Acts 24

Jehudi miqtang aa Felix jakho na Paul tha tashit aa

1Saal banga jio ajong tingwa tang solwa Ananias tha Casarea náng kata etho chamtey miqlang tang etho Tertullus ta thamiing tey ashey thong samtey ujamoq o nok kata. Ning Felix jamnáng thu eq Paul jashit raaq tha batta. 2Paul tha eshináng halta etho Tertullus aa piq jashit tha governor jakho na batta.

“Í ba jaktáng o tong eq pang daqhan náng thula nungmay kapti etho nang aa i mung sha jaqhal kaley ma jaksom somlo tu. 3Ajong Felix, í thaji haq na etho thaji rangham o irimal hun bat i, etho iri tang ma í nang ma kechu ajong kotma nuk i. 4Nga ba rangham sha alo somma nuk mong, req iri rangma tinshit eq iri raaq ri tat u. 5Iri miqwa raa rapney tharotatsam tey ta í aa khi i; piq raa thaji mingkang ro Jehudi phan jaktung na ringrak aa etho piq raa Nazareth wang solwa. 6Piq aa Rangnuk him thanan ma angta etho req í aa piq raa loti. 7Etharin ralkoltey tang solwa Lysias nang thu eq kachang chang aa í jaktung wang piq tha sol chuwang ta.#24:7 Chamtey Greek likdap tang na verse 7 ahung. 8Nang ni nang aa piq ma pit ujo í aa piq ri chamlang ma jashit ta raaq i sha nang aa jin samnu.” 9Jehudi tang sha iri jashit raaq o rum ta etho ira khakla ta batta.

Piq ni piq tha ulun angma Paul aa Felix jakho bat aa

10Governor they Paul raaq bat rangma jak tha takhi ta tho Paul aa batta, “Nga usam eq ang nang aa iri mung raa jakho wangduk phung u, etho eshirangma nga sungrang eq i raaq baja kho o batphang. 11Nang aa tho jin sam eq u, saal asi saalni jakho nga Jerusalem náng shumnuk ma katáng. 12Jehudi tang aa nga raa rangnuk him na utang jamoq tho thamol ang aa tha khi pha mong angta pha etho synagogue tang na ang moq ang ajo ajong samhaq na miqtang sha polrik ang tha khi phamoq angta pha. 13Ning aa thanga nga ma chamlang jashit kotta sha tho chamtho jin takhi moq angna. 14Etharin chamli khakla sha nga bajakho na batphang: ning aa jashit ta bat aa eshi lam na qhing eq nga í tey aa wa Shkewa sha shumnuk ang. Nga Moses thong sha tho uhan eq ang etho rangsamal tang likwit na chamlang thawit aa sha tho uhan eq ang. 15Shkewa jamoq ning aa chamlang ta tungmang aa sha nga tho eshi tungmang sha shing ang. Eshi tungmang sha irimal, thaji miqtang sha jashit jaqhal ang ajo tho, utik jio weylun angna. 16Ethirangma nga Shkewa jakho na etho miqtang jakho jaqhal tinhol eq salwet tong ang.

17“Daklot pang Jerusalem phey na tong jio, nga i miqtang ma ngin som ma etho kholik kot rangma nga irináng thu táng. 18I tasang kut aa kan jio nga irimal som ang tha ning aa nga raa rangnuk him na khi taphang. I jamoq miq waan tho ning aa khi moq angta etho nga chamtho jashit som chey mong ang táng. 19Etharin Asia mung wang chamtey Jehudi miqtang eshina angta; ning aa bajakho thu eq í jashit jaksom raaq bat ching. 20Ang moq ang ajo iri miqtang jaktung wang ashey eq nga Rongq jakho na lang ang tho chamlang jashit jaksom kapti ta jin bat eq aa. 21Nga eshina lang eq irimal ring táng, ‘Utik wang weyjey na kam tungkang o nga irina lang ang.’ Eshi bat sha shing eq ning aa i jashit adak sha chamtho jin bat moq angna.”

22Ethi jio Felix, barey lam tung aa raaq jaqhal eq sam ta, piq aa tathun ma irimal batta, “Baluk o ralkoltey tang solwa Lysias thu phana, esha sho ba phung sha angna.” 23Paul sha ubantey jamoq shing ma Felix aa ajongwa tang ma raaqkhat kot ta etho piq shi chomrey taqhing inn ta etho piq ma chamlang raa aa sha kotma unokwa tang jamoq tachong ma tho batta.

Paul Felix nia Drusilla jakho na

24Saltom ni jio, Felix aa uhimteynu Drusilla tha sol eq thuta. Eshinu tha Jehudi angta. Piq aa Paul tha halta etho Paul aa Khristo Jesu kam tung aa raaq batta etho piq aa tatta. 25Etha otho Paul asing raaq, piq ni piq tatáng raaq etho uthok angpha phung raaq bat atho Felix ucho ang eq batta, “Nang thanga ka u. Nga rangham kap ang jo nang uhal eq phanáng.” 26Felix Paul ching wang ngin som ma nuk ta, ethirangma piq aa Paul tha jin hal chey ta, etho piq jamoq raaq jin wanta.

27Pang ni jio, Felix kaley Porcius Festus governor ang eq thuta. Felix Jehudi jamoq jaqhal angma nuk ta ethirangma piq aa Paul tha chuk o hun shing chakta.

Currently Selected:

Acts 24: Mmmm

Highlight

Copy