Acts 27

Paul Rome náng kat

1Í italy náng kat ma ning aa tathin ta, ethi rangma ning aa Paul etho chukna tongtey adak miqtang ma Julius ta thamiing aa ashey ralkoltey tang solwa ma kotchak ta. Piq “Ajong lungwang ralkoltey waan tang” ta thamiing aa Rome ralkoltey waan wang angta. 2Í aa Adramyttium wang ajong waqwan o qhung ti, eshi ajong waqwan sha Asia mung jungshi kang náng kat ma kacha chol angta etho í ukat ang chey ti. Aristarchus ta thamiing aa ashey miq í jamna angta, piq Macedonia mung wang Thessalonica mung wang angta. 3Saal dak o í Sidon mung náng thuti. Julius aa Paul ma rapney tinshitta etho piq ma chamlang ràa aa sha kotma piq tha unokwa tang jamoq tachong ma kot ta. 4Eshiwang í thalat ti etho rangpong adak kowang mot tungkang o í jung jaktung haq Cyprus adak kangko ang eq kati. 5Í aa Cilicia nia Pamphylia lit eq jungshi wang Lycia mung wang Myra samhaq náng thuti. 6Eshina, ashey ajong waqwan kapti bara Alexandria wang thutapha etho Italy náng kata. Eshi ajong waqwan sho í tha ajongwa they thanop kot taphi.

7Saal daqhan í jangjang eq kati etho ethi jio rapney tsamnang eq í Cnidus samhaq náng thuti. Rangpong tungkang o í jakhonáng tho jin kami angti, ethirangma í Salmone tha lit eq jung jaktung haq Crete kang konáng thuti. 8Í jung kang kang o kati etho rapney tsamnang ang eq Lasea samhaq relna “Waqwan lang ma jaqhal haq” Ta thamiing aa ashey haq náng thuti.

9Í eshina alo hal tongti, etho eshi rangham sho jungshi wang jakho konáng kat chey ma ahal angta, chammatakoi Karok kara saal#27:9 Karok kara saal sha rangsong thuwey moq jakho kut kan ta. Eshi rangham o saal jashit angta, eshirangma jungshi o kat sha ahal angta. uthun sey angta. Eshirangma Paul aa ning ma batta: 10“Miqtang, hiqtang rapkat ang ijo rapney ahal angna ta nga khi ang; eshirangma tangwang tang nia waqwan sha rapney shitina etho miqtang raa tho utik mok angna.” 11Etharin, ralkoltey ajongwa tang aa waqwan ajongwa nia tangteywa raaq tha tatta etho Paul raaq tha tat moq angta. 12Haqkhuk tok o eshina tong ma qhal moq angta; iri rangma waqwan wang daqhan miqtang thalat eq Phoenix náng katma tathin ta, etho jin tong ang inn jo haqkhuk tok o eshina hun tong ma tathin ta. Phoenix sha waqwan lang ching haq angta etho jung jaktung haq Crete na angta etho esha saalnop nia salphey etho saalkhong nia salphey kot na angta.

Jungshi rangpong

13Saalji kowang rangpong amaan sa pongta, etho miqtang they ning aa chamlang tathin aa sha jin somlot eq na ta tathin ta. Ethi rangma ning aa waqwan qhakshingta ru tha khangta etho Crete jung kang kangko ang eq kata. 14Etharin “Saalnop saalkhong rangpong” ta thamiing aa achan rangpong thuta; esha jung jaktung haq wang thok mot ta. 15Ethi rangpong they waqwan ajong tho tatúng ta etho waqwan tat weyma ang aa tha tho jin wey moq angta, ethirangma í thaji tungmang tha shingchak eq rangpong eq banáng sol aa thináng sey kati. 16Baluk o í jung jaktung haq aa aming Clauda saalji konáng kati, í aa rangpong wang anitom uhom kapti. Ulun ang ching aming waqwan sha í aa rapney ahal kapti. 17Ning aa esha hum eq ru eq ajong waqwan tha tim eq khakta. Syrtis na phang phòng sho thabot moq angna ta ning ucho angta, ethi rangma ning rangkho wang khat lo tha lak chakta etho ajong waqwan tha rangpong wang weyma kot ta. 18Rapney rangpong chey ta, ethirangma, saal dak o miqtang they waqwan wang tangwang tang tha jung náng phang tun bichak ta. 19Etho saal dak o, miqtang aa ajong waqwan wang likkong sanlak nia khing aa ru tang tha bichak ta. 20Saal daqhan wang í aa rangsal nia taseyti khimi angti etho rangpong rapney achan pong aa. Í aa atharang tong ni ta tungmang mi sey angti.

21Saal daqhan phasat phasa mi jio, Paul aa ning jakho o lang eq batta, “Nim Crete wang kami angwang ti ta nga bat taphang raaq tat tin jo hiqtang aa itan tsamnang kap mi ang wangti. 22Etharin thanga nim tinthajong ching ta nga nim ma bat phang chammatakoi nim jaktung wang utang tho ti moq angna, iri waqwan raa hun shitti na. 23Nga Shkewa ráng etho piq sha shumnuk ang, baja rangpal o eshi Shkewa rangkamwa they ijamnáng thutapha. 24Etho batta, ‘Paul, nak cho u. Nang ajong lungwang jakho na lang ching. Etho Shkewa nang ma nuk rangma bajamna chamtan miqtang kata thaji sha atharang tatong na.’ 25Ethirangma, miqtang, tinthajong inn chammatakoi piq aa chamta batta eshimal hun angna ta nga Shkewa sha han ang. 26Etha otho hiqtang jung jaktung haq ashey kang o thabot ching.”

27Saal asi saal bali sey angta, etho í Mediterranean jungku jaktung na rangpong chey ang eq tongti. Palthung kam mal o í haq qhuk náng thuti sey ta waqwan wey tey tang they tathin ta. 28Eshirangma ning aa umap eq ching ru tho long tha khak eq jung náng bichak ta etho jung tha 40 meter alip ta samta. Anitom alo náng ka atho, ning aa eshimal hun wey thakta etho jung sha 30 meter alip na ta samta. 29Ning aa waqwan raa long o tathu na ta ucho angta, ethirangma, waqwan jiko wang jankang bali bichak ta etho kalo rangney angma romtam chuta. 30Waqwan weytey tang tha waqwan shing chak eq kat ma tathin ta; ning aa waqwan tha khak ma takhi eq ulun ang ching aming waqwan tha latma tat reyrang ta. 31Etharin Paul ajongwa nia ralkoltey tang ma batta, “Waqwan weytey tang tha waqwan na tong moq ang ajo nim utang tho lun min ang nin.” 32Eshirangma ralkoltey tang ka eq ulun ang ching aming waqwan janru thaji tha chonduk chakta etho eshi aming waqwan tha katma kot ta.

33Rangney angma jakho tho, Paul aa miqtang thima phasat ma batta, “Nim aa saal asi saal bali ban inn sey, etho iri mong ro nim aa chamtho phaksa min. 34Nga nim ma bat phang phaksat phaksa inn; ulun angma phasat eq ching. Nim kho wang khorun ashey tho matwang moq angna.” 35Ira bat jio, Paul aa amaan banlo tha som eq thaji miqtang jakho na Shkewa ma kechu ajong kot ta, etho banlo tha pin eq phakta. 36Ning tin tha thajong ta etho ning aa anitom phaksa ta. 37Eshi waqwan sho 276 miqwa angta. 38Thaji miqtang aa phaksat phaksa jio ning aa waqwan tha tachang ma wong khak tha jungnáng bichak ta.

Waqwan tha tathak aa

39Rangney sey ang atho, waqwan weytey miqtang they haq qhuk tha tho sing moq angta, etharin ning aa ashey phang haq khita, etho waqwan raa phang haq sho shing ma tathinta. 40Ethirangma janru tha chonduk eq jungku náng bichak ta, waqwan wang ru tang tha qhang chakta. Rangpong eq jakho náng rapkat ma tathin eq waqwan wang qhat ta tang tha anitom aluk náng tun ta. 41Etharin waqwan tha phang phong sho thabot ta etho eshina manti ta. Waqwan jakho kotha manti ta etho jiko thina jung mot thiwang eq thaji tha tatuk ta.

42Chuk wang soltey miqtang sha jap eq nak cham jol aa ta ralkoltey tang ning sha tatik ma tathin ta. 43Etharin ralkoltey solwa aa Paul sha thalun ma nuk ta. Eshirangma piq aa eshi tinthin sha utáng eq ta. Piq aa batta, utang tang eq jung mey jin jap aa eshi tang shi jung náng wuk eq ukang náng ka inn. 44Etho araltey tang tha bang pin nia waqwan pin sha lo eq ukang náng ka inn. Etho irimal ang eq thaji tha ukang náng thuta.

Currently Selected:

Acts 27: Mmmm

Highlight

Copy