Acts 28

Jung jaktung haq Malta na

1Í ukang thináng thu i tho iri haq miing raa Malta ta samti. 2Eshiwang miqtang aa í ma rapney tinshi takhi taphi. Rangchey tungkang o rapney songta, ethi rangma eshiwang miqtang aa wal tak eq í tha tatong ma kot taphi. 3Paul aa chan tha som eq wal tak atho ashey pu eq ujak o kak ta. 4Malta wang miqtang aa ira siin eq ning ni ning jaktung na wanta, “Iri miq raa miq tatiktey, piq jung wang lun eq thupha jo tho piq khangrang eq thalun ma kot moq.” 5Etharin Paul aa ujak tha thamot eq pu tha walnáng taqhak chakta etho piq chamtho ang moq angta. 6Malta wang miqtang aa piq jak uwung angna tia piq sha tik eq ngak na bo ta banta. Daklot ban jio chamtho ang moq angta ta khi eq, ning tinthin tha kaley angta etho ning aa batta, “Piq ashey rangwa.”

7Eshiwang anitom alo na, Malta wang ajongwa Publius pik angta. Piq aa í tha haltaphi etho saltom eshina tatong taphi. 8Publius wa tha kho mok etho wok tak eq jip ching na wolta. Paul uhimnáng wang eq, romtam chuta etho piq haan o jak tha shing eq taqhal ta. 9Etha siin eq eshiwang thaji atak miqtang tha Paul jamnáng thuta etho ning uqhal angta. 10Ning aa í ma uphan phan kot taphi, etho í eshiwang ukatma sey ang i tho, lam na chamlang ráa aa sha í ma kot taphi.

Malta wang Rome na

11Japi tom jio í Alexandria wang ashey waqwan o qhung eq kati. Eshi waqwan miing sha “Khangpit mal rangwa” angta. Eshi waqwan sha Malta na rangsong tok thun ma banta. 12Í Syracuse náng thu eq saltom eshina tongti. 13Eshiwang í aa waqwan o ka eq Rhegium náng thuti. Saal dak o saalji kowang rangpong ta etho saalni jio í Puteoli samhaq náng thuti. 14Í eshina chamtey uhantey tang jamoq tachong ti etho ning aa í ma saal sanat tong ma batta. Etho irimal ang eq í Rome náng kati. 15Rome wang uhantey tang í thuphi ta tat eq ning í jamoq tachong rangma alo haq Appius nia “Atom winwa tongching him” ta thamiing aa tangwang sangching katang wang thu tapha. Paul aa ning jamoq tachong eq, Shkewa ma kechu ajong kot ta etho ning aa tinthajong ta.

Rome na

16Í Rome náng thok jio Paul sha ban ma ralkoltey ashey tha shing eq utin nuk mal tong ma kot ta.

17Saltom jio Paul aa Jehudi solwa tha raaq wan ma halta. Ning rong tathung atho, piq aa batta, “I no nia pho tang, hiqtang miqtang nia hiqtang thong tashit ma chamtho somlo mong angtáng, etha otho nga raa Jerusalem náng lo eq Rome na chuk náng sak taphang. 18Rome miqtang aa nga ma pit jio ning aa nga sha qhap ma tathin ta chammatakoi nga utik ang ching chamtho jashit somlo mong angtáng. 19Etha otho, baluk o Jehudi miqtang tat moq angta, nga tho ajong lungwang jakho o lang ma chu táng. Nga i miqtang ma chamtho jashit tathin mong angtáng. 20Ethirangma nga nim jamoq raaq wan ma hal taphang. Israel miqtang eq barima tungmang shing aa piq tungkang o nga raa iri janru wang qhak eq shing aa.”

21Ning aa piq ma batta, “Í ba tung aa raaq Judea wang chamtho raaq kap tat mi angti, etho í miqtang wang utang tho eshiwang thu eq ba tung aa raaq chamtho jashit bat moq angta. 22Etharin í aa ba nung wang tat ma nuk i, chammatakoi thaji haq na iri raaq raa jashit ta raaq aa.”

23Eshirangma ning aa Paul jamoq tachong ma saal shey shingta etho eshi saal tho daqhan miqtang Paul tong aa haq thina thuta. Rangnap wang rangja náng piq aa ning ma Shkewa mungtan raaq batta, piq aa ning ma Jesu raaq tha rangsamal likwit etho Moses thong wang raaq tha batta. 24Chamtey miqtang piq raaq tha tat eq aqhal kapta etharin adak tang aa han moq angta. 25Ning ni ning jaktung o jin pung moq ang eq ning eshiwang chuwang ta, chammatakoi Paul aa batta, “Asang Tsija rangsamal Isaiah ta ning rangma batma kotta! 26Piq aa batta:

Ka eq miqtang ma bat inn:

Nim aa utat eq chey nin etharin chamtho sam min ang nin;

nim aa ubi eq chey nin etharin chamtho khi min ang nin.

27Chammatakoi nim jaktung na chamtho ahung,

Ning naq nia miik eq tángchak ta.

Etha ang moq o ning miik eq ukhi eq wangta,

etho ning naq eq utat eq wang ta,

Ning thung wang sam eq ijamnáng wel wang ta. Shkewa raaq aa,

etho nga nim raa taqhal eq ma tathin ang.”

28Jio paul aa batta: “Nim aa usam eq wang tin, Shkewa ngarey wang lunwan raaq Gentile phan miqtang rangma shingta etho ning aa uhan eq na!” 29Piq aa irimal bat jio Jehudi miqtang ning jaktung o thadan eq chuwang ta.#28:29 Chamtey Greek likdap tang na verse 29 ahung.

30Pang ni nángduk Paul ashey himna tong ta, etho eshina utang otho tachong ma thuta piq rapney sungrang eq ning jamoq tachong ta. 31Piq amaan tho cho hung aa, Shkewa mungtan raaq batta etho Teyhungwa Jesu Khristo tung aa raaq tatal ta.

Currently Selected:

Acts 28: Mmmm

Highlight

Copy