Roiti 4

Ira Pita i Jone pa moedi na kauniseli

1Ego totonai qai korapa vavakato tadira na tinoni sira Pita i Jone, poni sa qai lame tadira karu sira na kuta iama, na mamata tadira na tinoni kopu pa kakabarena zelepade, beto ko ira na Sadusisi. 2Qai tagigirinia ira sisa vei qai korapa vaivagigalai ira karu tadira na tinoni beto na veveina qai taraenia sa ira na tinoni matedi sa kode mai turu mule kai muqisi vei i Jisu ba sa turu mule pa mate qarigu. 3Ko qai aru tamanaria sira karu ko qai lao vatomeria pa leo ruma vaipiu ko mai verania mina rane ligu qarigu, ura sa tei tata tu sa na bongi. 4Ego ba kubodi ira qai nongoria na tinarae ti Pita sa qai vasosoto, ko na anyedi ira qai vasosoto sa sa papada vei ka lima tina tinoni sa totonai.

5Ego ko sa rane ligu neqa poni sa qai vaikamu pa Jerusalema sira na tinoni mamata tadira na Jiu, ira na iviva mamata, beto ira qai vaivagigalainia na Vavanau. 6Ego ko qai somana sira Hanasi na kuta iama lavata, i Kaiapasi, i Jone, i Alekezada, beto ira kaki tavitina mule na kuta iama lavata. 7Ko qai lao vatururia pa moedi ira na iviva pira sira Pita i Jone, beto sa qai nanasaria, pira qariguniria, <<Na neqi savana babi pa isongona i sei sa qu roitiniria ao karu sira na sakasava aipira?>> qariguniria.

8Ego poni sa sa tapugelenia i Pita sa na neqi tana Gagala Tabuna, ko sa oe laoria, pira sau, <<Agou ka visa na tinoni mamata beto na iviva mamata tadira na tinoni! 9Ego pa rane pa ngeni api sa qe tananasa vivilotonia agei sa na veveina na roiti jongana sa taroiti tana na tinoni sa qao api beto ko pa ai soana vei sa tasalana sisa. 10Ko jongana, mu gigila vatalea ropi agou doru beto ira doru tinoni Izireli sapi: pa isongona i Jisu Karisito pa Nazareti isa agou tugu qu vamatea pa korosi ba na Tamasa sa tei vaturu mulea tu, sa sa turu pa moemiu agou na tinoni tasalana vatalena sa na tinoni api. 11Ko isa tugu i Jisu api sa sa pojai veveina na Kukuti Tabuna, pira sau,

<Na patu gamu kilu palea

agou na tinoni vavaturu ruma,

sa isa tugu sa na kuta patu viviso,>#Kera Vinatarasae 118.22; Matiu 21.42; Maka 12.10; Luke 20.17; 1 Pita 2.4, 7. sau.

12Ko sake kole mule tana kai goto tinoni sa na inaalo, ura kepore mule sa kai isisongo sa tavakukunia na tinoni pa kauruna na oka pa kasia gusu vei mina boka alogita sa gita,>> sau si Pita.

13Ego ko totonai qai batia ira na iviva qai vaikamu sa na paranga varene tadira Pita i Jone, beto ko qai gigilaidia tugu vei ira na iviva sa na tinoni susuveredi gu nake sikulu vataledi sira, poni sa qai gabara. Ba qai gigila kamua tugu ira na iviva sa na tinoni qai tututi ti Jisu sa aipira. 14Beto ko qai batiadia tugu sa korapa turu tavitiriaona ira Pita i Jone vei sa na tinoni sa tasalana, ko qaike boka pojai kai sa. 15Ko qai vavoturia sira karu, ko qai kole vaivavakato mekadi sira. 16Qai vavainanasa sira, pira qarigu, <<Ai tana roiti veiniria gita sira karu pira? Ura kai roiti vaivagabarana sa qai roitinia ira karu, ko ira doru tinoni Jerusalema ba qai tei gigila betoadia tugu, beto ko gita ba taneke boka vasekea sa na roiti api. 17Goto kita vei ko mi tapiara lao tadira doru tinoni sa na ginugua api, poni sa ta paranga vabalauria gu ko kopira maike vavakato ligunia tadira na tinoni sa na isongona i Jisu,>> qarigu.

18Ko qai kuku vatome liguria sira karu, ko qai pojaniria sa maike isongo ovelai ligunia babi vaivagigalai pa isongona i Jisu sira karu qariguniria. 19Poni qai oe lao tadira sira Pita i Jone, pira qarigu, <<Vei mina tuvisina pa moena na Tamasa sa agou sa muna tavatabe babi na Tamasa tu, sa agou mu doro pikatia sisa. 20Ura agei sa meneke boka ngujupukunia sisa vei qe batia beto qe nongoria,>> qarigu sira karu.

21Poni sa qai vatoqo vamauria ira na iviva sa na dia paranga vinabalau lao tadira karu, beto sa qai vavotu riuria. Qaike boka batia ira na iviva sa ai soana vei bai vakilasaria sira karu, ura ira doru tinoni sa qai vatarasaea na Tamasa pa roiti vaivagabarana sa taroiti. 22Ura na tinoni sa tasalana ba sa tei jola tu madengavuluputa aorona.

Ira na tinoni tana Bangara qai vavara tepai na neqi

23Ego ko pa liguna qai ruvata variuria, poni sa qai lao tadira na boko tavitidi sira Pita i Jone ko qai vavakato vaniria sisa vei qariguniria ira na kuta iama beto na iviva mamata. 24Ko totonai qai nongoria ira ka visa tinoni qai vasosoto sisa vei qai pojai ira Pita i Jone, poni sa qai mekarai kame pa vavara ko qai mekarai ovelai lao tana Tamasa. Pira qarigu sira, <<Bangara lavata, ao qu vapodakia sa na oka na peso na ivere beto doru sakasava qai kole pa leodi. 25Pira sa qu parangania ao pa Gagala Tabuna isa vei sa pojai na mua nabulu i Devita na tamamei,

<Ai sa vei ko qai kukiti tu sira na puku tinoni

beto ko qai vaingodoniria tu sira na rorove goborodi?

26Qai tei turu vanaqiti tu

ko mai vaipera qarigu sira na bangara pa peso,

beto ira na tinoni mamata qai vaikamu

ko mai vairaja lao sa tana Tamasa

beto na ona Karisito qarigu,> sau. #4.25-26 Kera Vinatarasae 2.1-2

27Ko isa tugu sa na vaikamu qai tei roitinia tu pa ia lani. Ira Herodi i Ponitiasi Paelati beto vei tugu ira na tinoni karovodi beto ira na tinoni Izireli sa qai vaikamu ko qai rajai si Jisu isa na mua nabulu liosona qu tei udukia tu ao. 28Ko qai roiti vagore voturia gu ira sira na sakasava qu tei pada vakoleria tu ao pa mua neqi beto na nyorogua. 29Inara sa vei, Bangara, ko mu dogororia sira na roiti vaivamatagutudi mai roiti lameniria qarigu, beto ko mu vanigei na vinavarene sagei na mua nabulu ko me pogoso turunia na mua paranga. 30Mu alaka lamenia tu na limamu ao ko mai taroiti sira na salana, na roiti neqidi beto na roiti vaivagabaradi pa korapa isongona na mua nabulu liosona i Jisu,>> qarigu.

31Ego isa tugu qai beto vavara, poni sa sa jojou sa na ia ketakoi qai kole vaikamu ira. Beto ko sa pugeleria na Gagala Tabuna sira doru ko qai varenenia ira sa na vavakatonia na paranga tana Tamasa.

Qai mekarai vaiisongainiria na dia isisongo

32Ego ko ira na minete tinoni qai vasosoto sa qai mekarai kame pa bulo beto pa roroqu, ko kepore kame ira bi pojania na ona gu mekana sira na ona sakasava sa isongoria, goto ira doru sa qai mekarai vaiisongainiria gu sira doru dia sakasava. 33Ko pa korapana na neqi lavata sa qai kole vavakatonia ira na tinoni tagarunudi sa na turumule ti Jisu, beto ko na mana lavata tana Tamasa sa sa somana tavitiria ira doru. 34Kepore kame ira sa bi qasania kai sakasava. Ura ira na poredia peso babi na ruma sa qai okoto vavainiria sa na dia isisongo ira, ko na poatadi na sakasava qai vavainiria 35sa qai okoto pogoso laoniria tadira na tinoni tagarunudi, ko qai tavaia lao tadira vei bai qasania kai sakasava.

36Ko i Josepa, kai tinoni na bubutu Livai na podona pa nusa Saeparasi, sa sa roiti vei isa. Ira na tinoni tagarunudi qai vakukunia i Banabasi sisa (na ginuana sa <<na tinoni sa sosori vaneqiria na goto tinoni>>). 37Sa vavainia isa sa kai ona iapeki kobu peso, beto sa pogoso lao vaniria ira na tinoni tagarunudi sa na poatana sa tekua.

Currently Selected:

Roiti 4: LGA

Highlight

Copy