Popodalaina 49

I Jekopi Sa Mananiria Na Tuna Marene

1Ego beto sa, sa kukuria i Jekopi sira na tuna marene ko pira sauniria, <<Mu vaikamu ko ma ule vanigou sira na sakasava muna gosororia pa rane qai lame pori.>>

2<<Mu vaikamu ko mu vainongoro, sagou na tuna marene i Jekopi;>>

<<Mu nongoria i Izireli na tamamiu.>>

3<<Rubeni, ao sa na tuqu moa,

Na qua viva, na neqi momoe taqu,

Qu iolo pana vavagua, iolo pa neqi,>>

4Qu tuara pipiara vei na kolo,

Ko munake iolo sao

Ura qu kesai na lovu tana tamamu,

Ko qu vapajia na qua kokolena.

5<<Ira Simioni i Levi sa na tamatasi-

Na dia benisi sa na dia vavaipiaraina.>>

6Make tomea na dia vavavanau ikerena,

Make somanania na dia vavaikamu,

Ura pa dia kokora qai vamatea na tinoni

Pa dia qeqera qai pano vapapalekaria na papausu.

7Mi taleve sa na dia kokora, ura sa manginina jola

Beto na dia tagigiri ura sa iku vuvurungu!

Mana vaipikatainiria tai Jekopi

Beto mana vaipiarainiria pa Izireli.

8<<Ao Jiuda, na tugamu na tasimu mai vatarasaego;

Na limamu mina pidururia na mua kana.

Mai titi opo gorenigo sira na tuna na tamamu.>>

9Ao Jiuda sa na laione kokoregamu;

pa liguna qu tekua na mua boso qu mule kamu.

Vei na laione kokoregana sa gona toqo kole,

Vei na laione rereko- i sei mina nyorogua vatorasia sa?

10Na kolu bangara minake taloa tai Jiuda,

Ko na opata bangara mina lame pa tutina isa

Tinganai mina lame kamu si Silo

Beto ira na tinoni mai vatabea sisa.

11Mina piko vaturunia pa gou qurepi nona dongiki,

Nona tuni dongiki pa gou qurepi vua vatatalena;

Mina puaria pa kolo vaini nona poko

Nona poko gojo pa kolo jimirina na qurepi.

12Na matana mina jimirini kolo vaini,

Na livona mina kekani meleke.

13<<I Zebuluni sa mina suvere pa babatana

Ko mina babatana tadira na vaka;

Nona voloso mina kamu pa Sidoni.>>

14<<I Isaka sa na dongiki pupuda tuva

Ba sa kole radonona pa vaikorapaidi karu ona totoqona.>>

15Totonai sa batia nona ia miminerena sa na ia vavaguana

Beto nona kobu ia sa vavagua jola.

Poni sa poloa na pokotona ko mi pogoso sau

ko sa sugaria sa na mamata qai gona vatoparenia.

16I Dani sa mina pituria ira nona tinoni

Vei tugu kame ira na bubutu Izireli.

17I Dani sa mina kai dole pa keketai soana,

Na tuni dole poisini pa rereregena,

Isa sa garatia na kikijulu nenena na hose

Ko na tinoni sa koia sa vukele pelusu mulenia.

18<<Na mua inalo ao sa qa korapa gegelenia, Iahova.>>

19<<I Qadi sa mai rapatia ira na kana bola siborodi,

Ba isa mina rapata vapelusu ukuriuria.>>

20<<I Asa sa vamasuria na gagani lilingina;

Isa mina vatanai na tetekuna bangara.>>

21<<I Naputali sa na dia nake tapiko tarina

Isa sa vaporeria na paranga vavaguadi.>>

22<<I Josepa sa na gasoro qurepi vua vatatale,

Na gasoro vua vatatale pa keketai vuvugu,

Ira na kaena qai ajara karovia na bara.

23Qai vabatinia na kokora ko qai tupia;

Qai tagigirinia ira na kuta tinoni anga.>>

24Ba sa toqo vamauru sa nona bokala,

Na limana sa sake kanoko kokomiti,

Ura na limana na Tamasa neqina tai Jekopi,

Ura na sepati, na patu tai Izireli,

25Ura na Tamasa tana tamamu, isa sa tokanigo,

Ura na Tamasa neqina jola, isa sa mananigo

Na mana qai koko lagere vei pa noka,

Na mana qai vuvugu votu vei pa kauru lilisina,

Na mana qai lame vei pa susu beto pa iapa.

26Ira na mana tana tamamiu sa qai poreveveina jolaniria,

Ira na mana lame veidi pa kukubo lalavata kokoleidi.

Jolaniria na vaitokai jongadi lame veidi pa kukubo kokoleidi.

Ira doru sakasava aipira sa mai kole pa batuna i Josepa,

Pa reana isa mina dodogororia ira na tugana na tasina.

27<<I Benisimani sa na vulupu piruna;

Na vuvugei sa gani pipiaria na mamanugu sa vamatea

Na vevelu sa vaipikatainiria sa na isisongo sa tekuria,>> sau sisa.

28Ko dorudi aipira sa ka manogarua bubutu Izireli, ko api sa na sakasava sa pojaniria na tamadi totonai sa mananiria beto sa vaniria tugu na okokoto mana sa pada mai tekua.

Na Mate Ti Jekopi

29Ego beto i Jekopi sa sa vaniria sa na vavanau aipira, pira sauniria, <<Ara sa sa tata gu beto mana mate beto mana taboko lao vaikamu tadira na qua tinoni. Ko totonai mana mate sa, muna golomo tavitinisiu ira na qua tite pa bevi pa ia tai Eporoni na tinoni Hitai, 30na bevi pa ia tai Makipela isa tata pa Mamiri pa ia pa Kenani isa i Ebarahami sa vainia tai Eporoni na tinoni Hitai ko na ia vavaigolomona saunia. 31Ketakoi sa qai golomoniria ira Ebarahami beto i Sera na maqotana beto ketakoi qai golomoniria ira Aisake i Ribeka na maqotana beto ketakoi tugu qa golomonia i Lia ara. 32Na kobu ia beto na bevi sa kole pa leo ia isa sa qai tavai tadira na tinoni Hitai,>> sauniria.

33Totonai sa vaokotia i Jekopi sira na vavanau tadira na tuna marene sa, sa polo saenia pa nona kokolena sa na nenena, sa vasaenga bebeto ko sa mate ko sa taboko lao vaikamu tadira nona tinoni.

Currently Selected:

Popodalaina 49: LGA

Highlight

Copy