Romans 1

Taphang raaq

1Jesu Khristo sanga etho apostle ang rangma halta etho Shkewa tungtang qhal phanchan ma taltey Paul chingko wang.

2Tungtang qhal shey jakho wang hun urangsamal tang nun o asang likwit na rangtum ta. 3Tungkang qhal sha Umiqwasa tung aa raaq. Piq sha mingkang na David phi aa lí ang eq changta. 4Etho Asang Tsija tarong o utik wang weyjey tungkang o piq sha Shkewa Miqwasa ta takhi ta. Piq sha hiqtang Teyhungwa Jesu Khristo. 5Piq tungkang o hiqtang aa ráng manchan nia apostle jaksom kapti, irimal ang eq piq miing rangma thaji phan ajat miqtang han ching etho piq raaq tat ching. 6Eshi tang shiwang nim tho atha, bara Jesu Khristo rang ang rangma hal taphin.

7Rome na tongtey nim thaji rangma nga wit ang, barima Shkewa tinma aa etho u asang miqtang ang rangma halta.

Hiqtang Shkewa etho Teyhungwa Jesu Khristo ching kowang ráng manchan nia nungmay nim aa cham kap inn.

Rome náng katma tathin

8Jakho nga nim thaji rangma Jesu Khristo tungkang o i Shkewa ma kechu ajong ko ang, chammatakoi nim kam tung aa raaq sha thaji mingkang na wantit aa. 9Nga nim chammal eq tasik phang, eshima Shkewa sha i miikkhi kottey, Umiqsawa tungtang qhal phanchan ma nga itin thaji ko eq jaksom somlot ang. 10Chammal eq tho thanga nim rel náng katma Shkewa mongtham o lam lak rangma, nga baluk o romtam chu ang, nim tasik eq chu ang. 11Chammatakoi nim sha tharong ma Tsija sunmaan kot rangma nim jamoq tachong ma nga rapney nuk ang. 12Nga iri rangma bat phang, nga nim jamoq ang eq, nim kam tungkang o etho nim aa i kam tungkang o tintharong kap nin.

13I no ni pho tang, nga nim jamnáng katma jukwet tathin táng ta nim aa sam rangma nga nuk ang, etharin chamlilang tungkang o nga kap kapha mong ang taphang. Chamal nga adak Gentile tang jaktung na jaksom somlo eq ukam eq ma kaley táng, eshimal hun nim jaktung na somlot ma tho unuk ang táng. 14Greek miqtang nia Greek ang moq tang etho asam atol tang nia asam atol ang moq tang ning thaji ma nga tungtang qhal phanchan ching ta nga tathin ang. 15Eshirangma nga nim ma tho bara Rome na tong inn, tungtang qhal phanchan ma rapney ram eq kacha ang.

Tungtang qhal tarong

16Nga tungtang qhal ma rakri mong, chammatakoi esha kamtey tang thaji rangma, phang Jehudi tang ma eshi jio Gentile tang ma, lunwan kap rangma Shkewa tarong. 17Chammatakoi tungtang qhal sha Shkewa asing sha takhi aa, iri asing raa phang wang tha uthun náng thula kam wang kap aa; asang likwit na thawit thimal, “Asing miq sha kam wang tong na.”

Ngarey miqtang ma Shkewa ahan tinkhat

18Bari miqtang eq asing sha ning anaan wang taput shing aa, Shkewa ahan tinkhat tha eshi miqtang thaji ngarey nia anaan sho mungtan wang takhi aa. 19Shkewa tung aa raaq ning aa usam eq aa chammatakoi Shkewa ning ma esha takhi aa. 20Mingkang phanghun rangham wang Shkewa pattuk tarong nia asang dangjang sha bara khi moq, piq aa chamlang hunta shiwang esha jaqhal eq takhi ang aa, irimal ang eq Shkewa sha sam moq ta miqtang jin raaq moq. 21Ning aa Shkewa tha sam eq tho piq ma rangka kot moq etho kechu ajong kot moq, etharin ning tinthin sha shiti ta etho ning thung atal sha anak wang shey tita. 22Ning aa ning ni ning sha asam atol ta bat aa, etharin ning sha athom.

23Ti moq phan Shkewa sha shumnuk hunga, ning aa utik phan miqna etho wo etho jatngam etho jongbal tang shila sha shumnuk aa.

24Eshi tungkang o Shkewa ning mongtham mal anaan rangma shing chakta etho ning aa ning hanphung o ning jaktung na rakri jaksom somlo aa. 25Ning aa Shkewa asing tha alik ma kaley aa etho Shkewa sha shumnuk hunga, piq aa hunta phan sha ning aa shumnuk aa etho nong aa; Shkewa sha pattuk rangma rangka ching! Amen.

26Eshirangma Shkewa ning tha anaan etho rakri tinthin o shing chakta; ning miqnu tang tho miqwa tang jamoq ang moq ang eq adak miqnu tang jamoq rum jeep aa. 27Eshimal hun miqwa tang tho miqnu tang jamoq ang moq ang eq adak miqwa tang jamoq rum jeep aa. Miqwa tang adak miqwa tang jamoq rakri jaksom somlo ta etho iri tungkang o ning aja somlot rangma chamlang tsamnang kap ching sha ukap eq ta.

28Ning aa Shkewa sha sam ching ang moq ta tathin tungkang o Shkewa ning tha alik tathin rangma shing chakta, irimal ang eq ning aa somlot ching ang moq jaksom sha cham somlo aa. 29Ning thaji alik, anan, angim, etho dandey eq shey ti aa; ngiljo etho tatik etho thamol etho udip etho aja eq shey ti aa. Ning aa miqdak tung aa raaq alik bat aa, 30etho aja raaq bat aa. Ning sha Shkewa miiksuk tey, japjotey, tinqhat tey etho tharangkatey. Ning sha anaan jaksom rangma anal lam takhongtey etho ning sha nu nia wa raaq tat moqtey tang. 31Ning sha thung ahungtey etho ning raaq mal somlo moqtey, tinmat nia tinnin takhi moq tey. 32Irimal jaksomtey sha utik ang ching ta Shkewa asing thong aley sha ning aa sam eq aa. Irimal sam eq tho ning aa esha hun somlo chey roq eq aa etho irimal somtey adak miqtang ma tho tintharong bat aa.

Currently Selected:

Romans 1: Mmmm

Highlight

Copy