Jone 18

Sa Taaru Tamana Si Jisu

(Matiu 26.17-56; Maka 14.43-50; Luke 22.47-53)

1Pa liguna sa beto vavara vei pira si Jisu, sa sa taloa tavitiria tugu ira na ona sepele ko qai karovia na lolomo nyonyola pie pa Kedoroni. Koleona pa ia isa sa kai inuma, ko i Jisu beto ira na ona sepele sa qai lao ketakoi. 2(Ego i Jiudasi, isa na tinoni sa gabala kanai isa, sa sa tei gigilaiona tu sa na ia isa, ura tei kubo totoso tu sa i Jisu beto ko ira na ona sepele qai vavaikamu ketakoi.) 3Ko sa toniria i Jiudasi sira kai minete solodia beto ira kaki nabulu kopu tadira na kuta iama beto na Parese, ko qai lao bola sa pa inuma isa. Qai pogoso na juke, na juke ito beto na sakasava vaiperadi. 4Ba sa tei gigila betoria tu i Jisu sira doru sakasava mai taroiti lame tana, ko sa rerege lao ko sa nanasaria, I sei sa qu korapa nyaqoa agou? sau.

5Poni qai oe lao sira, I Jisu pa Nazareti, qarigu.

Poni sa paranga si Jisu, Ara sa isa, sau. (I Jiudasi na tinoni sa gabala kanai isa sa sa kole tugu turu tavitiria ira ketakoi.) 6Ko totonai Ara sa isa sauniria i Jisu, poni sa qai togolo mule ko qai vukeleniria tu pa peso.

7Beto sa nanasaria mule i Jisu sira, I sei sa qu korapa nyaqoa agou? sau.

Poni qai paranga sira, I Jisu pa Nazareti, qarigu.

8Poni sa paranga si Jisu, Qa tei pojanigou tugu sa ara sa isa. Ko vei ara gu sa qu korapa nyaqosiu agou, poni sa mu loa variuria ropi sira aipira, sau. 9(Inara sa paranga vei sisa ko mi soni gore votu sisa sa tei pojai tu isa, tonai pira sau, Qa oqoro valumua ara sa kame ira qu vanisiu ao, sau.)

10Ego sa kole tugu popogosiaona i Saimone Pita sa kai benete, ko sa unusu votunia gu ko sa maja teusu palea sa na talingi kale matuana na nabulu tana kuta iama lavata. (Na isongona na nabulu isa si Malakasi.)

11Poni sa pira saunia i Jisu si Pita, Mu soba kura mulenia pa ona kokolena sa na benete inana! Kode mana bukua tugu ara sa na kapa vitigi sa tei vanisiu tu ara na Tamaqu. Ai vei, quke gigilai ao sa vei isa? saunia.

I Jisu Sa Tatoni Lao Pa Moena I Hanasi

(Matiu 26.57-58; Maka 14.53-54; Luke 22.54)

12Ego ko qai aru tamania ira na minete solodia beto na dia tinoni mamata beto ko ira na nabulu kopu tadira na Jiu si Jisu, ko qai piua na limana, 13beto qai toni laonia tai Hanasi mai. I Hanasi api sa na roana i Kaiapasi, isa na kuta iama lavata pa aoro isa. 14(Beto ko i Kaiapasi tugu isa sa sa vavanauria sira na tinoni mamata tadira na Jiu, pira sauniria, Sa jongana jola sa kai tinoni gu bi mate vaniria sira doru tinoni, sau.)

I Pita Sa Osonia Si Jisu

(Matiu 26.69-70; Maka 14.66-68; Luke 22.55-57)

15Ego i Saimone Pita beto kai goto sepele sa qai tutia si Jisu. Kai sepele isa sa na tagigilana tana kuta iama lavata ko sa tome tuti laoia si Jisu pa kakabarena na ruma tana kuta iama lavata, 16goto i Pita sa kole turuona pa peguruna na atakamanana na bara. Ego beto sa rerege votu lame sisa na sepele na tagigilana tana kuta iama lavata ko sa lao parangia sa na rereko sa kopu atakamana, ko sa toni tomenia si Pita.

17Poni sa paranga lao tai Pita sa na rereko nabulu sa kopu atakamana, Nake ao tugu vei sa kai sepele tana tinoni poni? saunia.

Poni sa paranga si Pita, Dai, nake ara, sau.

18Ego ko sa lomoso sa neqa, ko qai vatoai ira na nabulu beto ira na nabulu kopu sa na iku naji, beto qai turu vavailivutainia ko qai kole davangadia. Ko i Pita ba sa lao tugu turu tavitiria sira ko sa somana davangaona.

Na Kuta Iama Lavata Sa Nanasia Si Jisu

(Matiu 26.59-66; Maka 14.55-64; Luke 22.66-71)

19Ego sa nanasania na kuta iama lavata ti Jisu sa na veveidi ira na ona sepele beto ko ira na ona vaivagigalai.

20Poni sa oea i Jisu sisa, <<Ara sa qa tei paranga lolodaka tu tana kasia gusu. Ko ara doru totoso qa kole vaivagigalai pa ruma vavaikamuna beto pa kakabarena zelepade gu, ketakoi qai vavaikamu ira na tinoni Jiu. Kepore tugu kai sa ba mavo poja golomia pa paena sara. 21Ko ai sa vei sa qu nanasasiu tu ara? Mu nanasa laoria tu ira na tinoni qai nongororia na sakasava qa pojaniria. Doro! Ira qai gigilaidia sira na paranga qa pojaria ara,>> sau si Jisu.

22Totonai sa paranga vei inara i Jisu sa kame ira na nabulu kopu pa keketaina sa tapalia sisa beto pira saunia, Inara muna oe veinia ao sa na kuta iama lavata? saunia.

23Poni sa oea i Jisu sisa, Vei ba paranga vasela sara, poni sa mu ule vaniria tu ropi ira doru sa na sela isa. Ba vei ba sotoqua gu sara, poni sa ai sa vei ko qu tapalasiu tu sara? sau si Jisu. 24Ego ko sa korapa tu tapiu kolena sa sa garunu laonia mule i Hanasi tai Kaiapasi na kuta iama lavata si Jisu.

I Pita Kilu Palenia Mule Si Jisu

(Matiu 26.71-75; Maka 14.69-72; Luke 22.58-62)

25Ego i Saimone Pita sa sa kole tugu turu davangaona mekana ketakoi. Poni qai paranga laoa ira kaki sisa, <<Nake ao tugu sa kai sepele tana tinoni ina?>> qarigu.

Ba sa kilu pale mutugu i Pita sisa, pira sau, <<Dai, nake ara,>> sau.

26Ba kame ira na nabulu tana kuta iama lavata isa na turana na tinoni sa taqasa teusu pale na talingina i Pita sa sa paranga votu, Goto ao sosoto tu sa qa bati tavitinigo isa pa inuma, oko? sau.

27Poni sa kai kilu pale mutugu i Pita sisa, <<Dai tugu,>> sau, beto sa pa totoso tugu isa sa piranga gu sa na kokorako.

I Paelati Sa Pitua Si Jisu

(Matiu 27.1-2, 11-14; Maka 15.1-5; Luke 23.1-5)

28Ego pa vuvugei jonga sa qai toni votunia pa ruma tai Kaiapasi si Jisu, ko qai toni laonia pa kakabarena na ruma tana qavuna. Ba ira na tinoni mamata tadira na Jiu sa qaike tome lao pa kakabarena na ruma tana qavuna, ura qaike nyorogua pajidia, kita maike boka tekua na vavolo Alokata qarigu. 29Ko i Paelati tu sa votu kamuria pa peguru sira ko sa nanasaria, Na sela sa sa qu jutunia agou na tinoni api? sau.

30Qai oe lao sira, Vei bike kai tinoni roroiti ikerena sa na tinoni api sa beke toni lamenia agei tamu sina, qarigu.

31Poni sa pira sauniria i Paelati sira, <<Ego vei sa mu toni riunia tu mekamiu ko mu pitua pa miu Vavanau mekamiu,>> sauniria.

Pira qarigu sira na tinoni Jiu, <<Ba qeke tavamalumunia pana Vavanau ko mene vamate tinoni sagei,>> qarigu. 32(Tonai qai paranga vei inara sa sa gore votu gu sa isa sa pojai perangana i Jisu isa na veveina na mate mina mate vei isa.)

33Poni sa mule tome pa ona ruma si Paelati beto sa kukua si Jisu ko sa parangia, Ao sa na bangara tadira na tinoni Jiu? saunia.

34Poni sa oe i Jisu, Ai vei, na mua gu mekamu sa na nanasa isa, ba ira kaki qai pojanigo sa na veveiqu ara? sau.

35Sa oe si Paelati, <<Ai vei, na tinoni Jiu sara ko qu nanasa veinisiu ina? Ira tugu na mua puku tinoni mekamu ao beto ko ira na kuta iama sa qai toni lamenigo taqu lani. Ko na sa tu qu roitinia sao?>> sau.

36Poni sa paranga si Jisu, <<Na binangara taqu sa nake koko veina tana kasia gusu api. Vei bi tana kasia gusu sa na binangara taqu, sa ira na qua nabulu kopu bai vaipera viviva, ko baike aru tamanasiu ira na mamata tadira na tinoni Jiu sara. Ba ura na qua binangara kisa nake tana kasia gusu api,>> sau si Jisu.

37Poni sa pira saunia i Paelati sisa, <<Ko kai bangara tugu sao, oko?>> sau.

Poni sa oe lao si Jisu, Ao qu pojai sa ara sa kai bangara. Isa qa podonia ara beto ko qa lagerenia ara pa kasia gusu api sa vei ko ara mana ululenia sa na veveina na sosoto. Ko ira doru tinoni qai kole vei pa sosoto sa qai vainongoro lame taqu, sau si Jisu.

38Sa paranga lao si Paelati, Na sa sa na sosoto? sau.

Sa Tapitu Ko Mina Tavamate Si Jisu

(Matiu 27.15-31; Maka 15.6-20; Luke 23.13-25)

Pa liguna sa paranga vei ina, sa sa votu pa peguru tadira na tinoni Jiu si Paelati ko pira sauniria, Qake batia ara sa kai ginugua selana bi boka tajutunia isa. 39Ba isa vei sa kole pa miu tututi sa ara mana boka ruvata vanigou kai tinoni tapiuna pa totoso vavolo. Ko ai vei, qu nyoroguania ko ma ruvata valao vanigou sa na bangara tadira na Jiu? sau si Paelati.

40Poni qai kai kuku vevela tu sira, Dai, nake isa! I Barabasi tu sa qe nyoroguania agei! qarigu. (I Barabasi sa na tinoni raraja ikikona.)

Currently Selected:

Jone 18: LGA

Highlight

Copy