Maka 2

I Jisu sa Salania na Tinoni sa Mate Kale na Tinina

(Matiu 9.1-8; Luke 5.17-26)

1Ego sa jola gu ka vivisa rane tonai sa mule lao ligu pa Kepaniami si Jisu, poni sa qaike ruavo tugu nongoronia ira na tinoni sa isa sa tei korapa tu pa ruma qarigu. 2Qai kubo jola sira na tinoni qai vaikamu ko kepore tugu sa kai rora bi kole ko sa jutu lao tu pa moena na atakamana, ko ketakoi sa kole vavakatonia i Jisu sa na paranga.

3Totonai tugu sa qai pogoso kamunia ira ka made sa kai tinoni sa mate kai kale kobu tinina ko sake boka rerege. 4Ba qaike boka pogoso laonia tana ira sa na tinoni api ura sa pugelia na tinoni sa na leo ruma. Ko qai kesa ko qai kakelia tu sa na arena na ruma pa totona sosoto i Jisu. Ko sa korapa tugu koleona pa nona lovu sa qai vasikulu gorea sa na tinoni isa. 5Tonai sa batia i Jisu sa na koi vei lavatana na rarange tadira poni sa paranga laoa isa sa na tinoni sa mate kai kobu tinina, pira saunia, <<Tuqu, qai tei taleoso tu sira na mua sela,>> saunia.

6Ba ira kaki qai vaivagigalainia na Vavanau sa qai korapa toqo tata ketakoi ko qai kole vaiperania pa bulodi sa pira qarigu, 7<<Ai sa vei ko sa paranga vei tu inara sa na tinoni api? Sa vamoroania na Tamasa sa na tinoni ina! Ura mekana gu na Tamasa sa sa boka taleosonia sa na sela!>> qarigu sira.

8Ba sa tei gigilaiona tu i Jisu pa totoso isa sa isa vei qai kole vaiperania ira pa bulodi, ko sa paranga laoria isa sira, pira sauniria, <<Ai sa vei ko qu vaiperania tu pa bulomiu agou sa aipira? 9Ai ira karu paranga pira sa sa munyalana ko bi paranga laonia tinoni sa mate kai kale tinina ina? <Qai tei taleoso tu sira na mua sela,> biunia? Ba, <Mu turu, mu teku pogosia na mua lovu ko mu rerege!> biunia tu? 10Ba vei ko mu soni gigilai agou sa na Tuna na Tinoni sa poreona neqi ko mina taleosoniria sira na sela pa peso sa pira ropi ma roiti vei sara,>> sau. Ko sa paranga laoa sa na tinoni sa mate kai kale tinina, 11pira saunia, <<Ma pojanigo ara sao: turu, mu teku pogosia na mua lovu ko mu mule laomua pa mua ruma,>> saunia. 12Pa totoso tugu isa sa turu, sa teku pogosia na ona lovu ko sa votu riuona pa moedi ira doru sa na tinoni isa. Ko qai gabara beto sira doru beto qai vatarasaea ira sa na Tamasa, pira qarigu, <<Sa oqoro tabata tadagita sa kai sakasava vevei api!>> qarigu.

I Jisu Sa Kukua I Livai

(Matiu 9.9-13; Luke 5.27-31)

13Ego i Jisu sa gore ligu lao pa poanana pa ovuku Qalili ko ira na minete tinoni qai lame vavaikamunia, ko isa sa kole vagigalairia. 14Tonai sa korapa rerege jola si Jisu, sa sa batia si Livai na tuna i Alepiasi, sa korapa toqona pa ruma teteku takisina. Poni sa paranga laoia i Jisu sisa, pira saunia, <<Mei tutisiu,>> saunia. Poni sa turu ko sa tutiaona tugu i Jisu sisa.

15Ko tonai sa korapa toqo tetekuona pa ruma tai Livai si Jisu, sa soku sira na tinoni teteku takisi beto ira na tinoni seladi sa qai kole toqo tavitia si Jisu beto ira na ona sepele. Ura na motadi sira qai tututia i Jisu. 16Ira na Parese qai vaivagigalainia na Vavanau sa qai korapa tugu ketakoi. Ko tonai qai batia si Jisu sa korapa teteku tavitiria sira na tinoni seladi beto ira na tinoni teteku takisi, poni sa qai nanasaria sira nona sepele, pira qarigu, <<Ai sa vei ko sa teteku tavitiria tu ira na tinoni teteku takisi beto ira na tinoni seladi sa na tinoni api?>> qarigu.

17Tonai sa nongoro vairia i Jisu sira poni sa pira sauniria, <<Ira na tinoni toa vataledi sa qaike nyaqoa sa na tinoni vaisalana, goto ira tu na tinoni moodi. Ara qake lame ko ma kukuria ira na tinoni tuvisidi qau, goto ira tu na tinoni seladi,>> sauniria.

Na Nanasana na Tatabu Gagani

(Matiu 9.14-17; Luke 5.33-39)

18Ego ira na sepele tai Jone beto ira na Parese sa qai tatabu gagani. Ko ira na tinoni sa qai lame ko qai nanasia si Jisu, pira qarigunia, <<Ai sa vei ko ira na sepele tai Jone beto ira na sepele tadira na Parese sa qai tatabu gagani, goto ira na sepele tamu sa qaike tatabu gagani tu?>> qarigunia.

19Poni sa oe laoria i Jisu sira, pira sauniria, <<Ai sa vei, ira na tinoni tasorudi mai somanania na vavolo vaialava sa kode mai boka tatabu gagani tonai mina korapa suvere tavitiriaona sa na marene sa vaialava? Dai! Tonai qai korapa suvere tavitia ira sa na tinoni sa koni vaialava api sa maike boka tatabu gagani sira. 20Ba sa korapa lame sa na rane tonai mina tateku variu sa na marene sa vaialava api. Ko pa liguna tu isa sa mai tatabu gagani sira.

21Kepore sa kai tinoni sa tekua sa kai rikata poko koregana ko sa tuvakania na poko leluna. Ura vei mina roiti vei isa, poni sa na rikata koregana mina pijoko ko mina bako rikatia sa na poko leluna, ko na taraqama ikerena jola mutu sa sa mina taroiti. 22Beto kepore sa kai tinoni sa toto laoni vaini koregana sa na tototona leluna. Ura vei mina roiti vei isa, poni sa na vaini koregana sa kode mina pujaka pokatia sa na tototona leluna, ko mai ikere vaitakoi sa na vaini beto na tototona. Goto na vaini koregana sa sa toto laonia pa tototona koregana tugu,>> sau si Jisu.

Na Nanasana na Rane Minere

(Matiu 12.1-8; Luke 6.1-5)

23Pana kai rane Minere totonai sa rerege lao vei pa korapa inuma vuiti si Jisu, poni sa qai podalai ravusu tekugadia kiko vuiti sira nona sepele. 24Poni qai paranga sira na Parese, pira qarigunia, <<Doro, ai sa vei ko qai roitinia tu pa rane Minere ira na sepele tamu sa na roiti sake tavamalumu pana Vavanau?>> qarigunia.

25Poni sa oeria i Jisu sira, pira sau, <<Ai vei, qu oqoro tu tiro vakaberia agou sa isa vei sa roitinia i Devita beto ira nona tinoni tonai sa keporenia na gagani ko qai burana vaivasevi? 26Pana totoso sa korapa kuta iama lavata i Abiata, sa sa tomea i Devita sa na ruma tana Tamasa ko sa tekua isa sa na bereti madina ko sa gania. Na vavanauna na bereti madina isa sa mekadi gu ira na iama sa qai tavamalumunia ko mai boka tekua sisa. Ba i Devita sa tekua tu beto sa ianiria mutugu vei sira na ona tinoni,>> sau.

27Beto pira sauniria, <<Na rane Minere sa sa taroiti vania na tinoni, nake tinoni sa sa taroiti vania na rane Minere. 28Ko na Tuna na Tinoni sa na bangarana tugu vei na rane Minere,>> sau si Jisu.

Currently Selected:

Maka 2: LGA

Highlight

Copy