Acts 19

Paul Ephesus na

1Apollos Corinth na ang atho, Paul umong umong haq wang lit eq Ephesus náng thuta. Eshina chamtey jiphantey tang kap chongta. 2Piq aa batta, “Nim uhan kam tho Asang Tsija kap tin i?”

Ning aa piq ma batta, “Í aa Asang Tsija atha ta tho tat wey mi.”

3Paul aa ning ma pitta, “Irimal ang ajo nim aa chamlang junglam tin?”

Ning aa thawel batta, “John junglam ti.”

4Paul aa ning ma batta, “John aa tin kaley tey miqtang ma jung thalam kot ta. Etho piq jio kattey Jesu sha han ma piq aa miqtang ma batta.”

5Ning aa ira tat atho ning aa Teyhungwa Jesu miing o junglamta. 6Paul aa ning o ujak tha shing atho ning o Asang Tsija kata; etho ning adak adak raaq eq raaq ta etho raaqtóng ta. 7Ning thaji sha asi ani miqtang angta.

8Paul synagogue náng kata etho cho hung aa japitom nángduk miq jamoq wanta, etho piq aa ning ma Shkewa rangmuntan tung aa raaq tasam ma thadan eq tatal kot ta. 9Etharin chamtey tin sha rapney tinchik angta etho ning aa hanmoq angta. Etho ning aa miqtang jakho na Teyhungwa lam sha jashit ta batta. Eshirangma Paul aa ning sha shingchak eq uhantey tang sol eq Tyrannus tatal him na salwet raaq wantit ta. 10Pang ni nángduk irimal hun somlo ta etho Asia na tongtey thaji miq, Jehudi otho etho Greek otho, thaji aa Teyhungwa raaq tha tatta.

Skeva miqwasa tang

11Shkewa Paul jak o patja jaksom somlo ta. 12Paul aa tatit lo aa khatlosa tia khat sha atakasa miqtang relnáng som kat ajo, ning atakasa tha qhalta etho ning khom wang anaan tsija tang thalat ta. 13Chamtey Jehudi tang bara ka eq anaan tsija tang sha phanta, ning aa Teyhungwa Jesu miing o irimal somlo ta. Ning aa thangwa tang thima batta, “Jesu miing o bara Paul aa tatal aa, nga nang ma jol chuwang u ta raaqkhat kot phang.” 14Jehudi phan ajong tingwa Sceva sanat sapho wa tang shey irimal somlo chey ta.

15Etharin anaan tsija eq ning thima batta, “Nga Jesu usam eq ang etho nga Paul tung aa raaq tho usam eq ang; etharin nim utang aa?”

16Anaan tsija angta miqwa they ning khom o wukta etho ning tha jinta. Ning tha rapney watta etho ning eshi him wang hansang ang eq etho maphey ang eq jol chuwang ta. 17Ephesus na tong aa Jehudi nia Gentile tang aa ira tatta etho ucho angta etho ning aa Teyhungwa Jesu miing tha rangka ta. 18Hantey tang wang daqhan thu eq ning jashit jaksom tha wungbat ta. 19Ahan miqtang bara mantan takhitey, ning aa mantan likdap tha som kat eq miqtang jakho tho takchakta. Eshi likdap thang tha wet ajo hayat rokbanga ching nginsa tan angta. 20Irimal wang Teyhungwa raaq tha pholchalta etho tarong angta sey.

Ephesus na thamol hit

21Iritang thaji jin ang jio, Paul aa Macedonia etho Achaia tha lit eq Jerusalem náng kat ma tathin ta. Piq aa batta, “Eshináng kat jio nga Rome náng tho ukat ang ching.” 22Req piq aa ani miqwa noknong tey Timothy nia Erastus Macedonia náng takat ta etho piq chomwey ma Asia na tong ta.

23Eshi rangham sho Teyhungwa lam tung aa raaq ma ajong phang tsamnang ta. 24Demetrius ta washey angta bara Artemis rangnu shila tang rangnuk him chìng wang hun eq sangtáng ta. Iri wang jaksomtey eq ngin rapney kapta. 25Req piq aa ujak khung o somtey tang piq aa somlo ta shimal somtey ning tha thajoq eq batta, “I nokwa tang, nim aa usam eq inn hiqtang aa iri jaksom wang chamtan lik aa ngin kap i. 26Iri miq Paul req chamlang somlo aa tha nim aa ukhi nia utat eq inn. Jak hun rangwa sha rangwa ang moq ta bat eq piq aa Ephesus iro chen ang moq thaji Asia mung miqtang ma tho uhan eq ma kot aa. 27Eshirangma miqtang aa hiqtang jaksom raa chen jashit ta raaq moq angna, etharin ajong Artemis rangnu rangnuk him miing tho matwang angna. Etho Asia nia thaji mingkang na shumnuk tey Artemis phun amun sha miqtang aa akhek ta tathin moq angna.”

28Baluk o miq waan tang aa ira tat atho rapney khata etho jujong hal aa ring eq batta, “Ephesus Artemis ajong.” 29Kalo hun samhaq na thaji tha ring ta, etho ning aa Macedonia wang Paul jamna qhingtey Gaius etho Aristarchus tha lota. Etho ning tha sol eq pangpong thung náng solkat ta. 30Paul piq ni piq hun eshi miqtang jakho náng katma nukta, etharin eshiwang uhantey tang aa piq tha takat ma kot moq angta. 31Eshi mung ajong authority tang Paul nokwa tang angta. Ning miq thajoq pangpong thung shináng nak cham ka aa ta Paul ma raaq thabat ta. 32Eshi miqtang tha rapney tungnung ta; chamtey miqtang they ashey raaq tha raaq eq ringta, adak miqtang tha chamli lang ta raaq ta. Ning chamli ma thajoq aa tha ahan kot eq sam moq angta. 33Miq waan wang Jehudi phan miq ashey Alexander tha jakho na thalang chakta, etho piq ma irimal bat u ta miq waan tang ringta. Alexander aa thaji miqtang ma shu shu eq angma ujak thamot eq takhita, etho piq aa miqtang bat ma tathin ta. 34Etharin miqtang aa piq raa Jehudi phanta sam atho rangham ni nángduk ringta, “Ephesus Artemis ajong.”

35Etho samhaq ajong solwa tha thu eq miqtang tha thamang ta. Etho piq aa batta, “Ephesus miqtang, ajong samhaq Ephesus sha ajong Artemis rangnuk him etho ráng wang qhat ta ushila sha shingtey sha thaji miqtang aa usam eq aa. 36Utang eq tho ira aja ta jin raaq moq ang aa. Eshirangma nim umang ang inn, etho tathin hung aa nak somlo inn. 37Nim aa iri miqtang raa sol kat taphin, ning aa rangnuk him tang sha hut moq angta etho rangnu ma jashit ta raaq moq angta. 38Demetrius etho ujak somlot tey ma chamtey sha miiksuk bat ma ang ajo, khaphung him etho khaphung tey sha atha; eshináng jin sol kat eq aa. 39Nim ma eshi pheynáng eq ahan ràa ajo, esha thong aa rongh náng sol kat ching. 40Thaney aa chamli angta rangma inap miqtang shey tho hiqtang thamol hit ang i ta raaq na. Etho hiqtang aa chamtho jinbat mi sey angni.” 41Iri bat jio, piq aa thaji miqtang tha takat ma kot ta.

Currently Selected:

Acts 19: Mmmm

Highlight

Copy