Acts 18

Paul Corinth na

1Ethi jio Paul aa Athens tha shingchak eq Corinth náng kata. 2Eshina piq Aquila ta ashey Jehudi miqwa jamoq tachong ta, piq Pontus na changta. Arang hung aa piq himteynu Priscilla jamoq Italy wang thuta pha chammatakoi Claudius lungwang aa thaji Jehudi tang ma Rome shingchak eq chuwang ma raaqkhat kot ta. Paul aa ning tha siin ma kata. 3Etho ning jamoq tong eq somlo ta, chammatakoi ningni mal Paul atho lingphasat ma bulangtap hun eq kaplap ta. 4Etho piq salwet Sabbath saal o synagogue na wantit eq Jehudi tang nia Greek tang ma tho tatal ta.

5Macedonia wang Silas nia Timothy thu atho Paul tung aa raaq phanchan ma piq thaji rangham kot eq Jesu raa hun Messiah ta Jehudi tang ma miikkhi kot ta. 6Baluk o ning aa piq raaq tha miiksuk ta etho chikchak atho piq aa khat wang botkhi tha thalwat eq ning ma batta, “Nim tahi nim ma hun cham ang aa! Nga jamong. Thanga wang nga Gentile tang jamnáng ka náng.” 7Etho piq eshiwang qhing eq Shkewa shumnuk tey Titus Justus himnáng kata. Piq him synagogue relna angta. 8Synagogue solwa Crispus etho uhimtey tang aa Teyhungwa hanta; etho Corinth wang daqhan miqtang aa Paul raaq tha tat eq han ta etho ning thaji ma jung thalam kot ta.

9Palshey, Teyhungwa máng o Paul ma batta, “Cho hung aa, ning ma tung aa raaq bat chey u, etho shu shu eq nak tong u. 10Chammatakoi nga bajamna, etho utang eq nang khim eq tasamnang phamu ang phanu, chammatakoi iri samhaq ro i rangma miqtang daqhan.” 11Eshirangma Paul eshi haq na pang shey raa tángko tong eq ning ma Shkewa raaq bat tan kot ta.

12Baluk o Gallio sha Achaia haq ma Rome governor angta tho eshiwang Jehudi tang thajoq eq Paul tha khim eq khaphung him náng solkat ta. 13Ning aa batta, “Iri miqwa rey thong wang ang moq ang eq adak Shkewa shumnuk ma miqtang sha polrik aa!”

14Baluk o Paul uraaq angma ta tho Gallio aa Jehudi tang ma batta, “O Jehudi tang, ira alik akuk jaksom etha ang moq o anaan jaksom ang ajo nga nim raaq sha utat eq náng. 15Etharin, ira nim raaq tung aa raaq, nim miing tang tung aa raaq etho thong tung aa raaq, ethi rangma nim ni nim aa hun khaphung inn. Nga iritang raaq khaphung mong.” 16Etho piq aa ning tha khaphung him wang phanchak ta. 17Thaji miqtang kara eq, synagogue solwa Sosthenes tha lo eq khaphung him relna watta. Etharin Gallio tin tha jin kaley moq angta.

Paul Antioch náng wel aa

18Paul uhantey jamoq Corinth na saal daqhan tong ta, ethi jio piq Priscilla nia Aquila tha sol eq Syria náng waqwan o kata. Waqwan na tong jakho, Cenchreae samhaq na kholok tahit chakta chammatakoi piq aa ashey rangtum ta. 19Etho piq Ephesus náng thu atho, Priscilla nia Aquila tha eshina shingchak ta. Ephesus na Paul synagogue náng ka eq Jehudi tang jamoq wantit ta. 20Eshiwang miqtang aa piq ma wey rap tong angma tinthanin eq batta, etharin piq aa ning raaq tha tat moq angta. 21Piq ning rel wang jol chuwang ma angta tho ning ma batta, “Shkewa nuk ajo nga nim rel náng wey thok ang phanáng.” Ethi jio Ephesus wang waqwan o jol chuwang ta.

22Baluk o piq Caesarea náng thu atho Paul Jerusalem náng ka eq mondoli miqtang jamoq tachong ta etho ethi jio Antioch náng thuta. 23Piq eshina chomwey tong eq eshiwang qhing chuwang ta, etho Galatia nia Phrygia mung tha lit eq kata etho uhantey tang tin tha thajong ta.

Apollos Ephesus na

24Ethi rangham tho Jehudi phan wang Apollos ta thamiing ta ashey miq Ephesus náng thuta, piq Alexandria na chang ta. Piq jaqhal asam atol angta etho Asang Likwit jaqhal eq samta. 25Piq ma Teyhungwa lam bat kot ta etho tin kot eq piq aa Jesu tung aa raaq jaqhal eq phanchan ta etho tatal ta. Etharin piq aa John jung thalam tung aa raaq chen samta. 26Piq chamtho cho hung aa synagogue himnáng ka eq phang wantit ta. Priscilla nia Aquila piq raaq tha tat eq, piq tha ningni him náng solkat ta etho Shkewa lam raaq tha jaqhal eq bat kot ta. 27Apollos Achaia náng kat ma nukta, ethirangma, Ephesus wang uhantey miqtang aa piq tin tharong eq piq tha wangphu ta hal ma achaia miqtang ma liklo witta. Piq Achaia náng thu atho, Teyhungwa ráng manchan tungkang o uhantey miqtang they piq tha rapney nongta. 28Jesu raa Messiah ta bat eq Asang Likwit wang phanchan eq Jehudi tang jamoq miqtang jakho o arong eq thadan ta.

Currently Selected:

Acts 18: Mmmm

Highlight

Copy