng thuta; ning aa paq ajan tang som eq etho wallit nia nalpang tha som eq eshináng kata. 4Jesu aa piq o chamlang angna tha usam eq thalat ta etho ning ma pitta, “Utang bi inn?”
5Ning aa piq ma thawel batta, “Nazareth wang Jesu.” Jesu aa ning ma batta, “Nga raa piq tha.” Piq thalottey wa Judas tha ning jamna lang ta.
6Jesu aa “Nga raa piq tha” ta raaq jio, ning jináng wel eq haq náng ngak wang ta. 7Jesu aa ning ma wey pitta, “Nim aa utang bi inn?”
Ning aa batta, “Nazareth wang Jesu.”
8Jesu aa thawel batta, “Nga raa eshi miq tha ta nim ma ubat sey taphang. Nim aa nga bi inn jo, ning ri takat inn.” 9Piq aa batta raaq tha tahom rangma iri raaq raa angta, “Nang aa nga ma kota phu thiwang nga ashey tho thamat mong ang táng.”
10Simon Peter aa urel wang janqhi tha lat eq ajong tingwa tang solwa qhawa naq tha chonduk chakta. Eshi qhawa miing tha Malchus angta. 11Jesu aa Peter ma batta, “Ba jan ni uhi náng sakchak u. Iwa ngama kotaphang tsamnang kok riwang nga ling mong i?”
Annas jakho na Jesu khaphung
12Ralkoltey tang etho ning ajongwa etho rangnuk him bantey tang aa Jesu tha lo eq khak ta. 13Jakho Jesu tha Annas relnáng solkat ta. Piq sha Caiaphas hocha angta, eshi pang sho ajong tingwa tang solwa angta. 14Iri Caiaphas raa Jehudi tang ma batta, thaji miqtang rangma ashey miq tik sha aqhal.
Peter aa Jesu raa sammong ta bat aa
(Matthew 26:69,70; Mark 14:66–68; Luke 22:55–57)
15Simon Peter etho adak ujiphantey tho Jesu jio kata. Adak ujiphantey tha ajong tingwa tang solwa they usam eq ta, ethi rangma piq Jesu jamoq ajong tingwa tang solwa himthal náng kata. 16Etharin Peter kalung phang sho lang ta. Adak ujiphantey ajong tingwa tang solwa samtey sha ran náng thalat eq kalung bantey nu they bat eq Peter tha himmong náng solwan ta. 17Kalung wang miqnu they Peter ma batta, “Nang tho iri miq jiphantey tang wang i?”
Peter aa thawel batta, “Nga ang mong.”
18Qha tang nia kalung bantey tang rangsong wang walkang na lang chey atho Peter tho ning jamoq walkang sho rok lang eq jak tha hĂ ngta.
Ajong tingwa tang solwa aa Jesu ma pitpi aa
(Matthew 26:59–66; Mark 14:55–64; Luke 22:66–71)
19Ajong tingwa tang solwa aa Jesu ma ujiphantey tang nia utatal tung aa raaq pit pita. 20Jesu aa piq ma thawel batta, “Nga mingkang miqtang thaji jamoq alang eq wan táng, nga salwet synagogue nia rangnuk him na tatal táng, eshi katang na thaji Jehudi tang thajoq ta. Tapu eq ashey tho bat mong ang táng. 21Nang aa ngama chamlang ma pitpi phu? Barey iraaq tat ta, ning ma nga chamlang bat táng shi pitpi u. Nga chamlang ta bat táng sha ning aa usam eq aa.”
22Piq aa iri tang bat jio, kalung bantey tang wang ashey eq, Jesu tha bang wat eq batta, “Nang ajong tingwa tang solwa ma irimal chamal eq thawel bat ko u!”
23Jesu aa piq ma thawel batta, “Nga ajat bat táng jo chamlang ajat bat táng shi bat u, etharin nga asing bat táng jo nga chamlang ma wat phu?”
24Annas aa Jesu tha khak eq ajong tingwa tang solwa Caiaphas relnáng takat ta.
Peter aa Jesu tha sammong tha wey lik aa
(Matthew 26:71–75; Mark 14:69–72; Luke 22:58–62)
25Simon Peter thanga tho walkang thina lang eq jak hà ng chey atho eshina langtey tang aa Peter ma pitta, “Nang raa tho ujiphantey tang wang ashey ang mu i?”
Peter lik eq batta, “Nga ang mong.”
26Peter aa naq khan chakta wa juntey wang ashey eshina angta. Piq ajong tingwa tang solwa qha angta. Piq raaq ta, “Nga nang raa piq jamoq palna ukhi hun eq taphang?”
27Peter wey lik atho, eshi rangham tho wo tha ley walta.
Jesu Pilate relna
(Matthew 27:1,2,11–14; Mark 15:1–5; Luke 23:1–5)
28Ning aa Jesu tha Caiaphas him wang governor haq náng solkat ta. Napkha sey angta etho Ulit kut aa kan jin phaksat eq ma, nà n moq ang rangma, Jehudi solwa tang governor haq náng wáng moq angta. 29Pilate ran náng thalat eq batta, “Nim aa iri miq rima chamlang tashit ta ta raaq chey inn?”
30Ning aa thawel batta, “Iri miq rey jashit jaksom somlo moq angta jo à aa ba ching náng thok sol phami angwang taphi.”
31Pilate aa thawel batta, “Nim aa hun piq ri sol chuwan eq nim thong mal piq ri khaphung inn.” Jehudi tang aa piq ma batta, “Í aa utang tho jin tatik mi.”
32Piq chamal eq ti na ta Jesu aa batta; piq raaq sha tahom ang rangma iri tang raa angta.
33Pilate himmong náng wey wà ngta, etho Jesu tha hal eq piq ma pitta, “Nang Jehudi tang lungwang i?”
34Jesu aa thawel batta, “Ba chingko wang pit phu tia miq dak eq i tung aa raaq batta phu?”
35Pilate aa thawel batta, “Nga Jehudi i? Ba phan ba jat tang etho ajong tingwa tang aa nang raa i jak náng kota. Nang aa chamlang somlo tu?”
36Jesu aa thawel batta, “I mung iri mingkang ro ang moq. I mung raa iri mingkang ro angta jo, i sanga tang thamol angwang ta etho nga raa Jehudi tang jaknáng kochak moq angwang ta. Etharin i mung raa iri na ang moq.”
37Pilate aa Jesu ma batta, “Nang raa lungwang i?”
Jesu aa thawel batta, “Nga raa lungwang ta nang aa hun bat phu. Nga asing raaq bat ma iri mingkang ro chang ka taphang. Bara asing wang, ning aa i raaq tat na.”
38Pilate aa piq ma batta, “Asing chamlang aa?”
Jesu tha tatik ma raaqkhat
(Matthew 27:15–31; Mark 15:6–20; Luke 23:13–25)
Etho Pilate Jehudi tang relnáng wey ka eq batta, “Nga piq ro chamtho ajat khi mong. 39Nim Ulit kut aa kan thòng na salwet nga nim ma miq ashey qhap kophang. Jehudi tang lungwang raa qhap kophang i?”
40Ning ring eq wey batta, “Ang moq, à rangma Barabbas ri qhapchak u.” Barabbas urontey angta.
Currently Selected:
John 18: Mmmm
Highlight
Share
Copy
Want to have your highlights saved across all your devices? Sign up or sign in
CC BY-NC-ND 4.0
