Acts 20

Paul Mecedonia etho Greek na

1Ringrak thun jio, Paul aa uhantey tang tha kashey o hal eq ning ma tin tharong kot eq uthun raaq bat shingta etho piq tha Macedonia konáng qhing chuwang ta. 2Paul eshi thaji mung haq náng ka eq uhantey tang tin tharong raaq batta etho Greek náng thuta. 3Eshina piq japi tom tong ta. Baluk o piq Syria mung náng katma kacha atho Jehudi miqtang piq tha miiksuk eq ban siin ta; ira sam eq piq Macedonia ko o wel ma tathin ta. 4Pyrrhus miqwasa Sopater sha Berea samhaq wang, Aristarchus nia Secundus tha Thessalonica wang, Gaius sha Derbe wang, Tychicus nia Trophimus sha Asia mung wang, etho Timothy, ning Paul jamoq nok kata. 5Ning aa jakho Troas náng ka eq í tha banchey taphi. 6Wung moq phan banlo kut aa kan thun jio í Philippi wang waqwan o qhung ti, etho saal banga jio Troas na ning jamoq tachong ti. Etho eshina saal sanat tongti.

Paul Troas na thun ma thu aa

7Baluk o saal sanat phang saal o í arum aa banpan phaksat ma tong i tho Paul aa miqtang ma palthung kam nángduk raaq batta chammatakoi piq saalji na eshiwang chuwang sey angtey angta. 8Etho í thajoq ti aluk khok na daqhan nalpang jung chey ta. 9Eutychus ta thamiing aa ashey jaro tha doklungpo na tong ta. Etho Paul aa raaq daklot batchey atho jaro wa tha tasil qhong eq jibta. Ethirangma piq daptom him wang haq náng qhat ta. Miqtang aa piq tha tun atho piq utik sey angta. 10Paul anim náng ka eq jaro wa haan kho tho jib eq batta, “Nak cho inn, piq raa atharang!” 11Ethi ji tho piq aluk náng wey qhangta etho banlo tha pin eq phakta. Rangnap nángduk eshiwang miqtang jamoq wan titta, ethi jio piq jol chuwang ta. 12Eshiwang miqtang aa Eutychus tha atharang uhimnáng solkat ta etho rapney sungrang ta.

Troas wang Miletus náng

13Í jakho waqwan konáng ka eq Assos náng kati. Í eshina Paul sha tho waqwan o tuntatong ni ta tathin ti. Piq aa irimal í ma bat taphi chammatakoi piq lam wang Assos náng kat ta. 14Baluk o í Assos na Paul jamoq tachong ti tho piq waqwan o tatong ti, etho eshiwang í Mitylene náng kati. 15Eshiwang waqwan o tong eq saal dak na í Chios náng thuti. Eshiwang í saal shey jio Samos náng thuti, etho adak saal na Miletus náng thuti. 16Paul aa Ephesus sha lit eq kanáng ta tathin ta, chammatakoi Pentecost saal o Jerusalem náng thok ma piq Asia mung na rangham sha tachuwan ma nuk moq angta.

Ephesus solwa tang ma Paul aa uthun tung aa raaq

17Miletus wang Paul aa Ephesus mondoli miqlang tang ma piq jamoq tachong ma raaq tha batta. 18Baluk o ning piq relnáng thu atho ning ma batta, “Nga bari saal wang Asia mung náng thu táng, nga nim jamoq tong kam tho nga chamal tong tang sha nim aa usam eq inn. 19Jehudi tang aa nga miiksuk rangham o rapney tsamnang iching náng thu pha jo tho, rapney tinnin ang eq miikshit jamoq Teyhungwa nong táng. 20Nim rangma ràa ta shiwang chamlang otho nga nim rangma táng mong ang táng ta nim aa samtol eq inn. Etharin miqtang jakho na etho him him na tho phanchan eq tatal kot taphi. 21Shkewa relna tin kaley eq hiqtang Teyhungwa Jesu sha han ching ta Jehudi tang ma tho etho Greek tang ma tho nga phanchan táng. 22Etho thanga, Asang Tsija raaq tat eq nga Jerusalem náng ka ang, nga sammong eshina chamli angna tha. 23I rangma chuk nia tahikham atha ta Asang Tsija eq thaji samhaq na nga ma bat taphang tha usam eq ang. 24Etharin nga irollung ma ahan tathin mong. I tatut jol uthun angma etho Teyhungwa Jesu aa kot ta jaksom sha tahom ma hun nga tathin ang. Eshi jaksom sha Shkewa ráng manchan tungtang qhal phanchan jaksom.

25“Nim jaktung na nga Shkewa rangmungtan tung aa raaq phanchan eq ling qhing táng. Etho thanga nim wang utang eq tho isham khimin sey angnin. 26Ethirangma, thaney aa nga nim ma miikkhi kot eq bat taphang: nim jaktung wang chamtey matwang ang ajo nga jamong. 27Chammatakoi Shkewa thaji tinthin sha nga dak hunga nim ma phanchan kot taphang. 28Eshirangma nim ni nim shi rangtun inn etho Asang Tsija eq nim o kot chak taphin kelwut tang shima rimrang inn. Shkewa mondoli shi rimrang inn, bara piq aa Umiqwasa tahi wang ringta. 29Nga usam eq ang nga kat jio, rapney jashit wangru nim o thupha na, etho ning aa kelwut tang sha shing moq angna. 30Nim jaktung wang miqtang tunshat na hutdip eq uhantey tang sha adak lam náng solna. 31Ethirangma rangtun nin etho tasik inn, nga pangtom rangpal rangwung qhap eq thaji ma tatal kot taphang.

32“Nga nim raa Shkewa nia uráng manchan tung aa raaq shing phang. Iri raaq rey nim chalo ma jin nong eq na etho Shkewa umiqtang rangma kot aa sunmaan thaji sha nim rangma angna. 33Nga utang hun aa cha, chiing, etho khat som ma qhikjuk mong angtáng. 34Nim aa usam eq inn, irangma etho inokwa tang rangma ijak eq taphaksat táng. 35Etho ahan somlo eq beythey moq miqtang sha nong eq ching ta uphan wang nga nim ma takhi taphang. Etho ‘Uthang shiwang ukot sha rapney sunmaan’ ta Teyhungwa Jesu aa batta shi tasik inn.”

36Iri tang jin bat jio, Paul ning jamoq shong tong eq romtam chuta. 37Etho ning jujong aa qhapta etho Paul tha khilo eq chip ta. 38Ning tin chamlang ma shit aa takoi ning jamoq tachong moq sey angna ta Paul aa batta. Ethi jio ning aa Paul tha waqwan náng solkat ta.

Currently Selected:

Acts 20: Mmmm

Highlight

Copy