Maka 1

Na Tarae tai Jone Paputaiso

(Matiu 3.1-12; Luke 3.1-18; Jone 1.19-28)

1Api sa na popodalaina na nongoro jongana na veveina i Jisu Karisito, na Tuna na Tamasa. 2Na paranga tana Tamasa sa takuti pa kukuti tai Aisea na tinoni kokorotai sa pira sau,

<<Mu vainongoro!

Ara mana garunu laonia pa moemu ao

sa na qua tinoni pogoso nongoro.

Isa sa mina vatana vanigo na soana ao.#Malakai 3.1; Matiu 11.10; Luke 1.76; 7.27.

3Kai ovovele sa korapa kukuku pa qega,

pira sau,

<Agou mu vatanai na soana tana Bangara.

Mu vaemese vania na soana isa,>#Aisea 40.3; Jone 1.23. sau,>>

sau si Aisea.

4Ego ko i Jone sa na tinoni pogoso nongoro sa koko lame vei pa qega ko sa kole taraenia isa sa na veveina ira na tinoni mai gabala beto mai paputaiso ko na Tamasa mi taleosoniria na dia sela sauniria. 5Poni ira doru pa vailivutaina pa Jiudia beto ira doru pa Jerusalema sa qai vovotu lao tana, ko qai ule votuniria na dia sela ko isa sa paputaisoria pa leo pie Jodani.

6Ego ko i Jone sa sa vasaea na poko vurungu kameli, na beleti sa doko livutunia na sisikirina, beto na kupo beto na muji pirudi na ona tetekuna. 7Ko na nongoro sa kole taraenia isa sa pira sau, <<Pa liguqu ara mina tuti lame sa kai tinoni isa sa poreveveina jolanisiu ara. Ara qa ikete jola ko nake padaqu mana ovoro gore ruvata vania na pikona na ona sadolo sisa. 8Ara qa paputaisonigou na kolo sagou, ba isa tu mekana sa mina paputaisonigou na Gagala Tabuna,>> sau si Jone.

I Jisu sa Tapaputaiso beto sa Tatotoke

(Matiu 3.13-4.11; Luke 3.21-22; 4.1-13)

9Pa totoso tugu isa i Jisu sa sa kamu koko vei pa gugusu pa Nazareti pa Qalili ko sa lame tapaputaiso tai Jone pa Jodani. 10Ko isa tugu sa iolo votu isa pa kolo sa sa batia isa sa na oka sa revanga beto na Gagala Tabuna sa igoro lagere vei kai kuru kavu tana. 11Beto kai ovovele sa votu lagere vei pa noka, pira sau, <<Ao sa na Tuqu qa roroqu vivitigigo ara. Ao sa qa qera jolanigo ara,>> sau.

12Ko pa liguna tugu isa, sa sa toni votu laonia pa qega na Gagala Tabuna si Jisu. 13Ko ka madengavuluputa rane sa sa kole totokea i Setani pa qega sisa. Isa sa kole suvere tavitiria sira na manugu piru mamade nenedi, beto ko ira na mateana qai kopu vatalenia sisa.

Na Popodalaina na Roiti ti Jisu

(Matiu 4.12-17; Luke 4.14-15)

14Ego pa liguna sa tapiu si Jone, sa sa tomea i Jisu sa na ia pa Qalili ko sa kole taraenia isa sa na nongoro jongana na veveina na Tamasa, 15pira sau, <<Sa okoto gu sa na totoso beto mi toga gu sau sa na binangara tana Tamasa. Mu gabala agou ko mu vasosotoa sa na nongoro jongana,>> sauniria.

I Jisu sa Kukuria ira ka Made Tinoni Abu

(Matiu 4.18-22; Luke 5.1-11)

16Ego tonai sa korapa popoana pa keketaina na ovuku pa Qalili si Jisu, sa sa batiria sira Saimone beto i Aduru na tasina marene. Qai korapa vaqaradia pa ovuku sira, ura na tino abu sira karu. 17Poni sa kukuria i Jisu sira karu, pira sauniria, <<Mei, lame! Tutisiu, ko ma roitinigou na tinoni abu tinoni,>> sauniria. 18Poni totonai tugu qai turu loa pale gu ira karu sa na dia vaqara, ko qai lao tutiadia si Jisu.

19Ko tonai sa rerege rijo lao gu mule iqona, sa sa batiria gu mule sira Jekopi beto i Jone, kao tamatasi tuna i Zebeti, qai korapa tuvaka dia vaqara pa leo dia koaka. 20Totonai tugu sa kukuria i Jisu sira karu. Poni qai turu loa pale ira karu pa koaka sa na tamadi i Zebeti beto ira na dia tinoni roiti ko qai tutiadia gu si Jisu.

Na Tomate Ikikerena sa Taiju Pale

(Luke 4.31-37)

21Ego sa lao pa gugusu pa Kepaniami si Jisu beto ko ira na ona sepele. Ko tonai sa kamua sa na rane Minere poni si Jisu sa lao tome pa ruma vavaikamuna ko sa podalai vaivagigalai. 22Ko qai gabara betonia ira na tinoni sa na vaivagigalai tana, ura isa sake vavaivagigalai vei ira qai vaivagigalainia na Vavanau, goto sa vavaivagigalai vei na tinoni sa poreona neqi. 23Na totoso tugu isa sa korapa suvereona pa leona ruma vavaikamuna isa sa kai tinoni sa kolea na gagala ikerena ko sa lukana uui, pira sau, 24<<Na sa na mua ginugua tamigei sa ao Jisu pa Nazareti? Qu lame ko mu piaragei agei qugu? Ara qa gigilagoqua sao! Ao sa na Liosona tana Tamasa!>> sau.

25Poni sa tokea i Jisu sa na gagala ikerena api, pira saunia, <<Mu noso ko mu votu riu tana tinoni ina,>> saunia. 26Poni sa lao tu na gagala ikerena ko sa tuaria ko sa aru vivitigi palea sa na tinoni isa, beto sa uui viva beto sa votu taloa riu. 27Poni qai gabara vivitigi sira doru tinoni ko qai vaigua mekadi, pira qarigu, <<Na sa sa pu vei pira? Na vaivagigalai koregana sa tavitia na neqi sa api! Ko ira na gagala ikeredi sa iju paleniria ba qai nongoria tu ko qai vatabea tu!>> qarigu sira. 28Ko na nongorona na roiti ti Jisu sa sake ruavo tu tapiara rerege doru eqa pa vailivutaina pa Qalili.

I Jisu sa Salanaria soku Tinoni

(Matiu 8.14-17; Luke 4.38-41)

29Isa tugu qai votu taloa pa ruma vavaikamuna, poni sa i Jisu beto ira Jekopi beto i Jone qai rerege vatuvisi lao pa ruma tadira Saimone i Aduru. 30Na qoele roana i Saimone sa mangini na tinina, ko sa korapa kole pa lovu. Isa tugu sa kamu i Jisu sa qai ule vania gu isa sa na veveina na moona na qoele api. 31Poni sa lame arua sa na limana, ko sa bako vatatakolea. Poni sa taloa tana qoele sa na mo mangini, ko isa tugu sa vatana vaniria sa na tetekuna sira.

32Ego ko totonai sa gore na vevelu tonai sa koni suvu sa na tapo, poni sa qai totoni kamuniria tana sira doru tinoni momoodi beto ko ira sa tomeria na tomate ikikeredi. 33Ko na minete tinoni lavata pa gugusu isa sa qai vavaikamu pa atakamanana na ruma isa. 34Ko sa salanaria i Jisu sira na tinoni sa rajaria na okokoto mo, beto sa iju votu paleniria isa sira doru tomate ikikeredi. Sake vamalumuria isa sira na tomate ikikeredi pira ko bai pojai kaki paranga, ura qai gigilaidia ira na tomate sisa.

I Jisu sa Tarae pa Qalili

(Luke 4.42-44)

35Na vuvugei rorodomo totonai sa oqoro kabere na eqa sa dorava ko sa votu taloa lao pa kai ia kaloina si Jisu ko ketakoi sa kole vavaraona. 36Totonai sa i Saimone beto ira kaki ona baere sa qai nyaqo tututia sisa. 37Ko totonai qai batia sisa poni sa pira qarigunia, <<Ira doru qai korapa doro nyanyaqogo sao,>> qarigunia.

38Ba pira sauniria i Jisu sira, <<Aria ko ta jola lao pa kaki gugusu pata lao lana ko ara ma tarae mule ketakoi, ura isa sa qa lamenia ara,>> sauniria. 39Ko sa lekogoria isa sa doru eqa pa Qalili, ko sa tarae pa dia ruma vavaikamuna beto sa iju vovotu paleniria isa sira doru tomate ikikeredi qai kole tadira na tinoni.

I Jisu sa Salania kai Tinoni Popoquna

(Matiu 8.1-4; Luke 5.12-16)

40Kai tinoni sa popoqu sa sa lame ti Jisu, ko sa toqo sori tutunguna pa moena isa ko sa tepa totokai si Jisu, pira sau, <<Vei bu malumu sao, sa muna boka valiososiu gu sara,>> sau.

41Sa roroqu vivitigia i Jisu sa na tinoni api, ko sa kaqamania na limana ko sa ulia sisa, beto pira saunia, <<Ara qa malumu gu, ko mu lioso tu sao,>> sau si Jisu. 42Na totoso tugu isa sa tataloso valioso sa na popoqu ko sa lioso sisa. 43Pa liguna isa sa i Jisu sa vania na vavanau neneqina beto sa garunu variua sisa. 44Pira sa vavanau veinia i Jisu sisa, <<Munake isongo vavakatonia ao tana kai goto tinoni sa na veveina api. Goto mu lao mekamu ko mi doro vilotigo na iama beto mu valaoa na mua vavakukuvu vuvulasa sa vaigarununia i Mosese, ko ira doru tinoni mai vasosotoa sa ao qu tei tavalioso tu,>> saunia.

45Ba isa tugu sa taloa riu sa na tinoni api, sa sa podalai vevelania gu beto sa valekogia gu isa sa na nongoro api. Sa jola sosoto sa na vavakato tana tinoni api ko i Jisu sake boka rerege vakakabere lao pa gugusu, goto sa suvere vakaloiona tu pa peguruna na gugusu. Ko ira na tinoni pa doru vailivutaina ketakoi sa qai lame tana.

Currently Selected:

Maka 1: LGA

Highlight

Copy