Luke 11

I Jisu Sa Vaivagigalainia Na Vavara

(Matiu 6.9-15; 7.7-11)

1Kai rane sa lao vavara pa kai ia si Jisu. Ko totonai sa beto vavara, sa lao sa kame ira na ona sepele ko pira sau, <<Bangara, mu vagigalainigei na vavara kai muqisi podeke vei i Jone ba sa vagigalainiria tugu na vavara sira na ona sepele,>> sau.

2Poni sa pira sauniria i Jisu sira, <<Tonai muna vavara sa pira mugu:

<Tamamei,

Mi tapangaga na isongomu liosona.

Mu valamea na mua binangara.

3Doru rane mu vanigei na tetekuna

mene toania na rane isa.

4Mu taleosoniria sira na mei sela,

ura agei ba qe taleosoniria tugu

sira qai roiti lame sela tamigei.

Beto muke valaogei pa totoke!> mugu,>> sau si Jisu.

5Beto sa pira sauniria sira na ona sepele, <<Vei kame agou sa bi lao na korapa bongi pa ruma tana ona baere, ko pira biunia, <Qokolo, mu vanisiu mai kue batu bereti, 6ura kai qua baere sa korapa lekogonia kai ona rerege sa sa koni kamu vasiborosiu, ko kepore na gaqu gagani mana vania!> biu.

7Poni pira biu sa na ona baere pa leo ruma, <Muke vaduvilisiu, sa tei patei tu sa na atakamana, ko ara beto ira na qua koburu ba qe tei puta tu. Maneke boka tatakole lao vanigo sisa vei qu nyoguania ao,> biu sisa. 8Ba ma pojanigou ara sagou: vei minake tatakole vania tu na bereti sisa ura nona baere jonga gu ke biu tu sisa, ba pa ginuana kita mi kea talenia sa kode mai pojai ira na tinoni minagu, poni sa kode mina tatakole gu sa na tinoni sa tei kole tu api ko mina vania gu sira sa nyoguania na tinoni sa tepa ina.

9Ko sa vei sa ara ma pojanigou agou: mu tepa ko mi taianigou, mu nyaqo ko mu batia, mu kikia ko mi tarevanga vanigou. 10Ura na tinoni sa tepa sa sa tekua, na tinoni sa nyaqo sa sa batia, beto na tinoni sa kikia sa sa tarevanga vania. 11Agou na tamadi na koburu sa vei bi tepagana igana sa kai tumiu, sa ai vei kode muna vania na dole? 12Babi tepagana toruru sisa, sa ai vei kode muna vania na mede? 13Agou na tinoni ikikeremiu tu ba qu balaumiu vaniria tugu na sakasava jongadi sira na tumiu. Ko ai mina koi vei jongana jola sa na vaiia tana Tamamiu pa noka, ura isa sa jongana jolaniria ira na tinoni. Kode na Gagala Tabuna tu ba mina vaniria sira qai tepa lao tana!>> sau si Jisu.

I Jisu beto i Beelizebulu

(Matiu 12.22-30; Maka 3.20-27)

14Ego kai totoso sa iju palea i Jisu sa kai tomate popokana tana kai tinoni ko totonai sa votu riu na tomate sa sa podalai paranga sa na tinoni isa. Ko tonai qai batia sa vei isa sa qai gabara beto sira doru tinoni. 15Ba kaki ira sa pira qarigu, <<I Beelizebulu gu, na bangaradi na tomate, sa vania na neqi sa sa boka ijiju paleria na tomate ikikeredi sina!>> qarigu. 16Goto kaki ira sa qai nyogua podekia si Jisu ko qai tepai sisa ko mi roitinia kai roiti vaivagabarana, ko mai boka vasosotoa sa na lame veina tugu tana Tamasa sisa qarigu.

17Ba sa tei gigilariaona tu i Jisu sa na dia roroqu, ko pira sauniria, <<Na binangara sa tapipikata pa okokoto pukuna ko qai vavaipera mule mekadi sa kode mina tajegara. Beto na tatamana sa pikata mulenia ko mai vaikana mekadi ba mina tajegara tugu. 18Ko inara sa vei ko vei na binangara ti Setani sa bi okoto tapipikata ko bai vavaipera mekadi, sa ai mina vei beto mina boka turu vamauru? Kode minake boka! Qu paranga sagou, <I Beelizebulu gu sa vanisiu na neqi sara sa qa boka iju paleria ara sira na tomate ikikeredi,> qugu. 19Ego, vei bi sosoto tugu sa pa neqi ti Beelizebulu tugu sa ba iju paleria na tomate ikikeredi sara, sa pa neqi ti sei sa qai ijiju pale tomate sira na miu sepele mekamiu sagou? Mina vei inara sa ira na miu sepele mekamiu gu ba qai pitugou sa qu sela tugu sagou! 20Ba ara sa pa neqi tu tana Tamasa sa qa iju paleria sira na tomate ikikeredi, ko inara sa vei sa sa kaberena gu sa na binangara tana Tamasa sa sa tei togagou tu sagou.

21Tonai sa vatana vatalenia mai tu na tinoni neqi sira na ona sakasava vaipera beto sa kole kopu vatalenia sa na ona ruma, sa maike boka tangangulu sira na ona sakasava. 22Ba totonai mina kamu mule sa kai goto isa sa neqina jolania sa na tinoni neqi api ko mina raja vakilasia, poni sa mina boka teku variu betonia sira doru ona sakasava vaipera sa kole rarangeria na tinoni neqi isa ko mina ia vaipikatainiria sira doru sakasa tana.

23Isa sake somana vei taqu sa sa talesiu ara sisa, beto isa sake vaikamu tokanisiu ara sa sa vaipipiarai sisa,>> sau si Jisu.

Na Mule Ligu Tana Tomate Ikikerena

(Matiu 12.43-45)

24<<Tonai sa taiju pale sa na tomate ikikerena tana kai tinoni, poni sa lekogia isa sa doruna na qega kepore na piena, ko sa kole nyaqoa na ia ketakoi mina boka minere. Totonai sake boka batia isa sa kai ia vei mina boka suveria, sa sa paranga sisa, <Ma mule ligu gu pa qua ruma ketakoi qa suvere momoe ara,> sau. 25Ko totonai sa mule kamu sa sa batia sa tei tasaqu valioso tu beto sa tei tavatana vatale tu sa na ruma. 26Poni sa mule riu sisa ko sa toni kamuniria mutugu sira ka vitu tomate qai ikere jolania mekana ko qai kamu kole tana tinoni isa. Ko pa liguna qai kamu kole ira sa na toa tana tinoni isa sa sa ikere jolania na totoso momoe,>> sau si Jisu.

Na Qeqera Sosotona

27Ego totonai sa korapa paranga vei inara si Jisu, sa sa kuku votu pa vaikamu tinoni sa kai rereko, pira sau, <<Sa tamana sa na rereko sa vapidokigo beto sa vasusugo ao,>> sau.

28Poni pira sau si Jisu, <<E, ba ira tu qai tamana jola sa ira qai nongoria beto qai tutia na paranga tana Tamasa,>> sau si Jisu.

Na Nyoroguana Na Roiti Vaivagabarana

(Matiu 12.38-42; Maka 8.12)

29Ego tonai qai vaikamunia ira na minete tinoni, sa sa podalai paranga sisa, <<Na sasae tinoni kopira sa sake tuvisi! Qai nyoguania bi taroiti mai tu kai roiti vaivagabarana beto bai vasosoto qarigu, ba kepore sa kai vinagigila mana vanigou ara goto isa tugu na vinagigila veveina i Jona. 30Kai muqisi podeke i Jona sa na vinagigila tadira na tinoni pa Ninive, poni sa na Tuna na Tinoni ba kode na vinagigila tugu tadira na sasae tinoni kopira. 31Pa rane vaituti sa kode mina turu na kalao pa Siba ko mina tokegou sagou na sasae tinoni kopira. Ura na souna jola sa nona gugusu ba sa lame mamate tugu nongoria isa sa na boboka beto na vaivagigalai ti Solomone. Ba ma pojanigou ara sagou: korapa gu kopira lani sisa kame sa lavata jolania i Solomone. 32Pa rane vaituti sa kode mai turu ko mai tokegou ira na tinoni pa Ninive sagou na sasae tinoni kopira. Ura ira sa qai gabala loaria na dia sela totonai qai nongoria na tarae ti Jona. Ba doro! Korapa gu kopira lani sisa kame sa lavata jolania i Jona,>> sau si Jisu.

Na Jukena na Tini

(Matiu 5.15; 6.22-23)

33<<Kepore sa kai tinoni mina vatoai beto mina vatoqoa pa ia paena babi vaopo tarini kadakita sa na juke, goto mina toqoa tugu pa ona totoqona ko mina vakabereria sira doru tinoni mai tome pa leo ruma. 34Na jukena na tini sa na matamu. Vei na matamu sa mina jongana, sa na tinimu doruna kode mina tolangania na kabere. Goto vei mina ikere sa na matamu, sa kode na tinimu mina rodomo. 35Ko sa vei sa mu doro vatalea ko! Kita na kabere sa korapa kole pa mua toa sa na rodomo gu. 36Ko vei bi kabere beto sa doru tinimu ko bi kepore vavagila kai rodomo bi kolea, poni sa kode mina kabere beto pudala sa doruna na mua toa. Ko mina vaipodekai puta na juke sa toa ko sa vanigo na kabere,>> sau si Jisu.

Sa Tokeria i Jisu sira Qai Vaivagigalainia na Vavanau beto ira na Parese

(Matiu 23.1-36; Maka 12.38-40; Luke 20.45-47)

37Ego pa liguna sa beto paranga vei inara i Jisu, sa sa sorua kai Parese sisa ko mi lao teteku tavitia isa sau. Ko sa lao tugu pa ruma tana si Jisu, ko sa teteku tavitia. 38Ba sa gabara sa na Parese api totonai sa batia sake loqa lima mai beto sa teteku si Jisu.

39Ko pira saunia na Bangara sisa, <<Agou na Parese sa na pegurudi gu na miu kapa beto na peleita qu valiosoria, ba pa leomiu sa sa pugelia na ngangangulu beto na ikerena. 40Qu duduvili sagou! Beko qu tei gigilaimiu tu sa isa tugu na Tamasa sa roitinia na peguruna na tinina na tinoni sa sa roitinia na leo tinina na tinoni! 41Mu ianiria ira qai vaivasevi sira vei qu kuraniria pa miu kapa beto pa miu peleita, beto sa kode mai tavalioso vanigou sira doru sakasava.

42Mu takulangagamiu tugu sagou na Parese! Ura qu kokole gu vaivanania agou tana Tamasa sa kakame pa manogaputa na miu vuvua pa inuma vevei na miniti, na ru, beto kaki umuma ikikete, ba quke pavunia agou sa na roiti vatuvisi lao tadira na tinoni beto na roroquna na Tamasa. Pira tu sira na kuta vaivagigalai qai garo ko bu kopuniria agou, beto liligu tu bu kopuniria mule agou sira kaki vavanau vevei na kame pa manoga ina.

43Mu takulangagamiu tugu sagou na Parese! Ura qu nyonyogua toqoria agou sira na totoqodi poreveveidi pa ruma vavaikamudi, beto qu nyonyoguania ko mai gosoro qeqeranigou ira na tinoni pa ia mamaketidi.

44Mu takulangagamiu tugu sagou! Ura qu kai muqisi podeke vei ira na pou tomate qaike tavakoleniria na vinagigila ko ira na tinoni qaike batiria sa na pou ira ko qai kesaria totonai qai rerege jola,>> sau si Jisu.

45Poni sa paranga laoa kame ira qai vavaivagigalainia na Vavanau sisa, <<Tinoni vaivagigalai, tonai inara qu paranga vei sao sa qu komiti vivikeregei tugu vei sagei!>> sau.

46Poni sa pira sau si Jisu, <<Agou na tinoni vaivagigalai qu vavaivagigalainia na Vavanau ba mu takulangagamiu tugu vei! Ura pa miu ruruvatana na Vavanau sa qu vapogosoniria na pogoso mamata agou sira na tinoni. Ko qaike boka tuti betoria. Beto mekamiu agou ba kepore kai karusumiu bi aru lao ko bu podeke vakopele vaniria na pogoso sira na tinoni.

47Mu takulangagamiu tugu sagou! Ura qu roiti vasari vatataleniria agou sira na poudi ira tugu na tinoni kokorotai qai bosoniria na miu tite pa moa. 48Ko sa tabata vakabere gu pa miu roiti sa agou ba qu vaegoa tugu sa na roiti ikikerena qai roitiniria ira na miu tite pa moa. Ura ira kisa qai vaivamate, goto agou gu ko qu roitiniria na poudi ira na tinoni kokorotai. 49Pana ginugua tugu api sa sa paranga sa na Tamasa pa ona gigalai tavagigala, pira sau, <Mana garunu laoniria ara sira na tinoni kokorotai beto ira na tinoni pogoso nongoro, ko kaki ira sa kode mai vamateria, goto kaki kode mai nganganguluria,> sau. 50Ko inara sa vei sa kode mina tagorenia tugu na sasae tinoni kopira sa na vinakilasa lavata pa ginuana qai tavamate ira na tinoni kokorotai tonai vei sa roitinia na kasia gusu na Tamasa. 51Ko sa podalai tugu pa vamatena i Ebolo ko sa kamu ti Zakarae isa sa tavamate pa leo ruma zelepade, pa vaikorapaidi na lose tabuna beto na ia vavavakukuvuna. E! Ma poja vatalenigou ara sagou: ira na sasae tinoni kopira sa mai gosoroni vinakilasa!

52Mu takulangagamiu sagou qu vavaivagigalainia na Vavanau! Ura qu teku palea agou sa na viduluna na atakamana sa tome lao pa gigigalaina na Tamasa. Ko mekamiu ba quke tomea tugu, beto qu suquturia tugu agou sira qai korapa popodeke lao tome ketakoi,>> sau si Jisu.

53Totonai sa taloa pa ia isa si Jisu sa qai podalai kanai ira qai vaivagigalainia na Vavanau beto ira na Parese sisa, ko qai nanasa jujukunia isa sira na veveidi soku sakasava vei ko mi paparanga sisa qarigu. 54Ira qai kole gu doro kopunia sisa ko mai doro poai ketakoi mina paranga vaselaniria isa kaki paranga qarigu.

Currently Selected:

Luke 11: LGA

Highlight

Copy