Roiti 5

Ira Hananiasi beto i Sapira

1Ego ko koleona sa kai tinoni na isongona i Hananiasi beto na maqotana si Sapira. I Hananiasi ba sa vavainia tugu sa iapeki ona isisongo 2beto sa pogoso laonia tadira na tinoni tagarunudi sa kai kobuna na poata, goto kai kobuna sa sa mavo aru golomia. Ko na maqotana ba sa gigila vataleona beto sa vaegoa tugu sa sa vei isa.

3Poni sa paranga laoa i Pita sisa, pira saunia, <<Hananiasi! Ai sa vei ko qu vamalumia tu ao si Setani ko sa lalaenia na bulomu, ko qu sesekea tu ao sa na Gagala Tabuna beto ko qu mavo aru golomia tu ao sa na kobuna na poatana na peso qu vavainia ao? 4Totonai qu oqoro vavainia ao sa na mua tugu ao sa na peso, beto ko pa liguna qu vavainia ao poni sa sa kole tugu pa neqi tamu sa na poata ko muna boka varoiti veinia isa vei qu nyoroguania. Ko ai sa vei sa qu vakolea tu pa bulomu ao sa na roroqu ikerena api ko qu sesekenia tu ao sa na kobuna qu valamea? Nake tinoni sa qu sesekea ao, goto na Tamasa tu!>> sau si Pita.

5Isa tugu sa nongoro betoria i Hananiasi sa na paranga pira, poni sa sa vukele ko sa loai gu isa sa na singo. Ko qai matagutu vivitigi sira doru tinoni qai nongoria na ginugua isa. 6Goto ira kaki tinoni sae korega sa qai lao udea sa na kokobu tinina ko qai pala riu golomia.

7Ego ko sa jola padana kue aoa, poni sa na maqotana sa sa lao gu mule bola, ba sa oqoro nongoronia isa sa na veveina na marenena. 8Poni sa nanasa laoa mule i Pita sisa, <<Ai vei, api tugu sa na doruna na poata qu tekunia na laona na peso agou kau tamabaragoso?>> sau si Pita.

Poni sa paranga si Sapira, <<E, isa tugu,>> sau.

9Beto sa paranga lao tana si Pita, <<Ai sa vei sa qu vaivaegonia tu ao kau baragoso ko qu podekia sa na Gagala Tabuna tana Bangara? Dogoro ko! Ira na tinoni qai koni pala riu golomia na marenemu sa qai tei korapa tu turudia pa atakamana inara, ko kopira ao mule sa mai pala votunigo,>> sau.

10Poni pa totoso tugu isa sa sa vukele pa moena i Pita si Sapira ko sa loai gu sa na singo. Ko qai lao qarigu sira na tinoni koregadi poni sa qai batia sa tei mate tu, ko qai pala votu riu golomia gu mule sisa pa kekerena na marenena. 11Ko sa matagutu vivitigi sa na ekelesia doruna beto ira doru qai nongoroniria na sakasava aipira.

Soku roiti vaivagabaradi qai taroiti

12Ego ko kubo vinagigila neqidi beto na roiti vaivagabaradi sa qai roitiniria ira na tinoni tagarunudi tadira na tinoni. Beto ira doru tinoni qai vasosotoa na Bangara sa qai mekarai vavaikamu pa ia pa zelepade qai gigalania na Susuverena ti Solomone. 13Kepore mule sa kai tinoni bi varene lao somana tavitiria ira, ba qai doro valavataria ira na tinoni qaike vasosoto sira na tinoni tana Bangara aipira. 14Ko qai mota tugu lalaodia sira qai vasosotoa na Bangara ko qai somana taanye taviti tadira na tinoni tana Bangara, ira na iviva marene na rereko. 15Qai koi vei tanongoro sa na roiti vaivagabaradi qai roitiniria ira na tinoni tagarunudi ko pa lodaka soana tu ba ira na tinoni sa qai pala laoniria sira qai mo ko qai lovasa vaniria na lovu beto qai vakoleria pa dia kokoledi. Qai roiti vei inara ko totonai mi rerege jola vei ketakoi i Pita poni sa na onguna gu ba mina onguria qarigu. 16Ko ira na minete tinoni lame veidi pa gugusu vailivutaina pa Jerusalema sa qai okoto toni kamuniria sira qai mo beto ira na tinoni sa koleria na tomate ikikeredi, ko qai tasalana beto sira doru.

Qai takomiti sira na tinoni tagarunudi

17Ego ko na kuta iama lavata beto ira doru ona tinoni vaitokai (ira na minete tadira na Sadusisi) sa sa pugeleria na kono. 18Ko qai aru tamanaria sira na tinoni tagarunudi, ko qai vatomeria pa ruma vaipiu. 19Ba kai mateana tana Tamasa sa sa lao na bongina tugu isa ko sa revangia sa na atakamanana na ruma vaipiu, ko sa toni votuniria sira na tinoni tagarunudi. Beto pira sauniria, 20<<Mu lao turu pa kakabarena zelepade ko mu vavakatonia tadira na tinoni sa doruna na veveina na nongorona na toa api,>> sauniria. 21Ko pa liguna qai nongoria isa sa poja veiniria na mateana, poni sa na vuvugei jonga qai lao tome pa kakabarena zelepade ko qai podalai vaivagigalai mutugu tadira na tinoni.

Ego na kuta iama lavata beto ira na ona tinoni vaitokai sa qai kuku vaikamuniria sira na iviva pa kauniseli beto ira doru iviva tadira na Jiu, beto sa qai valaoa sa na garunu pa ruma vaipiu ko mai tatoni lame pa moedi sira na tinoni tagarunudi qarigu. 22Ba totonai qai lao kamu pa ruma vaipiu sira na nabulu kopu, poni sa qaike batiria sira na tinoni tagarunudi. Ko qai mule vavakato vaniria sira na minete iviva, 23pira qarigu, <<Koi! Na ruma vaipiu sa qe lao batia sa na tapatei vamauru kolena beto ko ira na tinoni kopu sa qai korapa tugu turu katapadia pa atakamana. Ba totonai qe revanga qeu, poni sa kepore kai tinoni be batia pa leona,>> qarigu.

24Ego totonai qai nongoria ira na kuta iama beto isa na mamata tadira na tinoni kopu pa kakabarena zelepade sa vei inara, sa qai rura gu koledia. Na sa beka sa mina pidoko pa ginugua api qarigu. 25Beto sa bola gu sa kai tinoni, ko pira sauniria, <<Koi, boko iviva! Ira ka visa tinoni qu vatomeria pa ruma vaipiu sa pori, qai tei korapa tu turu vaivagigalai tadira na tinoni pa leo kakabarena zelepade,>> sau. 26Poni sa taloa riu sa na mamata tadira na tinoni kopu pa ruma zelepade beto ko ira na ona nabulu kopu, ko qai lao toni muleniria sira na tinoni tagarunudi. Ba qaike toni ararianiria na vavitigiria, ura qai matagutu tagona patu tadira na tinoni.

27Ego ko qai toni tomeniria sira na tinoni tagarunudi ko qai lao vatururia pa moedi ira na kauniseli. Beto sa sa nanasaria na kuta iama lavata, 28pira sau, <<Qe tei vakolenigou tu na suqutu agei ko munake vaivagigalainia tadira na tinoni sa na isongona na tinoni api qeunigou. Ba dotu! Qu valekogia doru eqa pa Jerusalema sa na miu vaivagigalai, beto ko qu vagorenigei mutu agei sa na mate tana tinoni api!>> sauniria.

29Poni sa oe lao si Pita beto ira na tinoni tagarunudi, pira qarigu, <<Sa poreveveina jola sa na Tamasa gu sa mina tavatabe, nake ira na tinoni! 30Na Tamasa tadira na tamada pa moa sa tei vaturu mulea tu si Jisu, isa agou tugu qu patania pa korosi ko qu vamatea. 31Ba isa tugu sa sa valavatia na Tamasa pa kale matuana, ko na tuni Bangara beto na inaalo sisa. Ko isa sa mina vaniria na totoso sira na tinoni Izireli ko mai gabala pa dia sela ko mai taleoso. 32Ko agei tugu pira beto vei tugu na Gagala Tabuna sa na vinasosotodi ira na sakasava aipira, ko na Gagala Tabuna isa sa na vaivana tana Tamasa tadira qai vatabea sisa,>> qarigu.

33Ego ko totonai qai nongororia ira ka visa meba pa kauniseli sa vei inara, poni sa qai tagigiri vivikereniria ko mai vaipaleria qarigu sira na tinoni tagarunudi. 34Ba sa gasa turu sa kame ira na Parese na isongona i Qamalieli (kai tinoni vaivagigalai tugu pa Vavanau ti Mosese sisa beto ko kai tinoni tapangagana tugu tadira doru tinoni), ko sa pojaniria sira na tinoni kopu ko mai vavoturia iapeki totoso sira na tinoni tagarunudi sau. 35Beto sa sa parangaria sira pa kauniseli, pira sau, <<Ka visa tinoni Izireli! Mu doro viloto vatalea sisa mu korapa roitinia agou tadira tinoni pira qugu. 36Nake sovaina pa vivisa gu pira sa sa bola votu lame si Teudasi ko kai tinoni poreveveina sisa sau. Ira pada vei made gogoto tinoni sa qai tutia isa. Ba totonai sa tavamate sisa, poni sa ira na tinoni qai kole tututia isa sa qai okoto tapipiara, ko sa manyao gu sa na roiti tana. 37Pa liguna isa sa sa turu votu lame mule pa totoso qai taanye ira na tinoni sa kai tinoni Qalili, na isongona i Jiudasi. Ko kai puku minete tinoni mutugu sa qai tutia isa. Ba isa ba sa tavamate mutugu, ko ira qai kole tututia isa sa qai okoto nyanyalia mutugu neqa. 38Ko pa ginugua taqe dogoria api, sa api gu sa na qua vavanau tamugou: muke kotiria sira na tinoni aipira! Mu loa variuria gu! Ura vei mina lame veina gu pa tinoni sa na nyorogua babi na roiti api, poni sa kode mina tapiaraona gu sapi. 39Ba vei mina koko lame veina tana Tamasa sisa, poni sa kode munake boka vanosoria agou sira, goto kode muna raja mulea gu na Tamasa sa sa vei,>> sauniria.

Poni qai vaego betoa ira sa na paranga ti Qamalieli, 40ko qai kuku vatome beiria sira na tinoni tagarunudi ko qai mamajaria. Beto sa qai suquturia ko maike vavakato ligu pa isongona i Jisu qariguniria, beto sa qai loa variuria.

41Ko qai taloa votu riu pa kauniseli beto qai qeqera tu sira na tinoni tagarunudi, ura qai doro veinia kai sakasava poreveveina ira sa na Tamasa sa vamalumuria ko qai somana gosoroni vitigi vaivakekeana ira sa na isongona i Jisu. 42Beto ko doru rane pa kakabarena zelepade beto ko tinganai vei doru ruruma tadira na tinoni sa qaike koroto vaivagigalainia na vavakatonia ira sa na nongoro jongana na veveina na Karisito si Jisu qarigu.

Currently Selected:

Roiti 5: LGA

Highlight

Copy