Popodalaina 48

Ira Manase I Eparemi

1Ego pa liguna aipira, pira qarigunia si Josepa, <<Koi sa vioro sa na tamamu,>> qarigu. Poni sa sa toniria isa sa karu tuna marene ira Manase i Eparemi. 2Totonai qai ule vania si Jekopi, pira qarigunia, <<I Josepa na tumu marene sa kamu tamu sau,>> qarigu, poni sa sa vaipera tatakole ko sa toqo pa lovu si Izireli.

3Beto pira saunia i Jekopi si Josepa, <<Na Tamasa neqina jola sa sa votu taqu pa Luzi pa ia pa Kenani, beto ketakoi sa mananisiu, 4beto pira saunisiu, <Mana vavuago beto mana vasokugo beto mana roiti veinigo kai puku minete tinoni ara sao beto mana vanigo ara sa na ia api ko ira na vuamu ao vuka risa mai isongia kamua na kamua>.>>

5<<Ego ira karu tumu marene ao qai podo pa Ijipi totonai qa oqoro lagere ara tamu pa Ijipi sa taqu sira ko ira Eparemi i Manase sa taqu, vaitoto puputa vei tugu ira Rubeni i Simioni sa taqu. 6Ira na koburu qu vaporeria ao pa ligudi sa tamu sira goto ira karu sa na ia mai isongia vuka risa sa na isongodi sa mai taanye tavitiniria na isongodi ira na tugadi. 7Totonai qa korapa mule koko pa Padani sa, qa mamata takulanga jola sara ura sa mate si Resolo pa ia pa Kenani totonai tu qe korapa rererege lame mei, na souna iapeki koko pa Eparati. Ko qa golomonia tugu ketakoi pa keketai soana sa lao pa Eparati>> (isa pa Betilihema sisa), sau sisa.

8Totonai sa batiria na tuna marene i Josepa si Izireli sa, sa nanasa, <<Ira sei sa pira?>> sau.

9Poni pira saunia i Josepa sa na tamana, <<Ira na tuqu marene ara na Tamasa sa vanisiu lani sinara,>> saunia.

Poni pira sau si Izireli, Mu valameria ko ma mananiria, saunia.

10Ego sake kakabere vatale na matana si Izireli koi vei sa baragoso vivitigi ko sake boka batia kai sa. Ko sa toni vatata laoria tu tana i Josepa sira karu, ko na tamana sa aoria beto sa boruria.

11Beto pira saunia i Izireli si Josepa, <<Qake rove veinia mana bati ligua ara sa na isumatamu ao, ba doro kopira na vuamu tu ba na Tamasa sa vabatinisiu,>> saunia.

12Beto isa sa, sa teku varijoria i Josepa sa karu tuna pa tutungu nenena na tamana beto sa titi opo gore pa peso sisa. 13Ego i Josepa sa aruria sira karu, i Eparemi pa kale matuana lao vei pa kale lima merina i Izireli beto i Manase pa kale merina lao vei pa kale lima matuana i Izireli, beto sa sa toni laoniria tana tamana. 14Ba i Izireli sa alaka laonia tu sa na lima matuana ko sa vaoponia pa batuna i Eparemi tu ba isa pa ligu sisa, beto sa vaipiqosavalania sa na limana ko na merina sa vaoponia pa batuna i Manase ba i Manase tu sapa moa.

15Beto poni sa manania si Josepa, pira sau,

<<Na Tamasa isa qai rererege pa moena,

Ira na tamaqu i Ebarahami beto i Aisake,

Na Tamasa isa sa paususiu

Pana doru na qua toa kamu pa ngeni alepi,

16Na mateana isa sa alosiu ara pa doruna na tapata

Mi mananiria sa na koburu marene aipira.

Mai takukunia na isongoqu ara

Beto na isongodi ira na tamaqu ira Ebarahami i Aisake,

Beto mai vua vasosoku pa abana,>> sau sisa.

17Totonai sa batia i Josepa sa na tamana sa vaopoa sa na lima matuana pa batuna i Eparemi sa, sake qera ko sa arua sa na limana na tamana pa batuna i Eparemi ko mi vakarovo laoa pa batuna i Manase sau. 18Beto pira saunia i Josepa sa na tamana, <<Dai Tamaqu! Api tu sa pa moa! Vaoponia na lima matuamu pa batuna isa,>> saunia.

19Ba sa daiona tu sa na tamana, pira sau, <<Qa gigilaiqua tuqu, qa gigilaiqua. Isa ba mina lame kai puku minete tinoni tugu beto mina kai tinoni poreveveina sisa. Ba isa tugu, na tasina sa mina tinoni poreveveina jola jolania isa, beto na vuana isa sa mai kai minete puku tinoni lavata,>> saunia. 20Beto ko sa mananiria sa pa rane isa, pira sau,

<<Pa isongomu ao sa ara Izireli qa parangania sa na mana api

<Na Tamasa mi roiti veinigo ira Eparemi beto i Manase sao>,>> saunia.

Ko sa vamomoea isa si Eparemi beto sa valiligua isa si Manase.

21Beto isa sa, pira saunia i Izireli si Josepa, <<Ara sa tata gu mana mate, ba na Tamasa mina vavaburogou ko mina toni mulenigou pa ia tana tamamiu. 22Beto ara qa vanigo ao jolaniria ira na tugamu na tasimu sa kai kobu ia pa Sekemu isa na ia qa teku variuniria ara ira na tinoni Amorai pa qua benisi beto na bokala,>> saunia.

Currently Selected:

Popodalaina 48: LGA

Highlight

Copy