Jona 4
4
I Jona Sa Kokorania Na Vairoqu Tai Iahova
1Ego poni sa sa ikeria i Jona sa na ikere lavata api ko sa vatekunia kai kokora lavata. 2Ko sa vavara lao sa tai Iahova, pira sau, “Notuo, Iahova! Inana sa kode mina vei qaunia ara perangana tu totonai qa korapa suverequa pa qua gusu ara! Ko sa soni vei gu sa ma uku riuqua pa Tarasisi qau! Ura qa gigila vataleaqua ara sa ao sa na Tamasa vaitavaragua, sa kolego na vairoqu jongana, quke oqani tagigiri beto qu isongia na bulo vairoqu ko qu boka beia na roqumu ko qu boka aru mulenia na vinakilasa ikerena muna garunu tariniria qugu. 3Ko, Iahova, kopira sa mu teku palenia gu ropi sa na qua toa, ura mana mate ara sa sa jongana jolania mana toa lalaoqua!” sau.
4Poni pirasau i Iahova, “Ai vei, na tuvisina tugu sa na tagigiri tamu?” sau.
5Ego sa votu lao pa peguruna na gugusu si Jona ko sa lao suvere vei pa kale sagere tapo pa gugusu isa. Ko ketakoi sa vaturua kai ona aqaqo ko sa toqo ongu pa leona ko sa verania tinganai mina batia sa isa mina vei na gugusu isa sau. 6Poni sa vatanai i Iahova na Tamasa sa kai buburu gasoro ko sa vapidokia ko sa toa sae pa narena i Jona ko sa vaongua sa na batuna i Jona ko sa vamalibua sa na vitigi ikerena sa gosoria isa. Poni sa tekunia tu kai qera lavata i Jona sa na buburu gasoro isa.
7Ego sa vatanai na Tamasa sa kai mumuno ko totonai sa sagere na vovola rane poni sa lao tu na mumuno ko sa gania sa na buburu gasoro isa ko sa malei mateona sa na buburu gasoro. 8Totonai sa sagere sae na tapo poni sa vatanai na Tamasa sa na gava dadangana koko veina pa sagere tapo beto ko na tapo sa gonai na batuna i Jona ko sa digere tabulonia tu. Poni sa tepa toa ko mi mate kikisuona sau, pira sau, “Mana mate ara sa sa jongana jolania mana toa lalaoqua!” sau.
9Poni sa paranga lao tai Jona sa na Tamasa, pira sau, “Ai vei, na tuvisina tugu sa na tagigiri tamu veveina na buburu gasoro ina?” sau.
Poni pira sau i Jona, “E! Na tuvisina tugu sa na tagigiri taqu ko tinganai mana matequa,” sau.
I Iahova Sa Nanasia I Jona
10Poni sa paranga si Iahova, “Koi e. Ko ao qu doro roroqua na buburu gasoro api, isa quke ipata talenia beto nake ao qu valavatia, isa sa pidoko sae na bongi ko sa ipu meka gu beto sa mateona! 11Goto ara ai vei, manake doro roroqua ara sa na gugusu lavata pa Ninive ketakoi qai suvere ira soku papausu mamade nenedi beto jolania kai gogoto rabeteputa tina tinoni qaike boka doro gigalia na lima matuadi pana meridi?” sau.
Currently Selected:
Jona 4: LGA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
