Acts 21

Paul Jerusalem náng ka aa

1Baluk o í ning jamoq jaktachap ti etho ning tha shingchak eq í Cos náng thuti, saal dak na í Rhodes náng thuti etho eshiwang í Patara náng thuti. 2Eshiwang í Phoenicia náng ka aa ajong waqwan tha kap khi eq eshina qhungti. 3Í Cyprus haq sha jin khi eq iri haq náng thuta phi, etho eshiwang saalnop konáng ka eq Syria haq náng thuti. Í Tyre na langti, bari haq sho ajong waqwan wang tangwang tunti. 4Eshina chamtey uhantey tang tachong ti etho saal sanat eshina tongti. Asang Tsija tarong wang Jerusalem náng nak ka u ta ning aa Paul ma batta. 5Í rangham tha uthun sey angta tho, í aa ning tha shing chak eq í lam o sey kati. Ning thaji tha himteynu nia usa tang jamna í jamoq tachong ma jung kang náng kata pha. Í aa eshina shongtong eq romtam chuti. 6Í ning jamoq jak tachap ti, í ajong waqwan na qhungti etho ning tho him náng sey wang ta.

7Í ajong waqwan na jol chey roq angti, Tyre wang Ptolemais náng kati, eshina uhantey tang jamoq jak tachap ti, etho ning jamna saal shey tongti. 8Saal dak na eshiwang thalat eq í Caesarea náng thuti, eshina í evangelist Philip himna tongti. Piq Jerusalem na nong pang ma taltey sanat miqtang mong shina ashey angta. 9Piq ma bali miqnu sa angta bara tharik hunga tong ta etho Shkewa rangsamal angta. 10Í eshina saal daqhan tong jio Judea wang ashey rangsamal thutapha, piq miing sha Agabus angta. 11Piq í jamnang katapha, Paul aa khingkit tha somta, etho piq ni piq jak ni jaa o khak eq batta, “Asang Tsija bat aa, iri khingkit tangteywa sha Jerusalem na Jehudi tang aa irimal khak na etho Gentile tang jaknáng kochak na.”

12Ira tat eq í nia adak miqtang eq Jerusalem náng nak cham ka aa ta Paul ma tinthanin eq bat ti. 13Etharin Paul aa thawel batta, “Nim aa chamma qhap eq itin tashit phin? Jerusalem na ukhak chen eq phang o chamtho ang moq, nga Teyhungwa Jesu miing o tikma tho kacha ang.”

14Í aa piq tha jin táng mi sey angti, ethirangma í aa jio bat ti, “Teyhungwa chamta tathin aa eshi hun cham ang aa.”

15Eshina chomwey tong eq Jerusalem náng katma tangwang tha som eq kacha ti. 16Caesarea wang uhantey tang í jamoq otho ukat angta pha etho í Mnason himna sol kat taphi barina í tongtey angti. Piq Cyprus miq angta etho jakho wang hun uhantey angta.

Paul James jamoq tachong aa

17Í Jerusalem náng thu i tho, uhantey tang í jamoq rapney sungrang eq tachong taphi. 18Saal dak o, Paul aa James tha solta etho miqlang tang jamnáng tachong katma sol taphi. 19Paul aa ning thaji jamoq jaktachap ta etho Shkewa ujaksom tungkang o chamal Gentile phan jamoq somlot ching ta ning ma bat kot ta. 20Piq raaq tat jio thaji miqtang Shkewa miing tha thajong ta. Ning aa batta, “Ino Paul, chamtan hayat Jehudi uhantey tang qhong ta etho ning aa thong tha jaqhal eq somlot aa ta nang ni nang aa siin u. 21Gentile phan haq na tongtey Jehudi tang ma Moses thong sha som ching ang moq, etho ning aa miqwasa hankhup sha qhanching ang moq etho Jehudi tang thong sha som ching ang moq ta nang aa tatal kot u ta ning aa kap tat ta. 22Í aa chamlang somlo i? Ning aa usam eq aa, nim uthok sey ang tin. 23Nang aa irimal somlo ujo jaqhal ta í aa tathin ti. Í jaktungna rangtumtey wa bali. 24Ning jamnáng ka eq tasang kut aa kan na rum inn etho chamtan uthang angna shi thawel kot inn; eshimal ang ajo ning aa ning kho sha lok hit chak na. Irimal wang thaji miq eq ba tung aa raaq o etho chamta raaq ta sha alik ta usam eq na, nang aa Moses thong sha somlo u ta usam eq na. 25Uhantey tang Gentile phan ma í aa liklo ka eq tahol ti, ning aa shila tang ma kot aa phaksat sha etho tahi sha phaksat ching ang moq, boq o nat aa jatngam dukko aa sha phaksat ching ang moq, etho sathuk somlot ching ang moq.”

26Paul aa eshi miqtang tha adak saal o sol eq tasang kut aa kan náng kata. Bari saal ro ning tasang kut aa kan sha thunna, etho ning ma pinthong dukkot ching ta piq aa rangnuk him náng ka eq batta.

Paul sha rangnuk him wang lo aa

27Saal sanat thun jakho, chamtey Jehudi miqtang Asia mung wang thu eq Paul tha rangnuk him na kap khita. Ning aa miqtang tin tha polrik eq Paul tha thalo ta. 28Ning aa batta, “Israel miqtang, nok nong phin! Iri miqwa rey thaji haq náng qhing eq Israel tang miing tashit aa, etho Moses thong shima etho iri rangnuk him raa jashit ta raaq aa. Etho thanga piq aa Gentile phan miqtang iri asang haq náng thoksol eq thanan aa!” 29Ning aa iri rangma batta, chammatakoi ning aa Ephesus wang Trophimus tha Paul jamoq samhaq na khita etho Paul aa piq tha sol eq rangnuk him náng wangta ta ning aa tathin ta.

30Ira tat eq thaji miqtang uqhat angta, etho Rangnuk him náng miqtang tha jol eq Paul tha raan náng hum katta. Etho rangnuk him kalung tha tángsak chakta. 31Miqtang they Paul tatik ma tathin ta etharin Jerusalem ajong samhaq na miqtang ringrak aa ta Rome ralkoltey tang solwa raaq kap tat ta. 32Kalo hun chamtey ajongwa tang etho ralkoltey tang sol eq piq samhaq náng thuta. Miqtang aa piq nia ralkoltey tang tha khi atho, ning aa Paul wat tha thamangta. 33Ralkoltey tang solwa tha Paul relnáng ka eq piq lota etho ani janru eq khakma raaqkhat kot ta. Ethi jio piq aa miqtang ma pitta, “Iri miqwa ri utang aa etho chamlang somlo ta?” 34Aral waan tha raaq shey ring ta, adak waan tha raaq dak raaq ta. Ralkoltey tang solwa ma chamlang angta ta tungnung ta, req piq aa miqtang thima Paul tha pangpong thung náng solkat ma batta. 35Ralkoltey tang aa Paul tha qheritok náng solkat atho ning aa piq tha tunpey eq som kat ta chammatakoi miqtang rapney khat eq piq relnáng kata. 36Ning thaji they ring eq batta, “Piq ri tatik chak inn!”

Paul ulun angma raaq bat aa

37Ralkoltey tang Paul tha pangpong thun náng solkat ma ang atho piq aa ralkoltey tang solwa thima batta, “Nga nang ma chamlang batphang i?”

Ralkoltey tang solwa aa batta, “Nang Greek raaq jin raaq ang u i? 38Nang raa eshi Egypt miq ang mu i? Piq aa saal tom ni jakho hayat bali paq ajan somtey miqtang sol eq shu shu haq náng kata.”

39Paul aa thawel batta, “Nga Jehudi miqwa, Cilicia mung Tarsus wang. Tinshit eq nga miqtang jakho o raaq batma kot phu.”

40Ralkoltey tang solwa they raaq u ta batta, etho Paul qheritok na lang eq, ujak tha thamot eq miqtang thima shu shu tong ma batta. Ning shu shu sey ang atho, Paul Hebrew raaq na batta.

Currently Selected:

Acts 21: Mmmm

Highlight

Copy