Jona 1
1
I Jona sa Ukunia i Iahova
1Ego sa lame tai Jona na tuna i Amitai sa na paranga tai Iahova, pira sau, 2"Mu qaqiri! Mu taloa sae pa gugusu lavata pa Ninive, ko mu kuku tariniagana na vinakilasa ura qai vadogoronisiu na toa ikerena," sau.
3Ba sa qaqiri tu si Jona ko mi uku riuona tu pa Tarasisi ko mi uku paenia si Iahova sau. Ko sa gore pa Iapo ko sa batia sa kai vaka korapa qaqiri toka riuona pa Tarasisi sau poni sa tabaria na ona pasisi beto sa gore koi pa vaka ko mi somana tuti riuria sira mai riu pa Tarasisi qarigu ko mi ukunia si Iahova sau.
4Poni sa lao tu i Iahova ko sa ipa gorenia pa kolo sa kai gava lavata ko sa toga pa kolo sa na ranebongi lavata ko na vaka tu ba mi tapipiara tu sau. 5Ko qai matagutu neneqere sira na boe pa vaka ko qai okoto kiu alili laoria sa na okokoto dia tamasa, beto qai ipa vovoleniria pa kolo sira na susurana pa vaka ko mi kopele na vaka qarigu. Goto i Jona totonai sa sa tei gore tu korapa puta mumagana pa puruna na vaka. 6Poni sa gore bati poai na kapini pa vaka sisa, ko sa pira saunia, “Qokolo! Na sa qu korapa puta nyanyalunia lani sao? Gasa tatakole! Kiu alili laoa na mua Tamasa! Kita pu na Tamasa isa mina doro roroqugita ko tanake mate manyao,” saunia.
7Ego liguna isa sa qai mekarai vaiparanga vei pira sira na boe pa vaka, “Koi, aria ko ta gonania na patu vivile ko ta nyaqo votunia moko sa i sei sa sa vagosoronigita gita sa na tapata ikerena api,” qarigu. Ko totonai qai gonania sa na patu vivile qarigu poni sa na patu vivile sa ulenia si Jona. 8Ko pira qarigunia ira sisa, “Mu siqarai ulule! I sei sa vagosoronigita sa na tapata ikerena api? Na sa na mua roiti sao? Pai na koko veimu? Pai na mua gugusu? Na tinonimu pai sao?” qarigunia.
9Poni pira sau si Jona, “Na tinoni Hiburu sara, ko i Iahova na Tamasa pa noka isa sa vapodakia na kolo beto na peso pidilina sa qa vatarasaea ara,” sau.
10Ko sa ule vaniria sa isa sa korapa ukunia si Iahova sauniria, ko qai koni gigilai sa vei isa ko qai vakamuniria na matagutu lavata sira na tinoni pa vaka, ko qai pojania sisa, “Qokolo, ai sa vei ko qu roiti vei tu inara sao?” qarigunia.
11Ego sa viva tu lalaona sa na ranebongi pa kolo, ko pira qarigunia, “Ko ai mene aru veinigo agei sao beto mina makogore sa na kolo,” qarigunia.#1:11 Na pikata 11 api sa aipira mina boka tadoro vei tugu: Beto pira qarigunia ira sisa, “Ego ko ai mene aru veinigo agei sao beto mina makogore sa na kolo, ura sa viva tu lalaona sa na ranebongi pa kolo,” qarigunia. 12Poni pira sauniria, “Mu ovulusiu sara ko mu ipa gore palenisiu pa kolo beto kode mina makogore sa na kolo, ura kopira qa gigilai ara sa ara tugu qa vagosoronigou sa na ranebongi lavata api,” sauniria.
13Ba ira na tinoni pa vaka sa qai geuru vasuvunia sa na qelu sa totonai ko mai popodeke tu mule paro pa poanana qarigu, ba qaike bobokagadia ura na ranebongi sa rajaria pa kolo sa viva tu lalaona. 14Poni qai kiu alili laoa i Iahova, pira qarigu, “Kei, muke veinigei, Iahova! Muke vagosoronigei na mate agei sa na toa tana tinoni api. Muke vateku tarinigei na tinajutu agei na orungu liaburuna, ura ao Iahova sa isa vei qu tavaraguania sa qu roitinia gu,” qarigu. 15Beto qai ovulia si Jona ko qai ipa volenia pa kolo poni sa ipuru gore mate sa na ranebongi pa kolo. 16Totonai sa vei inara poni sa kamuria na matagutu lavata sira na tinoni ko qai matagutunia si Iahova beto qai vavakukuvu beto qai maulu lao tai Iahova.
17Ego sa vatanai i Iahova sa kai igana lavata ko sa ponyolia si Jona, ko i Jona sa pa leo iapana tu na igana sa kole suvere kue rane beto kue bongi.
Currently Selected:
Jona 1: LGA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
