Acts 23

1Paul aa Rongh miqtang konáng achal eq siin eq batta, “I no nia pho tang nga thaney náng thula Shkewa lam na chamal tong táng shima ithung alang sey.” 2Ajong tingwa tang solwa Ananias aa Paul relna langtey miqtang thima Paul sham o watma raaqkhat kot ta. 3Paul aa piq ma batta, “Nang thinn eq jikchol shing aa paal thimal! Shkewa nang raa wat phanu. Nang aa thong mal nga raa khaphung ma tong u, etharin nga raa watma raaqkhat kot eq nang aa thong raa shing chak tu.”

4Paul relna langtey miqtang aa batta, “Nang aa Shkewa ajong tingwa solwa tha tharakri tu.”

5Paul aa thawel batta, “I no ni pho tang, piq tha ajong tingwa solwa ta nga sammong ang táng. Chammatakoi Asang likwit na thawit aa, ‘Ba miqtang jaktáng o shingtey shi jashit ta nak raaq u!’”

6Paul aa eshina langtey miqtang wang chamtey tey Saddusi etho chamtey tey Phorisi ta khita etho piq aa Rongq ching konáng ring eq batta, “I no ni pho tang, nga ashey Phorisi miq, etho Phorisi miqwasa. Utik tey sha weyjey angna ta tungmang tungkang o nga iri Rongq na lang ang.”

7Iri raaq bat ji tho Phorisi etho Saddusi tang thamol angta, etho uwan miqtang tha thaphal angta. 8(Saddusi tang aa miqtang utik wang wey jey moq ta etho rangkamwa tang tia Tsija ahung ta batta; etharin Phorisi tang aa iri thaji tang raa atha ta han aa.) 9Uring tha rapney sey chan wangta, etho Phorisi tang wang chamtey thong samtey tang lang eq batta, “Í aa iri miqwa ro jashit kap khimi angti! Tsija nia rangkamwa aa piq jamoq wanta hey.”

10Thadan tha theychan sey angta etho ralkoltey tang solwa tha Paul raa ning tikwat eq tapchak na ta ucho sey angta. Req piq aa ralkoltey tang thima anim náng ju eq Paul sha miqtang jaktung wang sol eq pangpong thung náng sol kat ma batta.

11Ethi rangpal tho Teyhungwa Paul relna lang eq batta, “Nak cho u! Nang aa ba miikkhi tha Jerusalem na battu, thimal nang aa Rome na tho irimal hun som ching.”

Paul tatik ma raaq

12Inam rangnap mal tho Jehudi tang tachong eq raaq rum wanta. Ning aa Paul sha tatik wey moq ling chamtho phaksat hunga tong ma ashey eq ashey jaktung o rangtum ta. 13Eshina raaq rum wantey tha rokbali náng eq tho ahan angta. 14Ethi ji tho ning aa ajong tingwa tang etho miqlang tang jamnáng ka eq batta, “Í aa Shkewa jakho na aheng rangtum ti, Paul sha tatik wey moq ling chamtho phaksa mi ang ni. 15Thanga nim nia Rongq wang miqtang eq Rome ralkoltey tang solwa ma Paul tung aa raa sha jaqhal eq sam ma nuk inn ta takhi eq Paul shi nim jamnáng takat ma bat inn. Etharin piq iri náng thuwey moq jakho í aa piq sha tatik eq chak ni.”

16Etharin eshina Paul ma una sa miqwasa angta etho piq iri raaq tang raa tat ta etho piq tha pangpong thung náng ka eq Paul ma thaji raaq tang tha batko chakta. 17Etho Paul aa ashey ralkoltey ajongwa tha hal eq batta, “Iri jaro sa ri ralkoltey tang solwa relnáng solkat u; piq aa piq shima raaq bat ma ta aa.” 18Etho ethi ralkoltey ajongwa they piq tha ralkoltey tang solwa relnáng solkat eq batta, “Pangpong thung na tongtey Paul aa nga raa hal eq iri jaro wa raa barel náng solkat ma batta, chammatakoi piq nangma raaq bat ma ta aa.”

19Ralkoltey tang solwa they piq jak tho lo eq adak konáng solkat eq pitta, “Nang aa nga ma chamlang ta batma taphu.”

20Piq aa batta, “Jehudi tang wang chamtey eq iri raaq raa kara ta, ning aa thaji raaq raa sam ma nuk aa ta takhi eq inap aa ning aa Paul raa Rongq náng takat ma nang ma batpha nu. 21Etharin nang aa ning raaq shi nak tat u, chammatakoi ning rokbali miq náng eq tho ahan piq rangma tapu eq ban na. Ning aa Paul sha tatik wey moq ling chamtho phaksat hunga tong ni ta rangtum ta. Ning irimal som rangma thaji kacha chol sey, etho ba khaphung sha chan ban aa.”

22Ralkoltey tang solwa they batta, “Nang aa nga ma batta phu shi utang ma tho nak bat u.” Etho jaro wa tha takatta.

Paul tha Governor Felix jamnáng takat aa

23Req ralkoltey tang solwa they piq ani ajongwa tha hal eq batta, “Caesarea náng katma shani ralkoltey tang kacha shing inn, roksanat mok roptey miqtang sol shinn etho shani jantong holtey miqtang kacha shing shinn etho rangpal akhu rangham o kat ching. 24Paul sha mok khona tatong eq governor Felix jamnáng solkat inn.” 25Etho ralkoltey solwa they irimal liklo witta: 26“Claudius Lysias wang Ajong governor Felix ma wit ang: 27Jehudi miqtang aa iri miqwa raa lo eq tatik ma tathin aa. Nga piq raa Rome miq ta kap sam táng, ethirangma nga ralkoltey tang jamoq piq raa thalun táng. 28Piq ráng chamlang jashit tha sam ma nga piq tha Jehudi Rongq náng solkat táng. 29Piq tha tatik ma ta aa etha ang moq o piq chuk náng sak shing ma piq jashit jaksom lo moq angta ta nga usam sey táng; ning thong o hun wan eq piq ma jashit ta raaq ta. 30Etho piq raa tatik ma raaq wan ta, ta nga kap sam táng, eshirangma kalo hun nga piq raa bajam náng takat ma tathin táng. Piq ma jashit ta raaqtey miqtang bajam náng ka eq raaq ma nga bat táng.”

31Ralkoltey tang aa chamal bat aa thimal somlo ta. Ning aa ethi pal tho Paul tha Antipatris náng thok solta. 32Saal dak tho jaa o qhing tey ralkoltey tang thawel ta etho mok o kattey miqtang tha nok kata. 33Ning aa Caesarea náng sey thok solta, likwit tha governor thima kotta, etho Paul tha piq jaknáng sey kochak ta. 34Governor they likwit tha phat jio nang bari mung wang aa ta Paul ma pitta. Piq aa Paul sha Cilicia wang ta samta tho 35piq aa batta, “Nang ma jashit ta raaqtey miqtang thok jio nga ba raaq tat náng.” Piq aa Paul sha Herod lungwang him o ubantey tang jamoq shing ma batta.

Currently Selected:

Acts 23: Mmmm

Highlight

Copy