Popodalaina 35

I Jekopi Sa Mule Sae Pa Beteli

1Ego pira saunia na Tamasa si Jekopi, <<Mu qaqiri ko mule sae pa Beteli ko mu suvere ketakoi, beto mu roitinia ketakoi kai ia vavakukuvuna lao tai Tamasa, isa sa votu tamu totonai qu korapa ukunia na tugamu i Isoa,>> saunia.

2Ko i Jekopi sa pojaniria sira nona tamatina beto ira doru qai suvere tana, pira sau, <<Mu gona paleria sira na tamasa karovodi qu isongoria beto mu valioso mulenigou beto mu beiria na miu poko. 3Beto aria, ta sae pa Beteli, ketakoi mana vaturua ara sa kai ia vavakukuvuna lao tai Tamasa, isa sa oesiu pa qua totoso takulanga beto isa sa vavaburosiu pa rererege ketakoi qa lao ara,>> sau. 4Ko qai vania i Jekopi sa doru tamasa karovodi qai isongoria beto ira na ringi qai vasulingiria pa talingidi ko i Jekopi sa koriniria pa kauruna na gou Aloni pa Sekemi. 5Totonai qai taloa riu sira na minete tai Jekopi poni sa na matagutuna na Tamasa sa goreria sira na gugugusu pa vailivutaidi ko kepore sa kame bi adu tutiria.

6Ego ko i Jekopi beto doru na tinoni qai tutia sa qai kamu pa Luzi (isa pa Beteli) pa ia pa Kenani, 7Ketakoi sa vaturua i Jekopi sa kai ia vavakukuvuna beto sa vakukunia na ia isa El Beteli, ura ketakoi sa sa vatadogoronia mekana na Tamasa tana totonai sa ukunia na tugana.

8Ego i Debora, na rereko kopu koburu tai Ribeka sa, sa mate ko sa tagolomo pa kauru gou Aloni pa Beteli. Ko sa tavaisongonia Aloni Bakuti sa na ia isa.

9Ego na Tamasa sa sa votu mule tai Jekopi pa liguna sa mule koko pa Padani Arami ko sa manania sisa. 10Beto pira saunia na Tamasa sisa, <<Na isongomu si Jekopi, ba munake takuku sogania i Jekopi sao, goto na isongomu sa mina i Izireli tu,>> sau. Ko sa vaisongonia i Izireli sa na isongona.

11Beto pira saunia mutu na Tamasa, <<Ara sa na Tamasa neqiqu jola, mu vua beto mu soku. Kai puku tinoni beto kai minete bubutu tinoni sa mina koko lame vei tamu, beto ira na babangara sa mai votu lame vei pa tinimu ao. 12Na ia qa vania na mua tite i Ebarahami beto na tamamu i Aisake sa qa vanigo mutu ao beto ira na tutimu ao vuka risa qa vaniria sa na ia api,>> sau. 13Beto sa iolo loai na Tamasa sisa pa ia ketakoi sa parangania.

14Ego sa vaturua i Jekopi sa kai babara patu pa ia ketakoi sa parangia na Tamasa, beto sa vuva vamadini vaini vaivana beto sa vuva vamadini oela tugu vei. 15Ego sa vakukunia Beteli i Jekopi sa na ia ketakoi sa parangania na Tamasa isa.

Na Mate Ti Resolo

16Ego beto sa qai taloa pa Beteli ko qai riu. Totonai qai korapa tu tata kamu pa Eparati, sa vivitigi gu si Resolo ba sa vatapatia na vapodo koburu. 17Beto totonai sa korapa vatapatia na vapodo koburu si Resolo sa pira sau sa na rereko sa vatekuni koburu isa, <<Muke bebenyo, qu isongia mule kai marene sao,>> saunia. 18Totonai sa korapa vasaenga bebeto ura sa mate gu sisa, poni sa sa vakukunia na isongona i Beni Oni sa na koburu. Ba na tamana sa vaisongonia i Benisimani sisa.

19Ko sa mate si Resolo ko sa tagolomo pa soana lao pa Eparati (isa pa Betilihema). 20Ego ko sa vaturua i Jekopi sa kai babara patu pa arena na bevi isa ko na babara patu isa sa na vinagigilana na bevi tai Resolo kamua tu pa rane pa ngeni alepi.

21Ego ko sa rijo riu mutu si Izireli ko sa vaturua nona aqaqo kai kalena lao pa Miqidal Edea. 22Totonai tu sa korapa suvere I Izireli pa pikata ia isa sa, I Rubeni sa tome puta tavitia si Biliha na maqotana i Izireli na tamana. Ko i Izireli sa nongoria sa vei isa.

Ira Na Tuna Marene I Jekopi

Ego ko ira ka manogarua sa na tuna marene i Jekopi. 23Ira na tuna marene i Lia sa: I Rubeni na tuna pa moa i Jekopi, I Simioni, i Levi, i Jiuda, i Isaka beto i Zebuluni.

24Ira na tuna marene i Resolo sa: Ira Josepa i Benisimani.

25Ira na tuna marene i Biliha na nabulu rereko tai Resolo sa: Ira Dani i Naputali.

26Ira na tuna marene i Zilipa na nabulu rereko tai Lia sa: Ira Qadi i Asa.

Aipira sira na tuna marene i Jekopi qai podo pa Padani Arami.

Na Mate Ti Aisake

27Ego i Jekopi sa mule kamu pa gusu tai Aisake na tamana pa Mamere tata pa Kiriati Aba (isa pa Heboroni), na gusu ketakoi qai suvere vei na tinoni karovodi ira Ebarahami i Aisake. 28Ego I Aisake sa suvere kamua kai gogoto vesungavuluputa aoro. 29Beto sa vasaenga bebeto ko sa mate si Aisake totonai sa baragoso vapaparoi ko sa tagolomo tavitiria ira nona tinoni sisa. Ko ira Isoa i Jekopi karu tuna marene qai vapaea sa na kokobu tinina.

Currently Selected:

Popodalaina 35: LGA

Highlight

Copy