Maka 7

Na Vaivagigalai Kolena tadira na Tinoni Jiu

(Matiu 15.1-9)

1Ego ira na Parese beto ira kaki qai vaivagigalainia na Vavanau na koko veidi pa Jerusalema sa qai vaikamu lame ti Jisu. 2Qai batiria sira kaki sepele tana qai tetekunia na limadi nake liosodi ura qaike loloqa lima vei qai vaivagigalainia ira na Parese qarigu. 3Ura ira na Parese beto ira doru tinoni Jiu sa qai kopuniria sira na uana tututidia tadira na dia tite ko qaike teteku sira tonai qai oqoro loqa lima. 4Beto tonai mai mule pa maketi sa mai ogono valioso mai tu beto sa mai teteku. Beto kubo mule sira na tuti pa dia uana vavalioso vevei pa nyanyanyapa valioso kapa, na raro, na nonobudi, sa qai kopuniria tugu.

5Ko ira na Parese beto ira qai vaivagigalainia na Vavanau sa qai nanasia si Jisu, pira qarigunia, <<Ai sa vei ko qaike tutia tu ira na sepele tamu sira na uana tututidi tadira na oda tite, goto qai tetekunia gu ira sa na limadi nake liosodi?>> qarigu.

6Poni sa oe laoria i Jisu sira, pira sau, <<Sa sotona gu si Aisea tonai sa ululenia sa na veveimiu agou na tinoni vavabata sesekemiu. Pira sa na paranga sa kutiria isa,

<Ira na tinoni pira sa

qai vatarasaenisiu na beberudi gu,

ba na bulodi sa sou vivitigi taqu.

7Na goborodi gu sira dia vinatarasaequ ara,

qai vaivagigalainiria na vaivagigalaidi na vinaturu

tadira na tinoni gu,>#Aisea 29.13. sau.

8Qu loa palenia agou sa na garunu tana Tamasa, ko qu kopu vatataleniria sira na uana tututidi tadira na tinoni gu,>> sau si Jisu.

9Beto pira sauniria, <<Qu gigalai jola sagou! Ko qu vakeporea ginuana agou sa na garunu tana Tamasa ko qu vaturu vaneqiria sira na miu uana tututidi mekamiu! 10Pira sau si Mosese, <Mu pangaganiria ira na tinamiu beto na tamamiu,#Votu 20.12; Vavanau 5.16. beto, na tinoni mina paranga vapirunia na tinana babi na tamana, sa mina tavamate tugu sisa,>#Votu 21.17; Iama 20.9. sau. 11Ba agou qu pojai tu sa vei kai tinoni pira biuniria ira na tinana na tamana, <Na sakasava ba boka tokanigou agou karu sa sa kobani,> biu (na ginuana na paranga api sa nona vaivana madina na Tamasa), 12poni sa quke vamalumia sisa ko bi tokaniria sira karu tinana beto na tamana qai vaivasevi. 13Ko pa soana vei inara sa qu vakepore veveinai agou sa na paranga tana Tamasa tonai qu tutia agou sa na miu uana tututidi qu teku isongoria. Ko kubo uana tututi vevei pira sa qu roitiniria agou,>> sau si Jisu.

Na Uana sa Vapajia na Tinoni

(Matiu 15.10-20)

14Ego sa kuku vaikamu liguniria mule i Jisu sira na minete tinoni ko pira sauniria, <<Mu vainongoro lame sagou doru, ko mu vakaberia sapi. 15Kepore sa kai sava sa teku tomenia pa tinina na tinoni mina boka vapajia sisa. Goto isa tu sa koko votu lame vei tana tinoni sa sa vapajia sa na tinoni isa. 16Na tinoni sa pore talingi nonongorona sa mi vainongoro,>>#7.16 Na pikata 16 api sa sake kole pa soku kukuti koledi. sau si Jisu.

17Ego ko tonai sa loaria sira na minete tinoni ko sa lao tome pa ruma sisa, poni sa qai nanasania ira nona sepele sa na veveina na vavakato vavapada api. 18Poni sa paranga laoria isa sira, pira sau, <<Ko agou ba quke vagogovea tugu sa? Quke vakoinonoa tu agou sa? Kepore kai sava sa teku ponyolia na tinoni sa sa vapajia nona toa. 19Ura sake tome pa bulona na tinoni sisa goto pa borina gu, beto sa vavotu riu pale gu,>> sau si Jisu. (Ko tonai sa paranga vei inara si Jisu sa sa vakaberia isa sa doru gagani sa qai liosodi beto.)

20Beto pira sau si Jisu, <<Isa tu sa koko votu lame vei tana tinoni sa sa vapajia sisa. 21Ura pa leo bulona tu na tinoni qai koko votu lame vei sa na roroqu ikikeredi, na roroiti valulasa, na ikiko, na varivai, 22na babarata, na muino, na roiti ikikeredi, na nyonyorava, na uana pajidi, na kokono, na vamoroana tinoni, na vatarasae mule, beto na uana duduvilidi. 23Doru sakasava ikikeredi pira sa qai votu lame vei pa leo bulona na tinoni ko qai vapajia sa na tinoni isa,>> sau si Jisu.

Na Rarange tana kai Rereko Iviva

(Matiu 15.21-28)

24Ego sa taloa pa gugusu isa si Jisu ko sa lao pa gugusu pa Turosi.#7.24 Pa Turosi sa na pikata gugusu tadira na tinoni karovodi, nake tadira na tinoni Jiu. Ko tonai sa kamu ketakoi sisa, sa sa lao tome pa kai ruma ura sake nyoguania ko bai gigilai ira na tinoni sa na suverena isa ketakoi sau. Ba sake jonga ovo sisa. 25Koleona pa gugusu ketakoi sa kai iviva rereko sa kolea na gagala ikerena sa na tuna rereko. Ko isa tugu sa nongoronia si Jisu poni sa sa lame gona toqonia pa nenena isa, 26sa tepai si Jisu ko mi iju pale na tomate ikikerena sa kole tana tuna rereko sau. Ego na iviva rereko api sa na tinoni karovona tu, ko na podona keta pa kale Poinikia tu pa gugusu pa Siria.

27Poni sa oe laoa i Jisu sa na rereko api, pira saunia, <<Momoe sa ira na koburu mai tu sa mai teteku, ura sake jonga sa bai tateku sira na gagani tadira na koburu ko bai tagona lao vaniria na sie,>>#7.27 Na sie sa na vavapadadi ira na tinoni karovodi beto na koburu sa ira na tinoni Jiu. sau sisa.

28Ba sa oe lao tu sa na rereko, pira sau, <<Bangara, ira na sie pa kauru tevolo ba qai memeagadia gu sa pa vuvusu gagani qai vavukeleria ira na koburu,>> sau sisa.

29Poni sa pira saunia i Jisu sisa, <<Ego vei muna oe vei inana sao, sa jongana mu mule laomua pa mua ruma ropi. Na tomate ikikerena sa sa tei taloa tu tana tumu rereko,>> sau sisa.

30Ko tonai sa mule lao pa nona ruma sisa, sa sa batia na tuna rereko sa tei loai tu na tomate ikikerena ko sa korapa koleona pa ona lovu sisa.

I Jisu sa Salania sa kai Tinoni Kikiqilina

31Ego sa taloa pa gugusu pa Turosi si Jisu ko sa rerege vei pa gugusu pa Sidoni, beto sa gore vei pa Manogagusu ko sa lao pa ovuku pa Qalili. 32Ko tonai sa qai toni kamunia ira kaki tinoni sa kai tinoni kikiqilina beto na popokana sake boka paranga vatale, ko qai tepa totokai si Jisu ko mi vaoponia na limana qarigu.

33Poni sa varijoa pa vaikamu tinoni ko sa toni kalenia mekana i Jisu sa na tinoni api, beto sa totunia pa leona karu talingina na tinoni api sa na kakarusuna, beto sa odolo taria na kakarusuna beto sa totunia pa meana na tinoni api. 34Beto sa enga sae pa noka, sa vagorea kai vasaenga lavata, beto pira saunia sisa, <<Epata!>> (na ginuana na paranga api sa <<Mu revanga tu!>> sau). 35Pana totoso tugu isa sa tavonga sa na talingina na tinoni isa, beto na meana sa puku tari sa sa taruvata, ko sa paranga vataleona.

36Beto sa naquria i Jisu sira na tinoni ko maike vavavakatonia sa na roiti api sauniria. Ba tonai sa naquria i Jisu poni sa tonai sa qai gigiri tugu vavaqatania ira na tinoni sa na veveina isa. 37Ko qai gabara vivitigi beto sira doru, ko pira qarigu, <<Doru sakasava sa sa roiti vajonga betoria sa na tinoni api. Ko ira tu na kiqili ba sa vanonongororia beto ira na poka ba sa vaparangaria,>> qarigu.

Currently Selected:

Maka 7: LGA

Highlight

Copy