Jone 10

Na Vavakato Vavapadana na Godo Sipi

1Sa paranga i Jisu, <<Sosoto pa sosoto ma pojanigou ara sagou: na tinoni sake tome vei pa atakamanana na toba sipi, goto sa kesa goboro vei tu pa goto ia, sa na tinoni ikikona beto na tinoni raja ikikona sisa. 2Ba na tinoni sa tome vei pa atakamanana na toba sa na sepati tadira na sipi sisa. 3Na tinoni kopu sa sa revanga vania na atakamana sisa. Ira na godo sipi qai nongoro gigilai na ovovelena beto sa gigalaria na okoto isongodi sira na ona sipi, ko sa toni votuniria. 4Pa liguna sa toni vavoturia, poni sa rerege pa moedi ira na sipi sisa beto ira sa qai tutia sisa, ura qai tei nongoro gigilai tu ira sa na ovovelena sisa. 5Ira sa maike isongo tuti goboria mule sa kai goto tinoni. Kode mai ukunia tu sisa, ura qaike nongoro gigilai ira sa na ovovelena na goto tinoni,>> sau si Jisu.

6Ko api sa na vavakato vavapada sa vavakato vaniria i Jisu, ba qaike vagigilai tu ira sa na ginuana.

I Jisu sa na Sepati Jongana

7Poni pira sau mule si Jisu, <<Sosoto pa sosoto ma pojanigou ara sagou: ara sa na atakamana tadira na sipi. 8Ira doru qai valigusiu ara ko qai lao momoe sa na tinoni ikikodi beto na tinoni raja ikikona, ba na sipi qaike nongororia sira. 9Ara sa na atakamana. Isa sa lame tome vei taqu sa mina tavasare; mina tome na votu riu nyaqogana buburu gagani. 10Na tinoni ikikona sa sa lame ko sa iko, sa kubolo vamategana beto sa pipiaraona gu. Ba ara sa qa lame ko ira na tinoni mai boka isongia sa na toa beto ko mai isongia na toa pugelena qau.

11Ara sa na sepati jongana. Na sepati jongana sa vaniria na sipi sa na ona toa. 12Na tinoni sa tatabara gu beto sa roiti sa nake sepati beto sake isongoria sa na sipi, ko totonai sa batia na lamena kai vulupu poni sa uku loa paleria sa na sipi. Ko sa garataria na vulupu sira na sipi qai taloa pale beto sa adu vaqaqata laoniria doru eqa. 13Sa uku riuona sa na tinoni sa tatabara, ura sa tatabara gu sisa ko sake roroquria sa na sipi. 14Ara sa na sepati jongana, ko qa gigilaria sira na qua sipi beto ira na qua sipi qai gigilasiu sara. 15Kai muqisi podeke vei na Tamaqu sa gigilasiu sara beto ara ba qa gigilai na Tamaqu, poni sa ara ba qa vaniria na sipi sa na qua toa. 16Ba koledia mule sa kaki qua sipi qai oqoro somana kole pa toba api. Kode mana toni lameniria tugu sira, ko mai nongoria na ovovelequ ko mai vaikamu lame pa godo sipi tana kai sepati gu.

17Na Tamaqu sa roroqusiu sara, ura qake rabeke vaivanania ara sa na qua toa, ko sa vei sa mana boka teku mulenia gu sa na qua toa. 18Kepore sa kai tinoni sa boka ragata variunisiu na qua toa, goto qa vamalumia gu pa qua roroqu mekaqu ara sa na qua toa. Ara qa boka valaoa sa na qua toa beto ara mana boka teku mulenia sisa. Na garunu api sa qa tekunia ara tana Tamaqu,>> sau si Jisu.

19Ego ko sa kai tapipikata mule sa na roqudi ira na tinoni tonai qai nongoria na paranga isa. 20Kubodi ira sa qai paranga, <<Sa kolea na tomate ko sa tuturu sina! Ai sa vei ko qu nyorogua nongoria agou sa?>> qarigu.

21Ba kaki sa qai paranga, <<Na tinoni sa kolea na tomate sa sake boka paranga vei inara! Na tomate mina boka vababatai tugu na tinoni leqana?>> qarigu.

Ira na Tinoni Jiu Qai Kilunia si Jisu

22Ego pa totoso sa lomoso na eqa sa sa taroiti sa kai vaikamu qeqera na roroquna na vatabunana liguna na zelepade pa Jerusalema, 23ko i Jisu sa kole rerege lao vei pa ia qai gigalania na Susuverena ti Solomone pa kakabarena zelepade. 24Poni qai vaikamu vailivutainia ira na Jiu sisa, beto qai nanasia, <<Ai sovai vei sa muna kole varuragei agei sao? Vei na Karisito sosoto sao, sa mu lodaka vanigei gu,>> qarigunia.

25Poni sa oeria i Jisu sira, <<Qa tei pojanigou tu sagou, ba quke vasosoto. Ira na roiti qa roitiniria ara pa neqi tana Tamaqu sa ira tugu sa qai ululenia na veveiqu ara; 26ba agou sa quke vasosotosiu sara, ura koko vei nake qua sipi ara sagou. 27Na sipi taqu sa qai nongoria tugu na ovovelequ, ko ara qa gigilaria sira, beto ira ba qai gigilasiudia ko qai tutisiu sara. 28Ara qa vaniria na toa jola ko maike isongo mate manyao, beto ko kepore kai tinoni mina ragata visu tekuria pa limaqu sira.

29Na Tamaqu isa sa vanisiu sira sa sa lavata jolaniria doruna na sakasava, ko kepore kai tinoni mina boka ragata visu tekuria pa limana isa sira. 30Na Tamaqu beto ko ara sa kame gu,>> sau si Jisu.

31Totonai sa paranga vei inara isa sa qai kai voloso buti patu mule sira na Jiu ko mai gogonai qarigu. 32Sa paranga laoria i Jisu sira, <<Na kubo roiti jongadi sa vanisiu na Tamaqu sa qa tei vabatinigou tu. Ko ai ira na roiti jongadi aipira sa qu nyorogua gonanisiu ara na patu agou?>> sau.

33Qai oea ira na Jiu sisa, <<Nake roiti jongadi ira sa qe nyorogua gonanigo na patu agei ao, goto na mua vamoroanana tu na Tamasa! Ura ao ko na tinoni gu, ba qu vatamasa mulenigo mekamu!>> qarigu.

34Poni sa oeria i Jisu sira, <<Na takutina pa miu Vavanau sa pira sa paranga vei na Tamasa, <Ara qa paranga sa agou sa na tamasa,>#Kera Vinatarasae 82.6. sau. 35Taqe gigilaioda gita sa na Kukuti Tabuna sa sake tamaja goboro. Ko vei na Tamasa tu mina kukuniria na tamasa sira na tinoni qai vatogai na paranga tana Tamasa, 36poni sa ai sa vei sa agou qu jutunisiu tu qa vamoroania na Tamasa sara tonai pira qau, <Ara sa na Tuna na Tamasa,> qau? Ba ara tugu sa sa vile vamadisiu beto sa garunu lamenisiu pa kasia gusu. 37Vei bake roitiniria sira na roiti tana Tamaqu sa muke pavu vasosotosiu. 38Ba vei ba roitiniria tugu ara sira, poni vei buke vasosotosiu tugu agou sara, poni ba mu vasosotoria gu ropi sira na roiti qa roitiniria, ko mu boka gigila vatalea sa na Tamaqu sa somana tavitisiu ara, beto ara qa somana tana,>> sau si Jisu.

39Totonai sau isa poni sa mai kai aru tamania mule si Jisu qarigu, ba sa mavo sulopo votu riuona tadira si Jisu.

40Ego beto sa sa taloa ketakoi sisa, ko sa kai karovo lao mule pa kai karovona na pie Jodani, pa ia ketakoi sa vaivapaputaiso perangaina i Jone, ko sa lao suvereona ketakoi. 41Ko kubo tinoni sa qai kamu tana, beto ko pira qarigu sira, <<I Jone sa kepore kai roiti vinagigila bi roitinia, ba doruna vei sa pojai i Jone na veveina na tinoni api sa sa sosoto tugu,>> qarigu. 42Ko ira na kubo tinoni ketakoi sa qai vasosotoa sisa.

Currently Selected:

Jone 10: LGA

Highlight

Copy