Jone 11

Na Matena i Lazarasi

1Kai tinoni na suverena pa Betani sa sa mo, na isongona i Lazarasi. Pa Betani sa na gugusu ketakoi qai suvere ira Mere beto i Mata ira kau tamatasi. 2(I Mere api sisa sa vuvania na oela umumanga jonga pa nenena na Bangara beto ko sa puqania tugu na vurunguna, ko na luluna isa si Lazarasi sa mo.) 3Ko qai garunu laoni nongoro ira kau tamatasi rereko pira si Jisu, pira qarigunia, <<Bangara, doro! Isa na mua baere jonga qu roroqu vivitigia ao sa sa mo,>> qarigunia.

4Totonai sa nongoronia, sa pira sau si Jisu, <<Na mo ina sa minake lao jutu pa mate, goto vei ko mi tavalavata sa na Tamasa, beto pa ginuana na mo isa ba mina tavalavata mutugu sa na Tuna na Tamasa,>> sau. 5(Sa roroquria i Jisu sira Mere i Mata, kau tamatasi, beto na luludi i Lazarasi.) 6Ko totonai sa nongoria i Jisu sa mo si Lazarasi, poni sa suvereona mai tu ketakoi sa kole suvere karu rane mule si Jisu. 7Pa liguna isa beto sa paranga laoria ira na sepele sisa, <<Aria kopira ko ta mule sae ligu tu pa Jiudia,>> sau.

8Qai parangia ira na sepele sisa, <<Rabi, sa oqoro sovai pa visa gu ina ba mai gonanigo na patu qarigu sira na Jiu, ko na sa mule qu nyogua mule saenia ketakoi?>> qarigu.

9Poni sa oeria i Jisu, <<Qu gigilaimiu agou sa na rane sa tapipikata pa manogarua aoa? Ko sa vei sa na tinoni mina rerege pa rane kaberena sa minake isongo tatupe tugu, ura sa babata pa kaberena na kasia gusu api. 10Goto vei mina rerege na bongi sisa, poni sa kode mina tatutupe sa na tinoni isa, ura kepore na ona kabere,>> sau.

11Sa beto gu paranga vei inara sisa, beto pira sau mule, <<Na oda baere jonga i Lazarasi sa sa tei puta tu, ba mana lao ko mana vadoravia gu ara sisa,>> sau.

12Poni sa pira qarigunia ira na sepele sisa, <<Bangara, vei mina tei puta tu sa kode mina jongaona gu sisa,>> qarigu. 13(Ba isa vei na ginuana sa pojai i Jisu sa sa tei mate tu si Lazarasi, goto ira qai roroqua sa putagana gu sa saunia isa qarigu.)

14Poni sa lodaka vaniria gu i Jisu sa na nongoro, pira sauniria, <<Sa tei mate tu si Lazarasi, 15ba ura pa ginuguamiu agou sa qa qera sa ara qake suvere tavitia sisa, ko mu vasosoto sagou. Ko aria ko ta lao tana kopira,>> sau.

16Poni sa pira sauniria kaki sepele tavitina si Tomasi, isa qai vakukunia Patavivi, <<Ego, ariagada ko gita doru ta tutia tu, ko ta mate tavitia isa!>> sau.

I Jisu sa na Turumule beto na Toa

17Ego totonai sa kamu pa Betani si Jisu sa sa tei jola tu ka made ranena sa tagolomo si Lazarasi. 18Na gusu pa Betani sa tata kue kilomita gu na souna pa Jerusalema, 19ko kubodi sira pa Jiudia qai vaikamu suvere vamanotoria sira Mata i Mere pa mate tana luludi.

20Ego ko totonai sa nongoronia i Mata sa korapa lalameona si Jisu, poni sa sa votu lao gogosoria, goto i Mere sa suvereona tu pa ruma. 21Poni i Mata pira saunia si Jisu, <<Bangara, vei bu suveremua ao lani, sa bike mate sa na luluqu marene! 22Ba kopira ba qa gigilaiqua sa na sa isa muna tepai tana Tamasa poni na Tamasa kode vanigo gu sao,>> sau.

23Sa paranga laoa i Jisu sisa, <<Kode mina turu mule gu sa na lulumu marene,>> saunia.

24Poni oe lao si Mata, <<Qa gigilaiqua sa kode mina turu mule pa rane turumule pa rane liligu sisa,>> sau.

25Poni pira saunia i Jisu sisa, <<Ara sa na turumule beto na toa. Isa mina vasosotosiu ara sa mina mate tugu, ba kode mina toa; 26beto isa sa korapa toa ba sa vasosotosiu ara sa mineke isongo mate kamua na kamua. Ai vei, qu vasosotoa tugu ao sa api?>> sau si Jisu.

27Poni sa oe lao si Mata, <<E, Bangara, ara qa tei vasosotoa tu sa ao tugu sa na Karisito, na Tuna na Tamasa, isa sa korapa lalameona pa kasia gusu qarigunia,>> sau.

I Jisu sa Lukana

28Pa liguna sa paranga vei inara, poni sa sa mule lao pa ruma si Mata ko sa mavo kuku golomia sa na tasina i Mere ko sa vavakato vania, pira sau, <<Na Tinoni vaivagigalai sa sa tei korapa tu poni, ko sa nanasanigo tugu sao,>> saunia. 29Ko isa tugu sa nongoro si Mere, sa sa gasa turu ko sa lao gosoria sisa. 30(Sa oqoro bola kamu pa gusu si Jisu, goto sa korapa tu ketakoi sa lao parangania i Mata.) 31Ko ira na tinoni qai kole suvere vamanotia i Mere pa leo ruma sa qai tuti votu totonai qai batia na sisiqarai votu riuna i Mere. Qai roroqua ira sa palu mina lao lukana pa bevi ketakoi qai golomonia i Lazarasi basa sa qarigu.

32Ego sa lao kamu ketakoi sa korapa suvere i Jisu si Mere, ko isa tugu sa batia si Jisu poni sa sa todongo pa nenena i Jisu, beto sa paranga, <<Bangara, vei bu suveremua ao lani, sa bike mate sa na luluqu marene!>> sau.

33Totonai sa batia i Jisu na kekebona isa beto ko ira na tinoni Jiu qai tutia isa ba qai lukana tugu, poni sa sa tadungana na mamata na bulona sisa. 34Beto sa nanasaria i Jisu sira, <<Pai qu vapaenia agou sa na kokobuna i Lazarasi?>> sau.

Qai oe lao sira, <<Bangara, mei lame ko mu dogoria,>> qarigu.

35Sa lukana si Jisu. 36Poni qai paranga sira na tinoni Jiu, <<Doro! Sa koi vei roroqu vivitigia isa si Lazarasi!>> qarigu.

37Ba kaki ira sa qai paranga, pira qarigu, <<Na tinoni leqana tu ba sa vababatai, ko bi boka gu vasarea isa pa mate si Lazarasi!>> qarigu.

Sa Tavatoa Mule si Lazarasi

38Ego ko sa kai vasaenga tadungana mule pa bulona si Jisu beto sa sa lao pa bevi. (Ko na bevi isa sa qai pateinia kai patu na mangana.) 39Sa garunuria i Jisu sira, <<Mu varijo pale sa na patu,>> sauniria.

Poni sa paranga si Mata, isa na luluna na tinoni sa mate, <<Koi Bangara, sa tei nyabo umanga kare tu. Kopira sa tei ka made ranena tu sina!>> sau.

40Sa parangia i Jisu aza, <<Ai vei, qa oqoro tu pojanigo ara sa vei muna vasosoto poni sa kode muna batia ao sa na neqi lavatana tana Tamasa?>> sau.

41Poni sa qai varijo pale ira sa na patu. Beto sa enga sae pa noka si Jisu beto sa paranga, <<Tamaqu, qa paranga jongana sara tamu, ura qu nongorosiu ara sao. 42Qa gigilaiqua sa qu nongorosiu tugu doru totoso, ba koko vei gu ira na tinoni pira qai korapa sa qa korapa paranga vei pira, ko mai vasosotoa sa ao tugu qu garunusiu sara,>> sau.

43Pa liguna sa beto paranga vei isa, poni sa kuku viva, <<Lazarasi, mu votu lame!>> sau. 44Poni sa turu votu lame si Lazarasi, na limana na nenena sa qai korapa tugu taudenia poko, beto sa taude livutuni poko tugu sa na isumatana.

Sa paranga laoria i Jisu sira, <<Mu ruvatia ko mi boka riuona,>> sau.

Na Kukiti Vamatena i Jisu

(Matiu 26.1-5; Maka 14.1-2; Luke 22.1-2)

45Ego ko na kubodi ira na tinoni Jiu, ira qai kamu bolai i Mere, sa qai dogoria sisa sa roitinia i Jisu, ko qai vasosotoa sisa. 46Goto kaki ira sa qai mule tu vavakato vaniria sira na Parese ko qai ule vaniria sisa vei sa roitinia i Jisu. 47Poni qai toqo tavitiria ira na kauniseli sira na Parese na kuta iama, ko pira qarigu sira, <<Na sa sa tana roitinia gita? Ura na tinoni api sa sa korapa roitiniria kubo roiti vinagigila! 48Vei tana loa pale ko mina roiti totokai vei tugu inara sisa, sa kode doru tinoni mai vasosotoa sisa, ko mai lame ira pa Romu ko mai jegaria sa na oda ia beto na bubutu,>> qarigu.

49Ba kame ira, na isongona i Kaiapasi isa na kuta iama lavata pa aoro isa, sa pira sauniria, <<Kepore kai sa bu gigilai sagou! 50Quke gigilai tu agou sa sa jongana jola sa kai tinoni mina mate vaniria sira na tinoni doruna, ko mike tapiara sa na puku tinoni doruna?>> sauniria. 51(Ba na paranga sa poja votunia isa sa sa sake votu lame pa ona roroqu mekana, goto isa sa na kuta iama lavata pa aoro isa ko sa ulule votunia isa sa i Jisu sa mina mate vaniria sira na puku tinoni Jiu sau. 52Ba nake ira gu na puku tinoni Jiu mekadi sa mina mate vaniria, goto vei ko mai tateku vaikamu pa kai puku tinoni sira doru tinoni tana Tamasa qai nyanyala lao tinganai vei eqa.) 53Ego ko sa podalai pa rane isa sa qai kukitinia ko mai vamatea qarigunia ira na tinoni mamata tadira na tinoni Jiu si Jisu.

54Ko sa vei inara sa sake rerege vakakabere sisa pa ona rererege pa Jiudia, goto sa loai sa na ia isa ko sa laona tu pa kai ia tata pa qega pa kai pikata gugusu na isongona pa Iparemi, ko ketakoi sa suvere tavitiria sira na ona sepele.

55Ego sa tata sa na totoso vavolo Alokata tadira na Jiu ko qai okoto taloloa pa dia gugugusu sira na tinoni ko qai sae pa Jerusalema, ko mai riu tavulasa totonai sa oqoro kamu na vavolo isa qarigu. 56Ko qai kole nyaqoa ira si Jisu beto qai kole vavainanasa totonai qai vaikamu pa kakabarena zelepade, pira qarigu, <<Na sa sa qu roroqua agou? Quke rorovea agou mina kamu tugu beka somana pa vavolo sisa?>> qarigu. 57(Qai tei vatoqoa tu ira na kuta iama beto ko ira na Parese sa na garunu, ko ira na tinoni mai batia ketakoi sa korapa suvere vei si Jisu sa mai ulenia ko mina taaru tamana sisa qarigu.)

Currently Selected:

Jone 11: LGA

Highlight

Copy