Jona 3
3
I Jona sa Vatabea i Iahova
1Ego sa lame tai Jona na vinarua totoso sa na paranga tai Iahova, pira sau, 2“Mu qaqiri! Mu taloa sae pa gugusu lavata pa Ninive, ko mu kuku tariniagana sa na nongoro qa ule vanigo ara,” sau.
3Poni sa turu si Jona ko sa riu pa Ninive isa vei sa pojai i Iahova. Ego pa Ninive sa na gusu lavata piru, papada kue rane tu na rerege karovona karu uquna. 4Ego sa podalai tome reregia i Jona na rane momoe sa na gugusu, ko sa kukuku vevela, pira sau, “Ka madengavuluputa rane gu sa kole beto sa mina tapipiara sa pa Ninive!” sau.
5Poni sa qai vasosotoa ira na tinoni pa Ninive sa na Tamasa, ko qai kukuku lekogonia sa na nongoro ko na ikete na lavata sa mai noso gagani beto mai udeniria na baiki rorovodi qarigu.
6Ego ko totonai sa kamu tana bangara pa Ninive sa na nongoro poni sa sa iolo pana ona totoqona bangara sisa, sa ujolo vagore palea nona poko bangara beto sa udenia na baiki rorovona ko sa gona toqona pa kukudu kavuna. 7Beto sa garunu valekogia pa Ninive isa sa na nongoro, pira sau:
Na sogara tana bangara beto ira nona iviva lavata sapi: Kepore kai tinoni babi na papausu made nenedi, na bulumakau babi na sipi, mina meai kai sa. Ira doru maike gagani beto maike isongo bukua na pie. 8Goto mai udeniria na baiki rorovodi sira na tinoni, na papausu made nenedi beto ko mai kiu alili viviva lao tana Tamasa, beto mai okoto gabala loa paleria sira na dia uana beto na roiti ikeredi. 9Uba tu! Kita pu gabala kale ko mi bei roquna na Tamasa ko mi balinga loai nona kokora manginina! Mina vei isa sa gita tanake manyao! sau.
10Ego ko qai gabala loa paleria ira sira na dia uana ikikeredi ko sa batia na Tamasa sa na dia roiti, poni sa bei roquna sa na Tamasa ko isa na vinakilasa ikerena mina vaganiniria saunia perangana sa sa sake roiti vagore votunia.
Currently Selected:
Jona 3: LGA
Highlight
Share
Copy
Want to have your highlights saved across all your devices? Sign up or sign in
© 2024, Islands Bible Ministries. All rights reserved.
