John 10

Kelwut rimtey raaqshiton

1 “Nga nim ma asing sing batphang, kelwut palmong kalung o nop moq ang eq khúng eq noptey ahut etho miq rontey. 2Utang kalung o nop aa, piq kelwut rimtey. 3Piq rangma kalung bantey eq kalung lak kot aa. Etho kelwut tang aa piq raaq tat aa. Piq aa ukelwut tang sha ning miing o hal eq ran náng solkat aa. 4Piq aa ukelwut tang thaji sha ran náng lat jio piq ning jakho o qhing aa etho ukelwut tang aa piq ji ji phan aa, chammatakoi ning aa piq raaq usam eq aa. 5Kelwut tang aa miqdak ji phan moq, etharin kelwut tang eshi relwang ujol thóng ang aa, chammatakoi kelwut tang aa miqdak raaq sammoq.”

6Jesu aa iri raaqshiton raa ning ma batta, etharin piq aa batta tha Phorisi tang aa sammoq angta.

Jesu jaqhal kelwut rimtey

7Ethirangma Jesu aa ning ma wey batta, “Nga nim ma asing sing batphang, nga raa kelwut tang kalung. 8Nga náng eq jakho utang katapha tang thaji sha ahut etho urontey, etharin kelwut tang aa piq raaq tat moq angta. 9Nga raa kalung; utang itungkang o palmong náng nop ajo ning ulun angna; etho nim sha himmong nia ran náng jin ling qhing eq namrum kap phaksat na. 10Ahut sha uhut eq ma, tatik eq ma etho thakchak eq ma thu aa. Etharin nga ning ma rollung kot ma kataphang, etho ahan rollung kot rangma kataphang.”

11 “Nga raa jaqhal kelwut rimtey. Jaqhal kelwut rimtey aa kelwut tang ma urollung sha kot aa. 12Jakthang ma somtey sha kelwut rimtey ang moq etho tangtey ang moq, eshirangma jakthang ma somtey eq wangru kat khi ajo kelwut sha shing chak eq ujol ang chuwang na, etho wangru thu eq kelwut tang sha tikwat chak aa etho phanwat chak aa. 13Jakthang ma somtey ang tungkang o piq ujol ang chuwang aa etho piq aa kelwut tang ma tathin tak moq.”

14-15 “Nga raa hun jaqhal kelwut rimtey. Iwa nga usam eq aa etho nga Iwa usam eq ang, eshimal hun nga ikelwut tang usam eq ang etho ikelwut tang aa nga usam eq aa. Etho nga ning rangma irollung kot ang. 16Iri pal mong riwang ang moqtey ikelwut tang adak tho ngama atha, iri adak palmong wang. Nga eshi kelwut tang sha tho thoksol eq ching; ning aa iraaq using eq na, etho thaji sha rum eq ning sha wanshey kelwut angna etho ashey kelwut rimtey angna. 17Iwa nga ma tinmat ang aa chammatakoi nga irollung kot ang; irimal ang eq nga irollung wey thawel kap ang. 18Utang eq tho irollung sha i jak wang jinnal phamong. Etharin i tinuk wang irollung kot ang. Nga irollung jin kot eq ang etho jin thawel som eq ang. Iri raaqkhak raa Iwa nga ma kotaphang.”

19Ethi raaq tang rangma Jehudi tang jaktung na wey taphal ta.

20Daqhan miqtang tha raaq ta, “Piq jamna thangwa atha etho piq raa apháng, piq raaq chamlang ma tat inn?”

21Miqdak tang they batta, “Thangwa wang lota miq eq irimal raaq jin bat moq. Thangwa eq miikduk jin takal kot eq aa i?”

Jehudi tang aa Jesu tha han moq

22Rangsong tok o, Jerusalem na rangnuk him Tasang saal kut aa kan angta. 23Rangnuk him na Solomon wohimbuk ta miing aa thina Jesu qhing chey ta. 24Jehudi tang aa piq tha timnak chak eq pitta, “Nang aa í tin baluk náng thula tathamjam phanu? Nang Khristo tha ang ujo í ma alang eq bat kochak phu.”

25Jesu aa thawel batta, “Nga nim ma bat sey taphang, etharin nim aa han phamin. Bari jaksom tang raa Iwa miing o somlo táng, eshi tang sha hun i miikkhi. 26Nim aa han min chammatakoi nim ikelwut tang wang ang min. 27I kelwut tang aa iraaq tat eq aa; nga ning usam eq ang, etho ning aa i jiji phan aa. 28Nga ning ma pattuk rollung kot ang, ning baluk otho ti moq angna, etho utang eq tho ning tha ijak wang jin nal moq angna. 29Iwa sha thaji phey náng ajong; Iwa eq ning tha nga ma kotaphang, etho utang eq tho ning sha Iwa jakwang jin nal moq. 30Nga nia Iwa ashey.”

31Jehudi tang aa Jesu tha pat rangma long tang tha wey tun ta.

32Jesu aa ning ma batta, “Nga nim ma Iwa ching kowang jaqhal jaksom daqhan takhi taphang; iri tang riwang bari jaksom rima nga raa long eq pat ma tathin phin?”

33Jehudi tang aa thawel batta, “Jaqhal jaksom rangma í aa nang pat phami; etharin Shkewa jashit raaq tungkang o etho nang miq ang eq nang ni nang raa Shkewa tahun u thima patphi.”

34Jesu aa ning ma thawel batta, “Nim thong na thawit moq i, Shkewa batta, ‘Nim raa rangwa tang.’ 35Hiqtang aa usam eq i Asang likwit na chamlang taka tha ira salwet rangma asing; etho Shkewa bari miqtang ma uraaq bat aa, eshi miqtang shima hun rangwa tang ta hal aa. 36Iwa nga tal eq mingkang náng takat taphang. Nga Shkewa Miqwasa ta batta phang thima chamal eq nga Shkewa tha junnam táng ta nim raaq inn. 37Nga Iwa jaksom tang som mong ang jo nim aa nga nak hanphin. 38Nga iri tang raa somlo ang jo tho, nim aa nga ma han phamin ang inn jo tho ijaksom ri hanphin, irimal ang ajo nga Iwa o etho Iwa nga o ta nim aa usam eq nin.”

39Ning aa piq tha lot ma wey tathin ta, etharin piq ning jakwang thalat chuwang ta.

40Piq Jordan adak kang kona John aa jung thalam kot chey ta haq thináng qhing chuwang eq, eshina tong ta. 41Miq daqhan piq rel náng thu eq raaq ta, “John patja jaksom takhi moq angta, etharin John aa iri miq rangma tung aa raaq batta thaji tha asing angta.” 42Eshina miq daqhan eq Jesu tha kam ta.

Currently Selected:

John 10: Mmmm

Highlight

Copy