Jone 17

I Jisu Sa Vavara Tokaniria Ira Na Ona Sepele

1Ego pa liguna gu sa beto paranga vei inara si Jisu, sa sa enga sae pa noka beto pira sau, Tamaqu, sa tei kamu tu sa na totoso. Mu valavatia na Tumu, ko na Tumu mi valavatigo ao. 2Ura qu tei vania tu ao na neqi sisa ko mina lalaeniria doru tinoni, ko mina vaniria na toa jola sira qu tei ianiria tu ao. 3Na toa jola sapi: mai gigilago sao, kai memekai Tamasa sosotona, beto mai gigilai tugu si Jisu Karisito, isa qu garunu lagerenia ao. 4Ara qa tei valavatigo tu pa kasia gusu tonai qa vaokotoria sira na roiti qu ianisiu ao ko qa roitiniria. 5Ko kopira sa, Tamaqu, mu valavatanisiu pa moemu sa na vinalavata qa tei somana isongo tavitinigo tu ao totonai sa oqoro podaka na kasia gusu.

6Qa tei batiniria tu ara tadira na tinoni qu ia kale vanisiu ao pa kasia gusu sa na veveimu ao. Na mua ao sira, ba qu tei vanisiu tu ara sira, ko qai tei vataberia tu ira sa na mua paranga. 7Ko kopira qai gigilai ira sa doru sakasava qu tei vanisiu tu ao sa na koko lame veidi tamu. 8Na nongoro qu vanisiu ao sa qa tei pojaniria tu ira, ko qai tei teku vasosotoa tugu beto qai gigilai sosoto sa na koko veiqu tamu sara, beto ko qai vasosotoa sa ao tugu qu garunusiu sara.

9Ara sa qa vavara tokaniria sira. Nake kasia gusu doruna sa qa vavara tokaniria ara, goto ira tu qu vanisiu ao sa qa vavara tokaniria ura ira tu sa tamu. 10Ira doru qa isongoria ara sa tamu, beto ira doru qu isongoria ao sa taqu, ko tadira qa tekunia ara sa na vinalavata taqu. 11Qa korapa ma mule lao tamu qau sara, ko maneke suvere lalaoqua pa kasia gusu, goto ira tu pira sa mai suvere pa kasia gusu. Tamaqu liosomu, mu kopuniria pa isongomu isa qu vanisiu ara sira pira, ko mai kole kame kai muqisi podeke vei ao beto ara taqe kame. 12Totonai qa suvere tavitiria sa qa kopuniria pa isongomu qu vanisiu ara sa aipira. Qa kopu vasareria ko kepore kame ira sa bi muma goto isa tugu sa taudukunia ko mina tanyuara sa sa muma, ko sa gore votu gu sa na Kukuti Tabuna.

13Kopira sa qa korapa mule lao tamu sara, ko qa korapa paranganiria sa aipira totonai qa korapa suvere pa kasia gusu, ko mai isongo vapupugelia ira sa na qua qera pa okokoto bulodi qau. 14Ara qa tei vaniria tu ira sa na mua paranga, ba na kasia gusu sa sake tavaraguaniria sira, ura ira sa nake tana kasia gusu, kai muqisi podeke vei tugu ara ba nake tana kasia gusu. 15Qake tepaigo ara sao ko mu varijo ioloria pa kasia gusu sira, goto vei ko mu kopu vasareria tana kutana nikerena qau. 16Nake tana kasia gusu sira, kai muqisi podeke vei tugu ara ba nake tana kasia gusu. 17Mu vamadiria pa sosoto; na mua paranga sa na sosoto. 18Kai muqisi podeke vei tugu ara ba qu garunu lamenisiu pa kasia gusu, poni sa ara ba qa garunu laoniria tugu pa kasia gusu sira! 19Ko pa ginuguadi ira sa ara qa vamadi mulenisiu mekaqu, ko ira ba mai tavamadi tugu pa sosoto.

20Ba nake ira gu mekadi aipira sa qa vavara tokaniria ara, goto ira tugu vei qai vasosotosiu ara tonai qai vavakatonisiu ara ira aipira. 21Qa vavara sara ko ira doru sa mai kame. Tamaqu, qa vavara ko mai kole tadagita karu sira. Kai muqisi vei tugu ao qu kole taqu beto ko ara qa kole tamu, poni sa ira ba mai kole kame tadagita, ko na kasia gusu mi vasosotoa sa ao qu garunusiu sara. 22Ara sa isa tugu na vinalavata qu vanisiu ao sa qa vaniria sira, ko mai kame kai muqisi vei tugu ao beto ara taqe kame. 23Ara sa qa suvere tadira beto ao taqu, ko mi okoto sa na kole kame tadira, ko mi gigilai na kasia gusu sa ao qu garunusiu sara beto qu roroquria sira kai muqisi vei tugu qu roroqusiu sara.

24Tamaqu! Ira qu tei valame vanisiu tu ao sa qa nyoroguaniria ko mai suvere ketakoi mana suvere ara ko mai batia sa na qua vinalavata, isa na vinalavata qu vanisiu ao. Qu vanisiu ao sa na vinalavata ura qu roroqusiu totonai tu sa oqoro taroiti na kasia gusu. 25Tamaqu, ao na tuvisimu! Na kasia gusu sake gigilago sao, goto ara qa gigilago, beto ko ira pira qai gigilai sa ao qu garunusiu sara. 26Qa tei vagigilaniria tu ira sa na veveimu ao, ko maneke koroto tugu roiti veiniria, ko isa qu roroqu veinisiu ao ara sa mai roroqu veinia sa na goto tinoni, beto ko ara ba ma kole somana tadira, sau si Jisu.

Currently Selected:

Jone 17: LGA

Highlight

Copy