Acts 26

Piq ni piq tha ulun angma Paul aa Agrippa jakho jakho o bat aa

1Agrippa Paul ma batta, “Nang ni nang lun ma chamlang bat ching sha jin bat eq u.”

Paul aa ujak tun eq etho piq ni piq ulun raaq batta, 2“Lungwang Agrippa, nga thaney aa ba jakho na ulun angma raaq jin batphang ta i khangrang rapney jaqhal. Nga chamtho jashit somlo mong angtáng bara Jehudi tang aa imiing o tashit somlo ta. 3I khangrang asing hung aqhal, chammatakoi nang aa Jehudi tang thong sha jaqhal eq sam u. Ethirangma tinshit eq iraaq thaji ri tat u.”

4“Nga nijang wang chamal angtáng tha thaji Jehudi tang aa usam eq aa. Jakho o i mung na etho ethi jio Jerusalem na i rollung sha chamal angta tha ning aa thaji usam eq aa. 5Ning thaji eq nga raa jakho wang hun samphang, etho ning unuk ang ajo nga ashey Phorisi ang eq tho chamal eq tong táng ta ning aa jin bat eq aa. Phorisi miqtang Jehudi tang jaktung na rapney aheng ta nang aa usam eq u. 6Etho thanga nga tsamnang na thalang phang chammatakoi Shkewa í tey aa wa tang ma chamlang ta rangtum ta tha nga tungmang eq ang. 7Í aa asi ani phan miqtang eq paltáng saltáng Shkewa sha shumnuk ti ta ang ajo ning aa iri rangtum sha ukapni ta tungmang ta. Etho Agrippa Lungwang, iri tungmang rangma nga ma Jehudi miqtang jashit ta raaq phang. 8Nim thaji bara thaney aa irina atha, Shkewa utik ang sha jin thalun eq na ta nim aa cham ma jin han min aa?”

9“Nga ni nga tho Nazareth Jesu miing sha miiksuk eq chamli jin som ang sha som ching ta tho tathin táng. 10Jerusalem na nga irimal hun somlo táng. Ajong tingwa tang authority wang nga Teyhungwa miqtang daqhan sha chuk náng saktáng; etho ning tatik ma raaq wan atho nga tho aqhal ta bat táng. 11Tak daqhan nga ning ma synagogue na tharo tatsam ma kot táng, etho kachang chang aa ning kam sha thamat ma tat somlo táng. Ning ma nga eshitan qha táng, ethirangma nga adak samhaq náng ka eq ning sha tahikham táng.”

Paul aa tin kaley tung aa raaq bat aa

(Acts 9:1–19; 22:6–16)

12“Ajong tingwa tang wang likwit thawit eq nga iri rangma Damascus náng katáng. 13Agrippa lungwang, rangney kam pang tho, lamna nga rangsal náng eq rapney alang hal ashey watlit khi táng, rangkang wang ka tapha etho nga nia ijam wang miqtang tha tim chak taphi. 14Í thaji haq náng wolti, etho nga ashey raaq Hebrew raaq wang raaq aa tha tat táng, ‘Saul! Saul, nang aa nga ri cham ma tahikham phu? Nang aa nga tatak ma ka eq nang tha hun tak u.’ 15Nga pit táng, ‘Teyhungwa, nang utang aa?’ Etho Teyhungwa thawel batta, ‘Nga Jesu, bara nang aa tahikham phu. 16Etharin tunshat u etho baja o lang u. Nga nang raa ijaksom tasom lot rangma barel náng thu taphang. Thaney nang aa chamlang khitu etho inapja chamlang khinu iri tang ri miqtang ma bat u. 17Nga nang raa Israel miqtang etho Gentile miqtang jamnáng takat phang, etho nga nang sha thalun phanáng. 18Nang aa ning miik sha ulak eq ching etho rangnak wang rangwung náng sol ching etho Thangwa tarong wang ning Shkewa jamnáng sol ching, irimal ang ajo ning ngarey sha tolchak eq na etho Shkewa umiqtang rangma bara haq shingta sho ning aa tho eshi haq sha kapna.’

Paul aa ujaksom tung aa raaq bat aa

19“Agrippa Lungwang, nga mungtan wang màng sha dan mong angtáng. 20Jakho o Damascus na etho Jerusalem na, ethi jio thaji Judea mung na etho ethi jio Gentile phan ma tho, ning ngarey wang kaley ching etho Shkewa jamnáng wel ching etho ning jaksom shey ngarey wang kaley ti ta takhi ching ta nga phanchan táng. 21Iri rangma Jehudi tang chamtey eq nga rangnuk him wang lo eq nga tatik ma tathinta. 22Etha otho, thaney nángduk Shkewa nga raa nong phang. Etho iri rangma thaney aa nga irina lang eq ajong aming thaji miqtang ma i miikkhi raaq jin bat eq ang. Nga chamta batphang raa rangsamal tang nia Moses atho iritang raa angma batta. 23Messiah ma tintashit kapching atha, etho piq aa utik jio wey jey tang wang jakho na ang eq, Jehudi tang etho Gentile miqtang ma ngarey wang thalun eshi alit tung aa raaq thoksom phana.”

24Paul aa irimal piq ni piq thalun ma bat atho Festus ring eq batta, “Paul, nang ujat sey ang u! Nang aa itan lik aa li phat eq nang ujat sey ang u!”

25Paul aa batta, “Ajong Festus, nga aja ang mong. Nga chamta batphang thaji sha tathin eq asing batphang. 26Agrippa Lungwang, nga cho hung aa barel o raaq jin bat eq phang, chammatakoi nang aa iri thaji raaq raa usam eq u. Iritang raa tapu eq anak na ang moq ta. 27Agrippa Lungwang, nang aa rangsamal tang ri uhan eq u i? Nga usam eq ang, nang aa uhan eq u!”

28Agrippa Paul ma batta, “Itan akum rangham o nga raa phong miq ma kaley pha nu ta nang aa tathin u i?”

29Paul aa thawel batta, “Aney rangham ang ajo tho tia ahan rangham ang ajo tho, nang chen ang mu, etharin thaney aa i raaq tattey thaji eq, iri janru raa chen shingchak eq, adak thaji raaq na nga mal angma nga Shkewa ma romtam chu ang.”

30Etho Lungwang, governor, Bernice etho thaji miqtang shatta, 31etho ning eshiwang thalat eq ning ni ning jaktung o batta, “Iri miq rey tatik eq ma tia chuk o sak ma chamtho somlo moq.” 32Agrippa aa Festus ma batta, “Iri miq rey ajong lungwang jakho o lang ma chu moq angta jo piq sha uqhap eq chak wang ta.”

Currently Selected:

Acts 26: Mmmm

Highlight

Copy