Luke 10

I Jisu sa Garunuria ira ka Vitungavulu Karu Tinoni

1Ego pa liguna sa vei pira sa sa vileria mule i Jisu sira ka vitungavulu karu tinoni, ko sa garunu variuria, kakaru tinoni pa kai reregena, ko mai lao momoe pa gugusu beto pa ia ketakoi mina laoria isa sauniria. 2Ko sa pojaniria i Jisu sira, <<Sa matua nyanyalu sa na vuvua, ba ira na tinoni ababu sa qai vivisa gu. Ko mu vavara lao tana isa sa bangarania na vuvua, ko mi garunu laoniria na tinoni roiti ko mai ababu pa nona inuma. 3Mu lao sagou! Doro! Qa garunu lao veinigou na tudia na sipi pa vaikorapaidi ira na vulupu pirudi ara sagou. 4Muke pogoso varua kukura poatana, babi na mane, na sadolo, beto muke vavavakato vajola goboro totoso tadira na tinoni muna gosoro qeqeraniria pa soana. 5Tonai muna tome sagou pa kai ruma, sa momoe pira muna paranga vei, <Na bule beto na mana tana Tamasa mi somana tamugou pa ruma api!> munagu. 6Vei mina korapa suvereona pa ruma isa sa kai tinoni bubule poni sa mi kole tana sa na mana qu tepa vania. Goto vei minake pore sa kai tinoni bubule sa kode mina mule gu tamugou sa na mana isa. 7Ko isa tugu pa ruma qai vatogagou sa muna suvere, ko muna tekuria beto muna bukuria sira vei mai kaqamanigou ira, ura na tinoni roiti sa pada tugu mina tekua na tabarana. Munake lekogo vaikarovai ruruma tinganai muna taloa riu pa gugusu isa.

8Totonai muna lao kamu sagou pa kai gugusu ko mai vakamu vatalegou, sa muna tekuria tugu sira na gagani qai vatana vanigou, 9muna salanaria sira qai mo pa gugusu isa, beto pira muna poja veiniria, <Na binangara tana Tamasa sa mi togagou sau,> munaguniria. 10Goto totonai muna lao kamu sagou pa kai gugusu ba baike vakamugou, poni sa muna rerege votu lao pa soana, ko pira munagu, 11<Sa kamu tu pa kavuruna na pesona na miu gugusu qai ramata pa nenemei ba qe tavusu paleria tugu. Ko isa sa na vasosotona na vinakilasa muna gosoria agou. Ba muna roroqua agou sa na binangara tana Tamasa sa mi toga gu sau!> munaguniria. 12Ma poja vatalenigou ara sagou: na vinakilasa mina gosoria na gusu isa pa rane vaituti sa mina lavata jolania isa vei qai gosoria ira pa gugusu Sodomo,>> sau si Jisu.

Ira na Gugusu Qai Daidia Gabala

(Matiu 11.20-24)

13<<Mu takulangagamiu tu sagou pa Korazini! Mu takulangagamiu tu sagou pa Betiseda! Ura vei bi taroiti tadira na tinoni karovodi pa Turosi beto pa Sidoni sira na roiti vaivagabaradi qai taroiti tamugou kopira, sa pa moa tu bai gabala ko bai toqo ora bibiluniria na kavu beto bai pokoniria na poko taririkatadi sira! 14Ba quke gabala sagou ko na vinakilasa muna gosoria agou pa rane vaituti sa mina lavata jolania isa vei mai gosoria ira pa Turosi beto pa Sidoni. 15Goto ao ka visa pa Kepaniami! Qu rorovea sagou na poreveveimiu ko kode muna taovulu sae pa noka vavagalo qugu? Ba dai! Kode muna tagona gore pa kauruna na kasia gusu!>> sau si Jisu.

16<<Na tinoni sa nongorogou agou sa sa nongorosiu tugu sara, beto na tinoni sa kilu palegou agou sa sa kilu palesiu tugu sara. Ko na tinoni sa kilu palenisiu ara sa sa kilu palenia tugu sa na Tamasa isa sa garunusiu ara,>> sau si Jisu.

Qai Mule Kamu Sira ka Vitungavulu Karu

17Ego ko qai mule kamu sira ka vitungavulu karu qai tagarunu variu, ko qai qeqera jola, ko pira qarigu, <<Bangara, ira na tomate ikikeredi tu ba qai nongorogei tugu totonai qe iju paleria agei pa isongomu ao!>> qarigunia.

18Poni pira sauniria i Jisu sira, <<Qa tei batia tu ara si Setani, sa vei na kapi sa vukele lagere koko pa noka. 19Doro! Qa tei vanigou tu ara sa na neqi, ko muna boka teteria gu agou sira na dole, na mede, beto muna vakilasa paleria tugu agou sira doru neqi tana kana i Setani, ko kepore sa kai sava mina apulugou. 20Ba muke qerania gu agou sa na veveina ira na tomate ikikeredi qai nongorogou, goto isa tu muna qerania agou sa na veveina na isongomiu qai tei takuti tu pa noka,>> sau si Jisu.

Sa Qera si Jisu

(Matiu 11.25-27; 13.16-17)

21Ego ko pa totoso isa sa sa vapugeleni qera na Gagala Tabuna si Jisu, ko pira sau, <<Tamaqu, ao na bangarana na oka beto na peso! Qa paranga jongana lao tamu sara, ura qu tei vabatiniria tu ao ira na tinoni qaike boboka sira vei qu golomoniria ira na tinoni gigigalaidi beto na tinoni tomedi. E, Tamaqu, pa mua roroqu tugu ao sa sa taroiti vei isa.

22Doru neqi beto na gigalai sa sa tei vanisiu tu ara. Ko kepore sa kai tinoni sa gigilai na Tuna goto na Tamana gu, beto kepore sa kai tinoni sa gigilai na Tamana goto na Tuna gu beto ko ira gu sa vileria na Tuna ko mi vabatiniria sau,>> sau si Jisu.

23Ego tonai qai suvere mekadi poni sa balinga lao tadira na ona sepele si Jisu, ko pira sauniria, <<Qu tamana sagou ko qu batiria sira na sakasava qu dogororia kopira! 24Ura ma pojanigou ara sagou: kubo sira na tinoni kokorotai beto na bangara pa moa qai nyogua vivitigi dogororia na nongororia sira vei qu batiria na nongororia agou pira, ba qaike boka,>> sau si Jisu.

Na Vavakato Vavapadana na Tinoni Sameria Jongana

25Ego kai tinoni gigigalai pa Vavanau sa sa turu lao nyogua podekia si Jisu, ko sa paranga sisa, <<Tinoni vaivagigalai, na sa sa mana roitinia ara beto mana teku isongia sa na toa jola?>> sau.

26Poni pira saunia i Jisu sisa, <<Na sa sa sa takuti pa Vavanau? Na sa sa qu tiroa ao ketakoi?>> saunia.

27Poni sa oea na tinoni api sisa, pira saunia, <<Mu roroqua na Bangara na mua Tamasa pa doruna bulomu, pa doruna mua toa, pa doruna mua neqi beto pa doruna mua roroqu; beto mu roroqua na tavitimu mekamu isa vei qu roroqu mule veinigo mekamu sau,>> sau sa na tinoni poni.#Vavanau 6.5; Iama 19.18.

28Poni pira saunia i Jisu sisa, <<Na tuvisina sa na oe tamu. Ko mu roiti vei gu isa beto sa kode muna toa,>> saunia.

29Ba sa nyogua tadoro vei na ona nanasa sa na tuvisina sau sa na tinoni api, ko sa kai nanasa laoa mule si Jisu, <<I sei sa na tavitiqu ara?>> sau.

30Poni sa vataqolia i Jisu sa na nanasa tana, pira sau, <<Koleona sa kai tinoni sa taloa pa Jerusalema ko sa rerege gore pa Jeriko. Pana korapana na ona rerege gore isa sa qai raja vasiboria na tinoni raja ikikodi pa soana sisa, qai ragata vagorea na ona poko beto qai ikoa nona poata, beto sa qai maja vapapalekai, beto qai loa vakole pale na tata matena, beto sa qai riudia. 31Pana totoso tugu isa sa gore vei ketakoi sa kai iama, ko totonai sa batia na tinoni sa tavapapaleka sa sa rerege paja riuona pa kai kale soana sisa. 32Beto na soana mutugu isa sa tonia gore sa kai tinoni na bubutu Livai. Tonai sa gore kamua sa na ia ketakoi sa korapa kole sa na tinoni sa tavapapaleka ko sa batia, poni sa rerege paja riuona pa kai kale soana mutugu. 33Beto kai tinoni Sameria sa rerege gore vei tugu ketakoi, sa sa lao kamua sa ketakoi sa kole na tinoni papalekana. Totonai sa batia sa sa roroqu vivitigia ko sa nyogua tokania. 34Ko sa lao isa ko sa vuva valaoni oela beto na vaini ko sa piuria sa na palekana. Beto sa ovulu surana vamakelia pa pokotona na ona dongiki, ko sa tonia ko sa lao vakolea pa kai ruma ketakoi qai susuvere minere ira na tinoni rerege, ko sa kopunia ketakoi. 35Pa liguna sa bongi ko sa rane neqa, sa sa tekua isa sa karu poata siliva ko sa vania sa na tinoni sa kopunia na ruma, beto pira sa poja veinia, <Muna kopunia sa na tinoni api, uve? Beto vei koleona mule sa kaki sa muna gona paleria ao pa kopuna isa, sa kode mana bei vanigo sira tonai mana mule lame vei lani,> saunia.

36Ego, ko pa rorove tamu sa i sei ira kue tinoni pira sa sa vei na tavitina sa na tinoni qai ngangangulia ira na tinoni raja ikikodi?>> sau si Jisu.

37Poni pira sau sa na tinoni isa, <<Isa gu na tinoni sa roroqu tokania,>> sau.

Poni pira saunia i Jisu sisa, <<Ego, ko ao ba mu lao, ko mu roiti vei tugu isa,>> sau si Jisu.

I Jisu sa Lao pa Ruma Tadira Mata i Mere

38Ego totonai sa jokelia na ona rerege si Jisu beto ko ira na ona sepele sa qai kamua ira sa kai gugusu, ko kai rereko ketakoi na isongona i Mata sa sa vatogaria pa nona ruma. 39Na tasina rereko, na isongona i Mere, sa sa kole toqo tata pa kekerena i Jisu, ko sa kole vainongoroniria na vaivagigalai ti Jisu. 40Goto i Mata sa kole tadungananiria beto sa junoniria na soku vinatana, ko sa lao tai Jisu ko pira saunia, <<Bangara, ai vei sa jongana tugu tamu sa sa loa tari vamekainisiu na roiti ninabulu ara na tasiqu? Mu pojania ko mi lame tokansiu,>> saunia.

41Poni sa oea i Jisu sisa, <<Mata, Mata! Qu takulanganiria beto qu tadungananiria soku ngavulu sakasava sao! 42Ba kame gu sa sa pada muna isongia, ko i Mere sa sa vilea sisa na sakasava jongana jola. Ko minake tateku variunia isa sa na sakasava isa,>> sau si Jisu.

Currently Selected:

Luke 10: LGA

Highlight

Copy