Acts 11

Peter aa Jerusalem mondoli ma lak eq bat aa

1Thaji Judea mung na apostle tang etho thaji uhantey tang aa Gentile phan shey Shkewa raaq kap sey ta tha samta. 2Baluk o Peter Jerusalem náng kata, Gentle phan sha hankhup qhan ching ta battey miqtang piq jamoq thadan eq battta, 3“Nang aa hankhup qhan moq tey miqtang him náng ka eq phaksat tu!” 4Eshirangma Peter aa ning ma phang wang chamlang angta tha batta.

5“Nga Joppa samhaq na romtam chu chey táng tho, nga máng khi táng. Nga mungtan wang ajong khatnup sokbali kowang thabik aa tha iching náng tham ka tapha tha khi táng. 6Nga sing siin ang tho umong sho him wo wak tang, jatngam tang, jongbal tang, etho jat wo tang angta. 7Etho nga raaq shey kap tat táng, ‘Peter shat u; tikwat eq phak u!’ 8Etharin nga bat táng, ‘Teyhungwa, ang moq angna! Anaan nia jashit phan phaksat i nung náng baluk otho wang wey moq.’ 9Mungtan wang wey raaq ta, ‘Bara Shkewa tasang ta eshima nang aa anaan ta nak raaq u.’ 10Irimal taktom shik angta, etho ethi tang tha mungtan náng wey thawel ta. 11Ethi kam tho, nga bari himna tong táng, eshina Caesarea wang watom ijamoq tachong ma takatta, ning tha thu tapha. 12Etho Asang Tsija nga ma ning jamoq jungnáng hunga katma batta. Joppa wang tharok uhantey tang ijamoq katapha etho í Cornelius him náng kati. 13Piq aa í ma batta, ‘Nga ashey rangkamwa ihimna lang atha khi táng, Etho nga ma batta, “Joppa náng miq takat eq Simon Peter shi hal u. 14Piq aa nang ma Shkewa raaq batna, eshi tungkang o nang nia bahimtey tang thaji lunna.”’ 15Nga ning ma raaq phang batchey ang tho, phang tho í ma tham ta thimal Asang Tsija ning o thamta. 16Etho Teyhungwa chamlang batta tha nga tasik ang: ‘John aa jung eq junglam kot ta etharin nim aa Asang Tsija wang junglam nin.’ 17Teyhungwa Jesu Khristo o í aa kamti tho, í rangma jakkot kot taphi, eshi jakkot sha Shkewa Gentile phan ma tho ukot eq ajo, esha táng ma nga chammal jin tathin náng?”

18Baluk o ning aa iri raaq tang raa tat eq shu shu sey angta etho Shkewa tha shumnuk eq batta, “Shkewa Gentile phan tang ma tho rollung rangma tin kaley kotta!”

Antioch mondoli

19Stephen tatik ta tho, daqhan uhantey tang aa tahikham kap eq alo mung Phoenicia, Cyprus, etho Antioch náng pan jol chuwang ta, etho ning eshináng ka eq Jehudi tang ma chan Shkewa raaq tatat ta. 20Etharin ning wang chamtey uhantey tang, Cyprus etho Cyrene haq wang Antioch mung náng thu eq Greek miqtang jamoq wanta etho Teyhungwa Jesu tungtang qhal tho phanchan eq ta. 21Ning jamna Teyhungwa tarong atha angta, etho daqhan miqtang aa han ta etho Teyhungwa ching konáng ngikta.

22Iri raaq raa Jerusalem mondoli na tho uthok sey angta, req Barnabas tha Antioch náng takat ta. 23Piq eshináng thu eq etho Shkewa ráng manchan wang chamlang somlo ta tha khi eq sungrang ta, etho ning ma thaji tin wang Teyhungwa jam sho thanap ma tharong batta. 24Barnabas sha miq qhal angta, etho Asang Tsija nia kam wang shey ta. Etho piq aa daqhan miq Teyhungwa jamnáng solta.

25Req Barnabas sha Tarsus náng Saul siin ma kata. 26Piq Saul jamoq tachong eq piq tha Antioch náng solkat ta. Etho pang shey náng thula ning ni mondoli tang jamoq tachong ta etho daqhan miqtang ma tatal chey ta. Antioch na uhantey tang ma thaji pheynáng eq jakho o “Phong miq” ta thamiing ta.

27Ethi rangham tho, Jerusalem wang chamtey rangsamal tang Antioch náng kata. 28Ning jam wang washey miq Agabus ta thamiing ta, piq aa Asang Tsija tungkang o thaji mingkang ro ajong shong aa cham thu phana ta batta. Claudius lungwang tong tok o irimal angta. 29Req jiphantey tang aa barey chamtan jin aa eshi tang Judea na tongtey uhantey miqtang jamoq noksom lot ma kara wanta. 30Ning aa irimal hun somta, etho Barnabas nia Saul jakna mondoli miqlang tang ma ngin taholta.

Currently Selected:

Acts 11: Mmmm

Highlight

Copy