Maka 8

I Jisu sa Vatetekuria ka Made Tina Tinoni

(Matiu 15.32-39)

1Ego kai totoso mule totonai sa sa vaikamu lame sa kai minete tinoni, ko kepore vavagila kai sa bai tekua. Ko sa kuku tekuria i Jisu sira na sepele ko pira sauniria, 2<<Qa roroqu vitigiria ara sira na minete tinoni pira, ura tei kue ranedi tu qai suvere tavitisiu ko kopira kepore kai sa mai tekua. 3Vei mana garunu variu buburanaria ara pa dia gugugusu, sa kode mai tabubulo pa soana sa pira. Ko ira kaki pira na dia gugusu ba sa sou jola,>> sau sisa.

4Poni qai oe laoa ira nona sepele sisa, pira qarigu, <<Ura pa qega vei pira sa pai mule tana boka teku gagani sa gita beto tana boka vatetekuria sira na tinoni pira?>> qarigu.

5Poni sa nanasaria i Jisu sira, pira sau, <<Ka visa bereti qu pogosoria agou?>> sau.

Poni qai paranga sira, <<Ka vitu gu!>> qarigu sira.

6Poni sa pojaniria sira na minete tinoni ko qai toqo pa peso. Beto sa tekuria sa ka vitu batu bereti, ko sa paranga jonganania, sa kikiparia, beto sa vaniria ira nona sepele ko mai ianiria na tinoni sau. Poni qai roiti vei tugu sira na sepele. 7Ka visa igana mutugu sa qai pogosoria, ko isa sa mananiria, beto sa pojaniria mutugu ko qai ianiria sira na tinoni. 8Qai teteku ko qai pote beto sira doru tinoni. Beto sa qai aru vavaikamuniria sa doru kikipa kole joladi ko ka vitu totopa tu sa qai kukura vapugeleniria. 9Ko na anyedi ira sa sa papada vei ka made tina marene. Pa liguna isa sa vamule riuria i Jisu sira na tinoni. 10Beto pa totoso tugu isa sa taloa sisa ko sa lao koi tavitiria sira nona sepele pa koaka ko qai toka lao vei pa eqa pa Dalamanuta.

Qai Tepa Roiti Vaivagabaradi ira na Parese

(Matiu 16.1-4)

11Ego qai lame tai Jisu sa ira na Parese ko qai podalai vaigua lao tana sira. Qai tepai ko mi roitinia isa sa kai roiti vinagigila vaivagabarana koko lagere veina pa noka qarigu. Ko qai vei ko mai podekia qarigu. 12Poni sa vagorea kai vasaenga lavata si Jisu beto pira sauniria, <<Ai sa vei ko qu tepai tu na roiti vinagigila vaivagabaradi sagou na sasae tinoni kopira? Ma poja sosotonigou ara sagou: kepore sa kai vinagigila vinasosoto mina taroiti vaniria sira na sasae tinoni pira!>> sau sisa. 13Beto sa turu loa paleria isa sira ko sa koi ligu pa koaka ko sa karovo laona pa kai kale ovuku.

Sa Vavanau Vabalauria i Jisu sira na ona Sepele

(Matiu 16.5-12)

14Ego qai roqu mumania ko qaike pogoso vasoku bereti sira na sepele, goto kai memekana gu sa qai surania pa koaka. 15Ko sa pojaniria i Jisu sira, pira sauniria, <<Mu suvere kopu! Mu balauniria sa na vavakovuruni palava tadira na Parese beto ti Herodi,>>#8.15 Na veveina na vavakovuruni palava saunia i Jisu sa na vaisori beto na vavaigitanai tadira na Parese beto ti Herodi. sauniria.

16Qai kole vavaivavakato mekadi sira na sepele, pira qarigu, <<Sa kepore gada bereti sa sa poja veinigita inara isa,>> qarigu sira.

17Ba sa tei gigilaiona tu i Jisu sa isa qai kole pojai ira, ko pira sauniria, <<Ai sa vei ko qu korapa tu vavaivavakatonia sa kepore gamiu bereti qugu? Quke vakoinonoa beto quke vagogovea tu agou sa? Sa oqoro tu revanga sa na bulomiu? 18Na beko koleona na matamiu, ba quke boka babata tu sa? Beko pore talingimiu tu, ba qu oqoro tu tavonga? Quke roqu vakoititia tu agou sa na veveina 19totonai qa kikiparia ara ka lima bereti ko qa ianiria ira ka lima tina tinoni? Ka visa sa na topa qu vapugeleniria na kikipa kole joladi?>> sauniria.

Poni sa qai paranga sira, <<Ka manogarua,>> qarigu.

20Poni sa paranga i Jisu, <<Goto tonai qa kikiparia ka vitu bereti ko qa ianiria ka made tina tinoni ara, sa ka visa topa sa qu vapugeleniria na kikipa kole joladi?>> sauniria.

Poni sa qai oe lao tu sira, <<Ka vitu,>> qarigunia.

21<<Ba ai sa vei? Qu korapa oqoro tu vagogovea agou sa?>> sau si Jisu.

I Jisu sa Salania na Tinoni Leleqana

22Ego qai lame kamu pa Betiseda sira Jisu beto ira nona sepele. Ko ketakoi sa qai toni lamenia ira na tinoni sa kai tinoni leleqana, beto qai tepa vivitigia ko mi vaoponia na limana qarigu. 23Poni sa aru tekua i Jisu sa na limana na tinoni leleqana ko sa toni votunia pa peguruna na gusu. Ketakoi tu sa lao odolo taria isa sa na matana beto sa sa vaoponia na limana beto sa nanasia, pira saunia, <<Ai vei, qu batia tu kaki sakasava?>> saunia.

24Poni sa enga sa na tinoni api, beto paranga, <<Qa batiria sira na tinoni, ba qai vei gu na gou qai korapa rereregedia,>> sau sisa.

25Beto sa sa vaopo beinia mule na limana i Jisu sa karu matana na tinoni api. Poni sa sa doro dodola beto sa jonga liguona sa na ona dodoro, ko sa doro vakakabere betoria sa doru sakasava. 26Beto sa garunu variua pa ona gugusu i Jisu sisa, pira saunia, <<Muneke lao gasa votu pa gugusu pa Betiseda,>> saunia.

I Pita sa Ule Votunia na Veveina i Jisu

(Matiu 16.13-20; Luke 9.18-21)

27Ego sa taloa riu si Jisu beto ira nona sepele ko qai lao vei pa gugugusu pa Sizaria Pilipae. Tonai qai korapa rerege lao pa soana sa sa nanasaria i Jisu sira nona sepele, pira sau, <<I sei qarigunisiu ara sira na tinoni?>> sauniria.

28Poni sa pira qarigu sira, <<I Jone Paputaiso sao qarigu sira kaki. Goto kaki sa i Elaija sao qarigu. Goto ira kaki mutu sa kame ira na tinoni kokorotai pa moa sao qarigunigo,>> qarigu sira na sepele.

29Beto sa sa nanasaria mule isa sira, <<Goto agou i sei qugunisiu sara?>> sauniria.

Poni sa oe lao tana si Pita, pira sau, <<Ao sa na Karisito,>>#8.29 Na paranga <<Mesaea>> beto na <<Karisito>> sa kai muqisina gu na ginuadi. Na ginuadi sa <<Na tinoni tavilena tana Tamasa>>. sau sisa.

30Beto sa naquria i Jisu sira ko maike vavakatonia tana kai goto tinoni sa na veveina isa sauniria.

I Jisu sa Vavakatonia na ona Mate

(Matiu 16.21-28; Luke 9.22-27)

31Ego ko sa podalai vaivagigalainia tadira i Jisu sa na veveina na Tuna na Tinoni mina gosororia soku vitigi beto mai kilu palenia ira na iviva mamata, na kuta iama beto ira qai vaivagigalainia na Vavanau ko mina tavamate sisa, ba pa liguna kue rane sa mina turu mule pa mate sisa sau. 32Ko sa poja lolodakia i Jisu tadira sa sa vei isa. Poni sa teku kalenia i Pita si Jisu ko sa podalai tokea. 33Poni sa balinga si Jisu ko sa dororia sira nona sepele beto sa tokea si Pita, pira saunia, <<Mu lao pa liguqu Setani! Ao quke korapa roroqua na sakasa tana Tamasa sao, goto tana tinoni gu,>> sau sisa.

34Beto sa kuku vaikamuniria i Jisu sira na minete tinoni beto ira nona sepele ko pira sauniria, <<Na tinoni sa nyorogua tutisiu ara sa mi roqu muma palenia nona toa mekana, beto mi pogosia na ona korosi ko mi tutisiu ara. 35Ura na tinoni sa nyorogua kopu vasarenia nona toa mekana sa kode mina saivia tugu sa nona toa. Goto na tinoni sake rabekia na ona toa pa tutiqu ara beto pa vavakatona na nongoro jongana taqu sa mina aloa sa nona toa. 36Na sa sa mina boka vagavoria na tinoni vei bi gona pale isa sa na ona toa ko bi isongia na kasia gusu doruna? Bi julingai tu! 37Ko na sa sa mina roitinia isa ko mina boka alo mulenia sa nona toa? Bi mija tu! 38Na tinoni sa keanisiu ara beto na qua paranga pa sasae tinoni ikikerena beto na selana api, poni sa na Tuna na Tinoni ba mina keania tugu sisa tonai mina lame tavitiria ira na mateana tabuna pa neqi lavata tana Tamasa na Tamana sisa,>> sau si Jisu.

Currently Selected:

Maka 8: LGA

Highlight

Copy