Ruti 4
4
I Boazi sa Tekua i Ruti
1Ego i Boazi sa sae pa ia vavaikamuna pa totomena na gugusu ikete ko sa toqo ketakoi. Poni sa sa rerege jola tugu sa na tinoni kopu vakarovo isa sa pojai na veveina i Boazi perangaina. Poni sa kukua i Boazi sisa, <<Ei, qua tinoni, mei keqo lame toqo mai lani,>> saunia. Poni sa keqo lao toqo sisa.
2Beto sa sa kuku tekuria i Boazi sa ka manogaputa tinoni mamata pana gusu ko pira sauniria, <<Mu lame somana toqo,>> sauniria. Poni qai lao toqo.
3Beto sa parangia i Boazi sa na tinoni kopu vakarovo, pira sau, <<Koleona sa kai kobu peso tana tavitida i Elimeleki, ko i Naomi isa sa sa mule kamu koko pa Moabi sa sa nyorogua vavainia sa na kobu peso. 4Ko ara qa rovea sa ma vapagala votua pa talingimu ao ko mu vai tekua pa moedi ira qai korapa toqo aipira beto pa moedi ira na tinoni mamata aipira qau. Ko vei muna kopu vakarovia sa mu kopu vakarovia, goto vei muneke kopu vakarovia sa pori vei mugunisiu ko ma gigilai, ura kepore mule sa kame mina boka kopu vakarovia goto ao gu beto ko pa ligumu ao sa ara gu mule sa mana boka kopu vakarovia,>> sau.
Poni sa paranga sa na tavitina, <<Ara mana kopu vakarovia sina,>> sau.
5Poni sa paranga si Boazi, <<Ego na ranena muna vai tekua ao pa limana i Naomi beto pa limana i Ruti na rereko Moabi sa na kobu peso api, poni sa i Ruti na nabokona i Maloni ba qu tekua tugu vei ao, ko na kobu peso sa mina gore vei pana tutina na marenena sa tei mate tu ko na isongona minake lumu,>>#4.5 Pana totoso tadira Izireli sa na tututi sa sa gore vei tadira na marene nake tadira na rereko. saunia.
6Poni pira sau sa na tavitina, <<Mina vei isa sa ara manake boka vai teku kopunia sa na kobu peso, ura kita ma valumuria sira na isisongo bai gore lao vei tadira na tuqu. Ko mu tekuamua ao na qua neqi kopu vakarovo ara, ura ara manake boka kopu vakarovonia,>> sau.
7Ego pa moa sa pira sa vei sa na tututi tadira pa Izireli totonai kai tinoni bi kopu vakarovia na isisongo babi bai vaibei isisongo, poni sa kame sa unusu vagorea sa nona buti beto sa vania sa na tinoni pa kai kalena. Ko pa Izireli sa totonai qai roiti vei inara sa sa tavatoqo vamauru sa doru paparanga.
8Ko sa vei sa na tinoni kopu vakarovo pira saunia si Boazi, <<Mu vai tekuamua ao,>> sau, beto sa unusu vagorea sa na ona buti.
9Poni sa pira sauniria i Boazi sira na tinoni mamata beto ko ira doru qai somana pana vaikamu, pira sau, <<Pa ngeni api qu bati vasosotoa agou sa ara qa vai teku visua pana limana i Naomi sa doru sakasava tai Elimeleki beto doru sakasava tadira Kilioni beto i Maloni. 10Beto ko i Ruti na rereko Moabi, na nabokona i Maloni, sa qa vai teku tugu vei ara ko mina maqotaqu, ko na isongona na marenena beto na ona isisongo sa minake lumu pa ona bubutu beto pa ona gugusu. Agou sa qu batini matamiu pa ngeni,>> sauniria.
11Poni pira qarigu sira doru tinoni pa ia vavaikamuna beto ira na tinoni mamata, <<E! Agei qe doroni matamei. I Iahova mi manania sa na rereko sa lame togasa pana mua tatamana, ko mi vei i Resolo beto i Lia, ira karu qai vaijokia na bubutu Izireli. Mu kai tinoni puramu pa Eperata beto mi pore isongomu pa Betilihema. 12Pana tana rereko api i Iahova mina vanigo ira na tutimu ko na mua tatamana mi vei na tatamana tai Perezi, na tuna i Jiuda qi vaporenia tai Tama,>> qarigunia.
13Ko i Boazi sa tekua ko sa alavia na maqotana si Ruti. Totonai sa puta tavitia poni i Iahova sa vabokai si Ruti ko sa bogata beto sa vaporea kai koburu marene.
14Poni qai parangia i Naomi sira na rereko, pira qarigu, <<I Iahova mi tavatarasae. Pa ngeni api sake valumua na mua tinoni kopu vakarovo. Mina kai tinoni pore isongona pa Izireli sisa. 15Ko isa kode mina vangangali beia na mua toa beto ko isa tugu sa mina kopunigo totonai muna qoele ao, ura na roamu isa sa roroqu vivitigigo sa sa vaporea sa na koburu api ko na roamu alepi sa sa poreveveina jolania isa bai boka roitinia ka vitu tamatasi marene,>> qarigunia.
16Ko sa tekua i Naomi sa na koburu ko sa geria beto sa kopu pausia.
17Ira na rereko gugusu qai vakukunia na isongo sa na koburu, pira qarigu, <<Kopira i Naomi sa isongia kai koburu marene,>> qarigu. Ko qai vakukunia i Obedi sa na isongona. Ko i Obedi isa sa na tamana i Jese, isa i Jese na tamana i Devita.
Na Tuti Gorena tai Devita
18Api sa na tututi tai Perezi. I Perezi sa sa vaporea si Hezironi. 19I Hezironi sa vaporea si Rami, i Rami sa vaporea si Aminadabi. 20I Aminadabi sa vaporea si Nasoni, i Nasoni sa vaporea si Salamoni. 21I Salamoni sa vaporea si Boazi, i Boazi sa vaporea si Opeti. 22I Opeti sa vaporea si Jese, ko i Jese sa vaporea si Devita.
Currently Selected:
Ruti 4: LGA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
