John 11

Lazarus tik

1Bethany qhim wang Mary nia Martha no miqwasa miing Lazarus atak angta. 2Teyhungwa jaa o atim angam chi shat eq khorun they taqhuk kottey nu tha iri Mary raa. Piq no miqwa Lazarus tha atak angta. 3Uno ni they Jesu ma raaq thabat ta, “Teyhungwa siin u, nang barima tinmat u piq tha atak.”

4Jesu aa kap tat eq batta, “Iri tak raa utik ma ang moq; etharin Shkewa phun amun rangma, etho irimal ang ajo Shkewa Miqwasa phun amun cham ang aa.” 5Jesu aa Martha, uno miqnu etho Lazarus ma tinmat shing ta. 6Etharin Lazarus tha atak ta kap tat ta tho piq bari haq na angta eshi haq sho saalni wey tong ta. 7Ethi jio Jesu aa ujiphantey tang ma batta, “Kaphin, Judea haq náng hiqtang wey ka i.”

8Ujiphantey tang aa piq ma batta, “Tatalteywa, thanga tho Jehudi tang aa nang long eq pat ma tathin aa, nang chamma katma wey tathin u?”

9Jesu aa thawel batta, “Saal shey o asi ani rangham ang moq i? Miq rangney o qhing ajo thabot ti moq, chammatakoi ning aa iri mingkang wallit raa ukhi eq aa. 10Etharin ning rangpal o qhing ajo thabot angti aa, chammatakoi ning khom na wallit ahung.”

11Jesu aa ning ma rap batta, “Hiqtang nokwa Lazarus lakjib ang aa, etharin nga piq tashat ma ka ang.”

12Ujiphantey tang aa piq ma batta, “Teyhungwa, piq lakjib ang ajo uqhal angna.”

13Jesu aa ning ma piq tik tung aa raaq batta, etharin ning aa tathin ta lakjib angma bat ta.

14Req Jesu aa ning ma alang eq bat kotta, “Lazarus utik sey angta, 15etharin nga nim rangma rapney sungrang ang, chammatakoi nga eshina ahung ang táng, irimal ang eq nim aa uhan eq inn. Thanga kaphin, hiqtang piq relnáng ka i.”

16Thomas (Didymus ta tho hal eq aa) adak jiphantey tang thima batta, “Kaphin, hiqtang tho piq jamoq tik rangma ka i.”

Jesu wejey nia rollung

17Jesu thu atho Lazarus tha máng bungching na saalbali sey shing ta. 18Jerusalem wang Bethany sha phalong tom tan rol angta. 19Jehudi tang daqhan eq Martha nia Mary relnáng uno tita thima tin tachim ma thuta.

20Jesu thupha na ta Martha kap tat atho piq jamoq tachong ma kata, etharin Mary him na tong ta. 21Martha aa Jesu ma batta, “Teyhungwa, nang irina angtu jo ino tha timoq ang wangta. 22Etharin nga thanga tho sam eq ang, nang aa Shkewa ching wang chamlang chu u, Shkewa nang ma ukot eq phanu.”

23Jesu aa piq ma batta, “Ba no wejey angna.”

24Martha piq ma batta, “Nga usam eq ang, uthun saal o weyjey rangham o piq wey lun angna.”

25Jesu aa piq ma batta, “Wejey nia Rollung sha nga raa hun. Utang eq nga ma han ajo utik ang ajo tho weyjey angna, 26etho utang atharang ang eq nga ma han ajo piq baluk otho timoq angna. Nang aa iri raaq ri han u bo?”

27Piq aa Jesu ma batta, “Inn Teyhungwa, nga han eq phang, nang raa Khristo, Shkewa Miqwasa, bara mingkang náng katteywa tha nang raa.”

Jesu qhap aa

28Martha ira bat eq qhing chuwang ta etho uno Mary tha shu shu hal eq batta, “Tatalteywa irina etho nang hal phu.” 29Etho ira tat eq Mary photla shat eq piq relnáng kata.

30Jesu thanga tho qhim náng thuwey moq angta, etharin barina Martha piq jamoq tachong ta haq thina hun ang wey ta.

31Jehudi tang eq Mary himna piq ma tin tachim chey ta, Mary photla shat eq thalat qhing chuwang atha khi eq ning aa tathinta, piq máng bungching náng uqhap angma ka aa etho ning piq ji tho kata.

32Jesu barina angta thináng Mary thu atho piq tha khi eq ujaathong o bon eq batta, “Teyhungwa, nang irina angtu jo ipho tha timoq ang wang ta.”

33Jesu aa piq qhap aa tha etho Jehudi tang piq jamna katapha tang qhap aa tha khi atho piq tin rapney shita. 34Etho batta, “Nim aa piq thi barina shing tin?” Ning aa piq ma batta, “Teyhungwa, ka eq siin i.”

35Jesu uqhap angta.

36Jehudi tang tha raaq ta, “Siin inn, piq ma chamtan tinmat aa!”

37Etharin ning thiwang chamtey tey eq batta, “Aduk taqhaltey wa tha i, iri miq raa timoq angma tho piq aa jin somlo moq i?”

Lazarus tha thalun aa

38Jesu tin rapney wey shi eq máng bungching náng ka atho, eshi máng bungching tha ubung angta, etho eshi long bung tha long eq takup ta.

39Jesu aa batta, “Long ni thit thum inn.” Etharin utik teywa no Martha aa piq ma thawel batta, “Teyhungwa, piq máng tha uting sey ang aa hay, chammatakoi piq bungti thiwang saalbali sey.”

40Jesu aa piq ma batta, “Nga nang ma bat pha mong angta phang i, nang aa Shkewa ma han ujo Shkewa phun amun khinu.”

41Ethirangma ning aa long tha thit thumta. Ethi jio Jesu aluk náng siin eq batta, “Iwa, nang aa iraaq utat sey tu rangma kechu ajong kophang. 42Nang aa salwet iraaq utat eq u ta nga usam eq ang, etharin miq wan ikingkang na lang aa ning tungkang o nga iri raaq raa bat táng, irimal ang eq nang aa nga takat taphu ta ning aa uhan cham eq aa.”

43Piq aa iri tang raa raaq eq jujong aa halta, “Lazarus, thalat kaphu.”

44Utik teywa tha khatnuplo eq ujak wang tha uja nángduk khakchol thalat katapha, piq nung tha khatnuplo eq jupchol angta. Jesu aa ning ma batta, “Qhang eq piq ni takat inn.”

Jesu tatik ma tathin aa

(Matthew 26:1–5; Mark 14:1,2; Luke 22:1,2)

45Daqhan Jehudi miqtang eq Mary jamoq tachong ma thuta, ning aa Jesu jaksom tang tha khita, ning they piq tha hanta.

46Etharin ning thiwang chamtey tey eq Phorisi tang relnáng ka eq Jesu jaksom tha tatat ta.

47Etho ajong tingwa tang etho Phorisi tang aa Jehudi ajong lang tang tha rong thajoq eq batta, “Hiqtang aa chamlang somlo i? Iri miq rey daqhan patja ching takhi aa. 48Hiqtang aa irimal hun shing chak ijo, thaji eq piq ma han na, etho Rome tang thu eq hiqtang rangnuk him etho hiqtang mung raa tashit chak na.”

49Etharin eshi pang tho Caiaphas ta miqwa ashey ajong tingwa tang solwa angta, piq aa batta, “Nim chamtan ma já inn. 50Nim aa sam min, thaji phan aa jat tathom chak náng eq miqtang ma ashey miq sha tatik chak ijo aqhal.”

51Iri raaq raa piq ching kowang bat moq angta, etharin eshi pang tho ajong tingwa tang solwa ang eq Jesu Jehudi phan aa jat tang ma tina ta raaqtóng ta; 52Ning ma chen ang moq, taphal angtey Shkewa sa tang eq hanshey ang eq rum thajoq angna ta raaqtóng ta. 53Ethirangma ethi saal wang sey piq tha tikwat chak ma Jehudi tang aa chung ta.

54Jesu ethi jiwang sey Jehudi tang relnáng alang eq thalat ka moq sey angta, etharin jat ashey relwang qhim Ephraim náng qhing chuwang ta etho ujiphantey tang jamoq eshina tong ta.

55Jehudi tang Ulit kut aa kan arelna sey angta, miq daqhan ning ni ning tha tasang khol ma qhim qhim wang Jerusalem náng kata.

56Ning aa Jesu tha bita etho rangnuk him sho lang eq ning jaktung thina rong raaq ta, “Chamlang ta tathin inn? Piq Ulit kut aa kan náng kapha moq ang phana i?”

57Ajong tingwa tang etho Phorisi tang aa Jesu barina ta utang eq tho sam ajo ubat kot eq ma raaqkhat bat kot shingta, irimal ang ajo ning aa piq tha lot na.

Currently Selected:

John 11: Mmmm

Highlight

Copy